HEREVA LADA-ISIDIA 1:7-23

⁷Iehova igari-henina na lalo-parara matamana; kavakava taudia ese aonega bona hahediba e dadaraimu.

⁸Natugu e, tamamu ena hahediba ba kamonai, bona sinamu ena hahediba herevadia basio dadaraidia;

⁹badina be idia be kwaramu ihaheralaina heraheradia bona aiomu agevana na heheto.

¹⁰Natugu e, kara dika taudia ese lalomu bae ania negana ai, edia ura basio abia dae.

¹¹Idia na bema toma: Aoma, aitala, rara ihahebubuna totona baita bani; asi edia kerere taudia na asi badina baita bani henidia;

¹²mai mauridia ida baita hadonodia, mase gabuna ese bema hadonodia heḡereḡerena; baita hadonodia idoi, mase gurina ai e dihomu taudia na heheto;

¹³bena kohu namo-hereadia iboudiai baita davari, dadidadi kohudia amo eda ruma baita hahonu;

¹⁴oi na ai ida baita ḡaukara hebou, bena iboudai na moni modana tamona baita abia hebou.

¹⁵Natugu e, idia ida basio raka hebou edia dala ai, aemu na edia dala irakalaina ai ba rudia;

¹⁶badina be aedia na kara dika e heau heniamu, rara ihahebubuna totona e lao haraḡamu.

¹⁷Badina be manu vairadiai huo iotona na asi anina;

¹⁸to ini taunimanima ese sibodia raradia ihahebubudia totona e banimu, sibodia edia mauri e bani henidiamu.

¹⁹Daḡedaḡe amo kohu e dadimu taudia iboudiai edia dala be unu heheto; unu kara ese edia mauri e abi ohomu.

²⁰Aonega na ariara ai e boi lolomu, hoinoi gabudia ai gadona e habadaiamu;

²¹maḡu latadiai e lolomu, hanua ikoukoudia ai e herevamu, e tomu:

²²Asi aonegamui taumui e, kware-kware ba ura henia ela bona edena nega ai; Ḡonaḡona taudia na edia ḡonaḡona bae moalelaia, bona kavakava taudia na aonega bae inai henia, ela bona edena nega ai?

²³Egu sisiba herevadia ba hakala henidia; a itaia, egu lalo-hadai na emui ai baina seia dobi; egu hereva baina hadibalaimui.