HEREVA LADA-ISIDIA 15:19-32

¹⁹Lahedo tauna ena dala na au ḡiniḡini ai e bubunimu, a kara maoromaoro tauna ena dala na dala avohana.

²⁰Aonega merona ese tamana e hamoaleamu, a kavakava tauna ese sinana e dadaraiamu.

²¹Asi darana tauna ese kavakava e moalelaiamu, a lalo-parara tauna na e raka maoromaoromu.

²²Ta se hahealomu negana ai, taunimanima edia lalo-hata ḡaudia asie tubu namonamomu; a hahealo taudia na hoho negana ai na e tubu ḡoevaḡoevamu.

²³Haere maorona ese taunimanima e hamoaleamu, bona nega korikorina ai e gwauraiamu herevana be daka namo!

²⁴Aonega tauna ena dala ese mauri e dae heniamu, mase ena dobu gabuna ai basine kau helaoreana.

²⁵Iehova ese hekokoroku tauna ena ruma e veria garimu, a vabu ena tano hetoadia e gimadiamu.

²⁶Kara dika taudia edia lalo-hadai na Iehova ese e inai henidiamu, a lalo-ḡoevaḡoeva taudia edia hereva na ia ese e moalelaimu.

²⁷Mata-ḡaniḡani tauna ese hekwakwanai e havaraiamu ena ruma taudia ediai, a henitao dikadia e inai henimu tauna na baine mauri.

²⁸Kara maoromaoro tauna ese lalona e hadaia namonamomu ede baine haere toma, a kara dika tauna uduna amo hereva dikadia na e aru lasimu.

²⁹Iehova bona kara dika taudia padadia na daudau, a kara maoromaoro tauna ena ḡuriḡuri ia ese e kamonaiamu.

³⁰Mata diaridia ese tau lalona e hamoaleamu, bona hari namodia ese turia e ha-aukadiamu.

³¹Sisiba herevadia namodia e hakala henimu tauna na aonega taudia bogaragidiai baine noho.

³²Hahediba se abi daemu tauna na sibona e hedadaraimu, a sisiba herevadia e kamonaimu tauna lalona na e pararamu.