17Taiamu a hakala, aonega taudia edia hereva ba kamonaidia, egu diba na lalomu ai bavabia dae;
18badina be lalomu ai ba dogodia tao, bona bibinamu ai bavabidia hata, una na moale ḡauna.
19Hari dina ai oi vada na hadibalaimumu, Iehova bavabidadama henia helaoreana.
20Sisiba bona lalo-parara herevadia toi-ahui vada na tore henimu ani,
21kara maoromaoro bona kara momokani ihadibalaimu totona, bona haere maorona na e siaimu taudia ba henidia helaoreana?
22Ogoḡami tauna basio dadia, badina be ia na ogoḡami; hisi e animu taudia na hahemaoro gabuna ai basio taodia tao;
23badina be Iehova ese edia gini-kau gabuna ai baine durudia, bona edia kohu e dadi ohomu taudia na edia mauri baine dadi oho.
24Badu haraḡa tauna ida basio hetura, bona badu ḡaraḡara tauna ida basiola;
25ena dala ba manadalaidia, bona sibomu idoa ai ba heidoa na garina.
26Tau ta dainai e gwau hamatamu tauna ai basiola, bona ta ena abitorehai toana basio heni.