HEREVA LADA-ISIDIA 26:2-15

²Bisini e roho loaloamu eiava aibisi e roho laomu na heto, heuduguirai asi badina na gabu ta ai se roho kaumu.

³Hekwadi varona na hosi ena, hahekau varona na doniki ena, bona hekwadi auna na kavakava tauna doruna ena.

⁴Kavakava tauna na ena kavakava heḡereḡerena ai basio haere henia, ia ida ba heḡereḡere na garina.

⁵Kavakava tauna na ena kavakava heḡereḡerena ai ba haere henia, ia sibona ena ita-ita ai baine aonega na garina.

⁶Gwaukau herevana na kavakava tauna imana ai e siaia laomu tauna ese sibona aena e utu ohomu bona daḡedaḡe e inuamu.

⁷Hereva lada-isina kavakava taudia ududia ai na ae-hedairike tauna aena e heveriverimu na heto.

⁸Kavakava tauna e matauraiamu tauna be nadi na vilipopo ai e kwatua kaumu tauna na heto.

⁹Hereva lada-isina kavakava taudia ududia ai na kekero tauna imana e gwadaiamu giniginina na heto.

¹⁰Kavakava tauna eiava kekero tauna raka-hanaina ai e vatuamu tauna na peva tauna taunimanima iboudiai e haberodiamu na heto.

¹¹Kavakava tauna ena kara kava ma e karaia loumu na mumutana e lou heniamu sisiana na heto.

¹²Tau ta o itaiamu, ia sibona namona e gwauraiamu? Kavakava tauna na sisina baine namo, a una tau na basine namo diba.

¹³Lahedo tauna na e tomu “Leona ta na dala ai; leona ta na ariara ai”.

¹⁴Iduara na garugaruna ai e davedavemu na heto, lahedo tauna na ena mahuta patana ai unu e davedave tomamu.

¹⁵Lahedo tauna ese imana na dihu ai e dau dobimu; ma baine abia isi uduna ai na e hesikulaiamu.