HEREVA LADA-ISIDIA 12:8-24

⁸Tau ta bae hanamoa ena lalo-maoromaoro dainai, a lalo-gagevagageva tauna na bae dadaraia.

⁹Dagi maraḡi tauna sibona dainai e hekwarahimu na namo, a sibona lohia e hegwauraimu to e hitoloamu tauna na dia namo.

¹⁰Kara maoromaoro tauna ese ena boromakau e bogaia hisimu, a kara dika tauna ena hebogahisi na mai daḡedaḡena.

¹¹Ena tano e ruaiamu tauna ese aniani momo baine abia, a kara asi anidia e karamu tauna na asi darana.

¹²Kara dika tauna ena kohoro aukana e heḡiḡi dobimu, a kara maoromaoro tauna ramuna e hedaimu.

¹³Kara dika tauna na bibinana edia kerere ese bae idoaia, a kara maoromaoro tauna na hekwakwanai amo e roho maurimu.

¹⁴Ena hereva anidia amo tau ta e namo ḡuḡurumu, bona tau ta imana ḡaukarana ese e lou heniamu.

¹⁵Kavakava tauna ena dala na maoro, ia sibona ena ita-ita ai, a aonega tauna ese hahealo herevadia e hakala henidiamu.

¹⁶Kavakava tauna ena badu e hedinarai haraḡamu, a lalo-parara tauna ese heiri-heiri herevadia se lalodiamu.

¹⁷E hereva momokanimu tauna ese hereva maoromaorodia e gwaurai hedinaraiamu, a gwaurai-hedinarai koikoi tauna ese hereva koikoidia mo e gwauraimu.

¹⁸E hereva haraḡa-haraḡamu tauna ena hereva na dare e hegwadamuna heto, a aonega tauna malana ese hahemauri e mailaiamu.

¹⁹Momokani bibinadia na e mia hanaihanaimu, a koikoi malana na asine mia vanahamu.

²⁰Koikoi na dala dikana, e laloa hatamu taudia lalodia ai; a namo e laloa hatamu taudia ese moale e davariamu.

²¹Hahedika ta se kaumu, kara maoromaoro taudia ediai, a kara dika taudia e hekwakwanai momomu.

²²Hereva koikoidia e gwauraimu bibinadia na Iehova ese e inai henidia badamu, a e kara momokanimu taudia na ia ese e moalelaidiamu.

²³Lalo-parara tauna ese ena diba e huniamu, a kavakava taudia ese edia kavakava e gwauraia hedinaraimu.

²⁴E ḡaukara malaka-malakamu tauna baine lohia, a lahedo tauna na bae haḡaukaraia.