Hechos de los Apóstoles 4:6-27

⁶Anás jɨaɨ bite. Naimɨedɨ Jusiñamui dɨga nanoca ñaɨraɨma. Caifás bite. Juan bite. Alejandro jɨaɨ bite. Nana Jusiñamui dɨga nanoca ñaɨraɨma comɨnɨdɨ ofidɨmacɨ.

⁷Naimacɨ motomo Pedro iaɨmaiaɨ Juan dɨga atɨanona, iaɨmaiaɨmo jɨcanotɨmacɨ: —¿Bu uai dɨga biena fɨnodomɨco?

⁸Jusiñamui Joreño nana Pedro comecɨmo namatajano, Pedro naimacɨmo llote: —Illaɨcomɨnɨ, bie rafuena omoɨmo lloitɨcue.

⁹Tɨsitaitɨmɨe jilluana birui cocomo jɨcanotomoɨ. “¿Buemona naimɨe jillode?” raillanona cocomo jɨcanotomoɨ.

¹⁰Jesucristo uai dɨga jillode. Omoɨ biena uiñuana, ua nana judíuaɨ comɨnɨ biena uiñuana jitaidɨcue. Jesucristodɨ Nazaret imɨe. Naimɨena jai coraɨdomoɨ; ia Jusiñamui naimɨena jai jillotate. Ie jira omoɨ uicomo Jesús muidona tɨsitaitɨmɨe jai benoconi naidaillana cɨodomoɨ.

¹¹Omoɨ jofo fɨnoraɨnɨ isoidomoɨ. Omoɨ jitaiñede nofɨcɨdɨ jɨaɨe nofɨcɨ baɨfemo jai jaide. Jesúdɨ naie nofɨcɨ isoide. Naimɨe rafuena omoɨ jitaiñena jira, naimɨena meinetomoɨ.

¹²Caɨ jeacɨnomona jɨaɨmɨe caɨna jillotanide. Nana enɨruemo ite comɨnɨmona jɨaɨmɨe buna jaca jillotanide. Dama Jesús caɨna jillotarede —llote.

¹³Jacɨruiñeno marefodo llofuetɨiaɨmaiaɨ. Nainomo itɨno iena cacajano, comecɨna facadɨmacɨ: “Abɨna uiñoñedɨiaɨmaiaɨ. Jamai bue isoidɨaɨmaiaɨ”. Ie jira raijicaidɨmacɨ; iadedɨ Jesús llofueoicaigaiaɨmaiaɨna illana uiñotɨmacɨ.

¹⁴Jilloitagamɨe iaɨmaiaɨ dɨga naidaillana cɨodɨmacɨ. Ie jira naimacɨ uai iñede.

¹⁵Naie rafuena siadollena, naie illaɨcomɨnɨ iaɨmaiaɨna baɨ oredɨmacɨ.

¹⁶Coninɨmo jɨcanotɨmacɨ: —¿Nɨese naie iaɨmaiaɨna nɨbaɨitɨcaɨ? Nana Jerusalémo itɨno iaɨmaiaɨ siño rafuena fɨnuana jai fɨdɨdɨmacɨ. Iena janonidɨcaɨ.

¹⁷Jɨaɨe comɨnɨ iena fɨdɨi raillano, Jesús rafuena iaɨmaiaɨ llofuiana rairuitɨcaɨ.

¹⁸Ie mei iaɨmaiaɨna naimacɨ dɨne dane uaidotɨmacɨ. Iaɨmaiaɨmo Jesús rafuena llofueñellena rɨire llotɨmacɨ.

¹⁹Pedro iaɨmaiaɨ Juan dɨga naimacɨ uai ote: —Ie rafuena coco llollena Jusiñamui jitaide. Omoɨ uaina coco ɨɨnoia, Jusiñamui jitailla rafuena fɨnoñeitɨcoco. Cocomo llono. ¿Bu uaina ɨɨnoitɨcoco? ¿Jusiñamui? ¿Omoɨ? Cocomo iese llono.

²⁰Daɨmaiaɨ coco cɨua rafuena llotɨcoco. Daɨmaiaɨ coco cacaja rafuena llotɨcoco —raite.

²¹Iaɨmaiaɨna jacɨnaitajamona, iaɨmaiaɨna jino oretatɨmacɨ. Iaɨmaiaɨna duere fɨnoñedɨmacɨ, nainomo ite comɨnɨ icɨrinaiñellena. Jusiñamuimo nana nainomo itɨnodɨ iobillacɨnona fecadɨmacɨ, tɨsitaitɨmɨe jai jillua jira.

²²Jai jillodɨmɨemo cuarenta años baɨfemo ite. Siño uaido naimɨe jillua jira, comɨnɨ iobidɨmacɨ.

²³Iaɨmaiaɨ jino jailla mei, iaɨmaiaɨ nabaiñɨaɨ dɨne jaidɨiaɨmaiaɨ. Illaɨcomɨnɨ iaɨmaiaɨmo lluana llotɨiaɨmaiaɨ.

²⁴Naimacɨ iena cacajano, Jusiñamuimo damɨe llua isoi jɨɨdɨmacɨ: —Ore Moo, mona fɨnodɨo. Enɨruena fɨnodɨo. Monaillaina fɨnodɨo. Nana naiemo ite rana jɨaɨ fɨnodɨo.

²⁵Caɨ usuma David mɨcorɨna raise uiñotɨcaɨ. Naimɨedɨ ona sedadɨmɨe. Naimɨena bie rafuena o Joreño jaie llotatajamona, naimɨe llote: ¿Bue ñellena Jusiñamui dɨga judíuaɨñedɨno icɨritɨmacɨ? ¿Bue ñellena Jusiñamuimo comɨnɨ taɨnomo comecɨaɨna facadɨmacɨ?

²⁶Illaɨcomɨnɨ ofidɨmacɨ, Jusiñamui dɨga fuirillena. Jusiñamui facaisena iñedɨmacɨ. Cristo facaisena jɨaɨ iñedɨmacɨ llote.

²⁷Naie rafue birui bene suide. Bie naɨraɨmo Herodedɨ, Poncio Pilato dɨga, judíuaɨñedɨno dɨga, judíuaɨ comɨnɨ dɨga, ofide. O mare Jito Jesús facaisena iñedɨmacɨ. Naimacɨmo o oretagamɨe facaisena iñedɨmacɨ.