HEREVA LADA-ISIDIA 15:16-27

¹⁶Ḡau maraḡi-maraḡina Iehova igari-henina ida ese taḡa badana mai hekwakwanaina ida e hereaiamu.

¹⁷Aniani asi ianimaina lalokau e miamu gabuna ai ese vamu manoka-manokana heinai-hehenina ai e animu na e hereaiamu.

¹⁸Badu haraḡa tauna ese heiri-heiri e havaraiamu, a badu ai e halahemu tauna ese heiri-heiri e haumaia tarimu.

¹⁹Lahedo tauna ena dala na au ḡiniḡini ai e bubunimu, a kara maoromaoro tauna ena dala na dala avohana.

²⁰Aonega merona ese tamana e hamoaleamu, a kavakava tauna ese sinana e dadaraiamu.

²¹Asi darana tauna ese kavakava e moalelaiamu, a lalo-parara tauna na e raka maoromaoromu.

²²Ta se hahealomu negana ai, taunimanima edia lalo-hata ḡaudia asie tubu namonamomu; a hahealo taudia na hoho negana ai na e tubu ḡoevaḡoevamu.

²³Haere maorona ese taunimanima e hamoaleamu, bona nega korikorina ai e gwauraiamu herevana be daka namo!

²⁴Aonega tauna ena dala ese mauri e dae heniamu, mase ena dobu gabuna ai basine kau helaoreana.

²⁵Iehova ese hekokoroku tauna ena ruma e veria garimu, a vabu ena tano hetoadia e gimadiamu.

²⁶Kara dika taudia edia lalo-hadai na Iehova ese e inai henidiamu, a lalo-ḡoevaḡoeva taudia edia hereva na ia ese e moalelaimu.

²⁷Mata-ḡaniḡani tauna ese hekwakwanai e havaraiamu ena ruma taudia ediai, a henitao dikadia e inai henimu tauna na baine mauri.