HEREVA LADA-ISIDIA 15:3-11

³Iehova matana ese gabu iboudiai e nenediamu, dika taudia bona namo taudia e itadia taomu.

⁴Mala manadana na mauri auna ta, a mala gageva-gagevana ese dara doko e havaraiamu.

⁵Kavakava tauna ese tamana ena hahediba e dadaraiamu, a sisiba herevadia e hakala henidiamu tauna na lalo-parara tauna.

⁶Kara maoromaoro tauna ena ruma ai na kohu momo, a kara dika tauna ena davari-davari ḡaudia ese ena hekwakwanai e havaraiamu.

⁷Aonega na aonega taudia bibinadia ese e piuamu, a kavakava taudia lalodia na unu asie kara tomamu.

⁸Kara dika tauna ena boubou ḡauna na Iehova ese e ihi-ihiraiamu, a kara maoromaoro tauna ena ḡuriḡuri na ia ese e moalelaiamu.

⁹Kara dika tauna ena dala na Iehova ese e ihi-ihiraiamu, a kara maoromaoro e ḡavaiamu tauna na ia ese e lalokau heniamu,

¹⁰Mata-hakani auka-hereana na dala e rakataniamu tauna enai; sisiba e inai heniamu tauna na baine mase.

¹¹Mase gabuna bona dobu masemase gabuna na hehedina-rarai, Iehova vairanai; matona, taunimanima lalodia na ienai eme hedinarai ḡuḡuru.