HEREVA LADA-ISIDIA 17:7-25

⁷Hereva ḡoevadia na asie heḡeregere kavakava tauna uduna ai, bona koikoi herevadia danu lohia uduna ai.

⁸Koikoi henitaona na mea nadina na heto, e henimu tauna ese unu e laloa tomamu; ena kara iboudiai anidia e varamu.

⁹Dika e gwau taomu tauna ese lalokau e tahuamu, a sivarai e piuamu tauna ese hetura e hadikaiamu.

¹⁰Sisiba herevana tamona ese lalo-parara tauna lalona e gwadaia dobumu, a hekwadi sinahu-ta ese kavakava tauna asie haberoamu.

¹¹Kara dika tauna ese daḡedaḡe e tahuamu; gwaukau tauna mai daḡedaḡena ida na ia bae siai henia.

¹²Tau ta ese bea hahinena, natuna vada e dadidia ḡauna, ida bae hedavari na sisina namo, a kavakava tauna ida bae hedavari na dika herea.

¹³Tau ta ese dika bema haloua, namo davana, dika ese iena ruma basine rakatania.

¹⁴Heatu matamana na ranu ikehona na heto; taunabunai heai do basine vara ai ba raka oho.

¹⁵Kara dika tauna maorona baine gwauraia tauna bona kara maoromaoro tauna dikana baine gwauraia tauna raruosi na Iehova ese e inai henidia badamu.

¹⁶Badina be dahaka kavakava tauna imana ai aonega ihoilaina davana baine mia, a ia be asi darana?

¹⁷Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.

¹⁸Asi darana tauna ese gwauhamata ḡauna e henimu; ia dekena tauna vairanai gwauhamata toana ai e laomu.

¹⁹Kara dika e ura heniamu tauna ese heiri-heiri danu e ura heniamu; bona ena iduara atai ai e karaiamu tauna ese hahebua-tari e tahuamu.

²⁰Lalo-gagevagageva tauna na ena ḡaukara anidia asie varamu, bona malana mai koikoina tauna na hahehisi ai e morumu.

²¹Lalo-duhu merona ese tamana lalona e hahisihisiamu; kavakava merona tamana na se moalemu.

²²Lalo-moale na muramura namona, a lalo-metau ese turia e hamanokadiamu.

²³Kara dika tauna ese koikoi henitaona e abia hehunimu, hahemaoro ihagagevana totona.

²⁴Lalo-parara tauna ese aonega e haḡereamu, a kavakava tauna ese tanobada dokodia e roha henia laomu.

²⁵Kavakava merona ese tamana lalona e hahisihisiamu, bona e havaraia hahinena lalona e hadikaiamu.