HEREVA LADA-ISIDIA 16:8-27

⁸Kohu maraḡina mai kara maoromaorona ida be namo; kohu bada-hereadia kara gageva-gagevadia ida na dika.

⁹Tau ta lalona ese ena dala e laloa hatamu, a Iehova ese ia aena e hakaudiamu.

¹⁰Oru edia hereva na pavapava uduna amo e lasimu; hahemaoro ai ia uduna na se kereremu.

¹¹Hahetoho ḡauna bona metau idavarina ḡauna maoromaorodia na Iehova ena; hahetoho auridia moda ai mimia iboudiai na iena ḡaukara.

¹²Pavapava ese kara dika ikarana e inai henia badamu, badina be terono na kara maoromaoro ai e ginimu.

¹³Hereva maoromaoro bibinadia na hanua pavapavana ese e moalelaidiamu; ia ese hereva maoromaorodia e gwauraimu tauna na e lalokau heniamu.

¹⁴Pavapava ena badu na mase ena gwaukau tauna; aonega tauna ese lalona baduna baine hakerua.

¹⁵Pavapava vairana diarina ai na mauri; ena lalo-namo na medu gabedia e hadihodiamu dagadagadia na heheto.

¹⁶Aonega iabina ese gold iabina e hereaiamu; lalo-parara abi-hidina ese silver iabi-hidula e hereaiamu.

¹⁷Kara maoromaoro tauna ena dala avohana na kara dika amo e raka sirimu; ena dala nahuana e tohoamu tauna na sibona e hahemaurimu.

¹⁸Heaḡi ese hahebuatari dalana e lailaiamu; hekokoroku ese moru dalana e lailaiamu.

¹⁹Ogoḡami taudia ida manau ai ba noho be namo; heaḡi taudia ida dadidadi kohudia ba haridia na dika.

²⁰Hereva e kamonaimu tauna ena namo baine bada; Iehova e abidadama heniamu tauna na e moalemu.

²¹Lalona e aonegamu tauna na lalo-parara tauna e gwauraiamu, bona hereva namodia ese lalo-ani e habadaiamu.

²²Aonega na e lohilohiamu maurina, aonega tauna enai; a kavakava na mata-hakani ḡauna, kavakava taudia ediai.

²³Aonega tauna lalona ese ena hereva e hamaoromaorodiamu, bona bibinana na lalo-ani herevadia e hadibadiamu.

²⁴Hereva manadadia na bada-ranuna na heto; gaihona na lauma enai, bona goadana na tau-anina enai.

²⁵Tau ta ese dala ta baine haeroa, dala namona na heto; a ḡau be dokona na mase dalana.

²⁶Ḡaukara tauna na bogana helaoreana e ḡaukara goadamu; ia uduna ese e ha-uraiamu.

²⁷Bonegita tauna ese kara dika e laloa hatamu; ena hereva na lahi ḡaraḡara na heto.