HEREVA LADA-ISIDIA 1:2-16

²Taunimanima na aonega bona hahediba herevadia bona lalo-parara herevadia bae diba totona;

³aonega karadia, kara maoromaoro, hahemaoro ḡoevaḡoeva bona ahu korikorina daladia, bae hadibadia totona;

⁴asi aonegadia taudia na bae henahua toho bona eregabe taudia na aonega bona karabalaheni bae abi totona.

⁵Aonega tauna danu baine kamonai, bena ena diba baine habadaia; bona lalo-parara tauna na baine ḡaukara mai dibana ida;

⁶hereva lada-isina bona haheḡereḡere anidia bae diba, aonega taudia edia hereva bona edia sivarai hehuni-hehunidia danu.

⁷Iehova igari-henina na lalo-parara matamana; kavakava taudia ese aonega bona hahediba e dadaraimu.

⁸Natugu e, tamamu ena hahediba ba kamonai, bona sinamu ena hahediba herevadia basio dadaraidia;

⁹badina be idia be kwaramu ihaheralaina heraheradia bona aiomu agevana na heheto.

¹⁰Natugu e, kara dika taudia ese lalomu bae ania negana ai, edia ura basio abia dae.

¹¹Idia na bema toma: Aoma, aitala, rara ihahebubuna totona baita bani; asi edia kerere taudia na asi badina baita bani henidia;

¹²mai mauridia ida baita hadonodia, mase gabuna ese bema hadonodia heḡereḡerena; baita hadonodia idoi, mase gurina ai e dihomu taudia na heheto;

¹³bena kohu namo-hereadia iboudiai baita davari, dadidadi kohudia amo eda ruma baita hahonu;

¹⁴oi na ai ida baita ḡaukara hebou, bena iboudai na moni modana tamona baita abia hebou.

¹⁵Natugu e, idia ida basio raka hebou edia dala ai, aemu na edia dala irakalaina ai ba rudia;

¹⁶badina be aedia na kara dika e heau heniamu, rara ihahebubuna totona e lao haraḡamu.