HEREVA LADA-ISIDIA 26:14-26

¹⁴Iduara na garugaruna ai e davedavemu na heto, lahedo tauna na ena mahuta patana ai unu e davedave tomamu.

¹⁵Lahedo tauna ese imana na dihu ai e dau dobimu; ma baine abia isi uduna ai na e hesikulaiamu.

¹⁶Lahedo tauna sibona ena ita-ita ai ena aonega ese mai lalo-pararadia ida e haeremu taudia hahitu e hereadiamu.

¹⁷Haida edia heai lalonai e vareaimu tauna be sisia na raka-hanaina ai taiana ai e abiamu tauna na heto.

¹⁸Dekena tauna e koiamu, bena e tomu “Lau be na hevaseha mo” tauna na kava tauna lahi tutudia bona diba bona mase e tahodiamu na heto.

²⁰Asi rakuraku audia dainai lahi na e bodomu; bona asi hemaunu tauna gabuna ai heai e dokomu.

²¹Badu haraḡa tauna ese heai e havaraiamu, guma gida latanai eiava au lahi latanai na heto.

²²Hemaunu tauna ena hereva na aniani namodia taidia na heheto, boga ai e dihomu.

²³Bibinana e manada-manadamu a lalona e dikamu tauna na uro mai kopina kavari-kavarina na heto.

²⁴E heinaimu tauna na bibinana amo e helao ahumu, bona koikoi na lalona ai e huniamu danu;

²⁵hereva manadadia e gwauraimu negana ai basio kamonai henia, badina be lalo-hadai dika-rohorohodia hitu na ia lalona ai mimia.

²⁶Ena be ena heinai na koikoi ai e heḡova ahumu, to ena dika na hebou ai baine hedinarai.