HEREVA LADA-ISIDIA 11:4-22

⁴Badu dinana ai taḡa na asi hahenamona, a kara maoromaoro ese mase amo e hahemaurimu.

⁵Asi ena kerere tauna na ena kara maoromaoro ese ena dala e hamaoromaoroamu, a kara dika tauna na sibona ena dika ese e hahekwakwanaiamu.

⁶Kara maoromaoro taudia na edia kara maoromaoro ese e hamauridiamu, a kara heḡuihegui taudia na edia ura dikadia ese e dabaidia taomu.

⁷Kara dika tauna e masemu negana ai, ena helaro danu e masemu, bona Dirava asie matauraiamu taudia na edia helaro ai e baiamu.

⁸Kara maoromaoro tauna na ena hekwakwanai amo e roho maurimu, bena ia gabuna ai kara dika tauna na hekwakwanai lalonai e vareaimu.

⁹Dirava se matauraiamu tauna ese ia uduna amo ia dekena tauna bema habuaia tari; a aonega dainai kara maoromaoro taudia na e roho maurimu.

¹⁰Kara maoromaoro taudia e noho namonamomu negadia ai, hanua na e moalemu; a kara dika taudia e masemu negadia ai, hanua na e moale hisi daemu.

¹¹Kara maoromaoro tauna ena hahenamo herevadia ese hanua e hanamoamu, a kara dika tauna uduna ese e haheḡiḡia dobimu.

¹²Ia dekena tauna e ihi-ihiraiamu tauna na asi darana, a lalo-parara tauna na asi reḡereḡerena.

¹³Hesivarai loaloa tauna ese hereva hehunidia e hahedinaraimu, a lalo-ihunu tauna ese ḡau e moia taomu.

¹⁴Bema asi ihakaudia, taunimanima na bae keto, a hahealo taudia bema hoho, taunimanima edia noho baine namo.

¹⁵Idau tauna dainai e gwau hamatamu tauna ese hisina baine ani, a gwauhamata unuhetomadia e inai henimu tauna na basine dika.

¹⁶Harihari-bada hahinena na bae matauraia; daḡedaḡe taudia na bae taḡa.

¹⁷Hebogahisi tauna na sibona ena namo e havaraiamu, a daḡedaḡe tauna na sibona e hahehisimu.

¹⁸Kara dika tauna ese dava koikoina e abiamu, a kara maoromaoro e hadoamu tauna ese dava momokanina e davariamu.

¹⁹Kara maoromaoro ai e gini tutuka-tutukamu tauna na baine mauri, a kara dika e ḡavaiamu tauna na baine mase.

²⁰Lalo-gagevagageva taudia na Iehova ese e inai henidia hereamu, a asi edia kerere taudia na ia ese e moalelaidiamu.

²¹Ba diba momokani, kara dika tauna na mata-hakani amo basineroho mauri diba; a kara maoromaoro taudia hari bae roho mauri.

²²Hane-namo asi lalona na gold gadeina boroma kurukuruna ai na heto.