HEREVA LADA-ISIDIA 12:1-14

¹Mata-hakani e ura heniamu tauna ese aonega e ura heniamu, a sisiba e inai heniamu tauna na kavakava.

²Tau namona ese harihari-bada na Iehova ena amo e abiamu, a lalo-hadai dikadia tauna na Iehova ese dikana e gwauraimu.

³Kara dika ese tau ta se haginia tutukamu, a kara maoromaoro tauna na ramuna basine heraḡa.

⁴Hahine namona na adavana kwarana ihavavalaina, a adavana e hahemaraiamu hahinena na ia turiana ihamanokana gorerena na heto.

⁵Kara maoromaoro taudia edia lalo-hadai na mamaoro-mamaoro; kara dika taudia edia hahealo na mai hedibaḡanidia.

⁶Kara dika taudia edia hereva na rara ihahebubuna totona e banimu, a kara maoromaoro taudia ududia ese taunimanima e hamauridiamu.

⁷Kara dika taudia na e dareremu bena e pukimu, a kara maoromaoro tauna ena ruma na baine hedai.

⁸Tau ta bae hanamoa ena lalo-maoromaoro dainai, a lalo-gagevagageva tauna na bae dadaraia.

⁹Dagi maraḡi tauna sibona dainai e hekwarahimu na namo, a sibona lohia e hegwauraimu to e hitoloamu tauna na dia namo.

¹⁰Kara maoromaoro tauna ese ena boromakau e bogaia hisimu, a kara dika tauna ena hebogahisi na mai daḡedaḡena.

¹¹Ena tano e ruaiamu tauna ese aniani momo baine abia, a kara asi anidia e karamu tauna na asi darana.

¹²Kara dika tauna ena kohoro aukana e heḡiḡi dobimu, a kara maoromaoro tauna ramuna e hedaimu.

¹³Kara dika tauna na bibinana edia kerere ese bae idoaia, a kara maoromaoro tauna na hekwakwanai amo e roho maurimu.

¹⁴Ena hereva anidia amo tau ta e namo ḡuḡurumu, bona tau ta imana ḡaukarana ese e lou heniamu.