HEREVA LADA-ISIDIA 21:16-31

¹⁶Lalo-parara dalana amo e raka ohomu tauna ese mase taudia edia hebou ai baine noho.

¹⁷Moale-kava e ura heniamu tauna na baine ogoḡami; bona vine ranuna bona dehoro e ura henidiamu tauna na basine taḡa.

¹⁸Kara dika tauna na kara maoromaoro tauna ibodohilaina, bona kara koikoi tauna ese kara momokani tauna e bodohiamu.

¹⁹Tau ta tano ḡaḡaena ai baine noho be namo, a e hereva momomu bona e maumaumu hahinena ida baine noho na dika.

²⁰Kohu namo-hereadia bona dehoro na aonega tauna ena ruma ai mimia, a kavakava tauna ese e ha-orediamu.

²¹Kara maoromaoro bona hebogahisi e ḡavamu tauna ese mauri bona kara maoromaoro bona heimodai e davarimu.

²²Aonega tauna ese goada taudia edia hanua maḡuna amo e dada daemu; bona edia ruma aukana, e abidadama heniamu ḡauna, e ḡiḡia dobimu.

²³Uduna bona malana e naridiamu tauna na hekwakwanai amo e roho maurimu.

²⁴Heaḡi bona hekokoroku tauna na “gonaḡona tauna” e gwauraiamu; ia na e kara heaḡi-heaḡimu.

²⁵Lahedo tauna ena ura ese e hamaseamu, badina be ia imana na se uramu ḡaukara.

²⁶Dina idoinai kara dika tauna na e heḡahusimu, a kara maoromaoro tauna ese ḡau e henimu, se rumu.

²⁷Kara dika tauna ena boubou ḡauna na dika rohoroho, a mai ena lalo-hadai dikana ida e mailaiamu negana ai ena dikana bada herea.

²⁸Gwaurai-hedinarai koikoi tauna na baine mase, a kamonai tauna ena hereva do baine hesiriu.

²⁹Kara dika tauna ese vairana e ha-aukaiamu; a kara maoromaoro tauna ese ena dala e haerodiamu.

³⁰Asi aonega ta, asi lalo-parara ta, asi lalo-hadai ta ese Iehova baine laoa ahu diba.

³¹Hosi e heḡaeḡaelaiamu, tuari dinana inanatalaina; a kwalimu na Iehova enai.