Hechos de los Apóstoles 26:1-27

¹Cˀia⁴ je² Agripa cˀoi⁴qui³tso²-le⁴ Pablo: Vˀai²ˀnte³-li² nca³ coi⁴no²cjoa⁴ntjai²³ yao³-li⁴. Cˀia⁴ Pablo qui³sco²mi³ ntsja³ tsa³cˀe¹tsˀia⁴ nca³ qui³nchja⁴ntjai² yao³-le⁴:

²Ji³ cho⁴ta⁴ti¹tjon² Agripa jo³ to⁴ma³tsjoa³-na³ nca³ ntˀai⁴-vi⁴ coi³nchja²ntje²³ yao³-na⁴ nqui³xcoin³, xi³ tˀa³tsˀe⁴ je² nca³yi³je³ cjoa⁴ xi³ va¹nqui³-ni³na³ cho⁴ta⁴ judío.

³Nca⁴ ji³ xi³ nqui²sa⁴ nta³ ˀyai³ nca³yi³je³ jo³-sˀin² ve³-ni³ cho⁴ta⁴ judío, cˀoa⁴ nca³yi³je³ cjoa⁴ xi³ fao¹ya³-ni³. Cˀoa⁴-sˀin² tˀian⁴-nai¹³ cjoa⁴nta³ nca³ ti⁴no¹ˀya²-nai¹³ nca³ sin³ nca³ nta³.

⁴Nca³tsˀi³ cho⁴ta⁴ judío tjin¹jin³-le⁴ jo³-sˀin² qui³coa⁴ yao³-na⁴ sa³ˀnta³ nca³ xtia³, jo³-sˀin² sa³ˀnta³ nca³ ti¹tjon² tsa³ca²te⁴jna³ jin³-le⁴ na⁴xi⁴na³nta¹-na⁴ ya⁴ Jerusalén.

⁵Tsa² me³-le⁴ nca³ tsjoa¹ en¹-le⁴ je² cho⁴ta⁴ judío coa²tse³ ve³-na³, nca³ an³ qui³coa⁴ yao³-na⁴ sa³ˀnta³ ti¹tjon² jo³-sˀin² ve³-ni³ je² cho⁴ta⁴ fariseo, je² xi³ nqui²sa⁴ vˀe¹ne²-le⁴ yao³-le⁴ nca³ ve³xcon¹ Ni³na¹.

⁶Ntˀai⁴-vi⁴ i⁴ ti²jna⁴tˀa³-le⁴ cjoa⁴te¹xo³ma³ xi³ tˀa³tsˀe⁴ je² cjoa⁴nta³ xi³ ti²co³ya³-le⁴, xi³ Ni³na¹ qui³tsjoa³-le⁴ tsˀoa³ je² nˀai³jcha¹cjin³-na¹.

⁷Coi³ cjoa⁴nta³ xi³ tjio¹co³ya³-le⁴ xi³ te³jao² jco⁴ya³ ntje⁴-le⁴ nˀai⁴jcha¹cjin³-na¹. Cˀoa⁴-sˀin² tjio¹si¹xa¹-le⁴ Ni³na¹ nca³ntsjai² nca³ ni⁴čhjin³ nca³ ni⁴tjen⁴, nca³ tjio¹co³ya³-le⁴ nca³ sˀe⁴-le⁴ je² cjoa⁴nta³-ve⁴. Cˀoa⁴xin³-le²³ ji³ cho⁴ta⁴ti¹tjon² Agripa nca³ to⁴tˀa³tsˀe⁴ je² cjoa⁴nta³ xi³ ti²co³ya³-le⁴, to⁴coi³² cjoa⁴ tjio¹va¹nqui³-ni³na³ cho⁴ta⁴ judío.

⁸Cˀoa⁴ jon², a¹-ni³ nca³ tsi² ma³cjain¹-si¹ni³no³ nca³ Ni³na¹ si¹cja³ˀa¹ya³-ni³le⁴ cˀen³.

⁹Cˀoa⁴ cjoa⁴qui²xi⁴ ni¹ nca³ an³ cˀoa⁴-sˀin² qui³si³cja³ˀai³tsjen³ nca³ coan³chjen¹-na³ nca³ cˀoa⁴qui³sˀian³ ncjin² cjoa⁴ co²ntran⁴-le⁴ jan³ˀain¹-le⁴ Jesús xi³ Nazaret tsˀe⁴.

¹⁰Cˀoa⁴qui³sˀian³ ya⁴ Jerusalén. A³li² to⁴cˀoa⁴cji³ cho⁴ta⁴-le⁴ Cristo qui³sca³nia³ ya⁴³ nto⁴ya¹. Cˀoa⁴-sˀin² qui³tsjoa³ˀnte²-na³ je² cho⁴ta⁴ti¹tjon²-le⁴ na⁴ˀmi³. Cˀia⁴ nca³ qui³ni²cˀen³, cˀoa⁴-sˀin² qui³tsjoa³ en¹-na⁴ co²ntran⁴-le⁴ nca³ je².

¹¹Cjai¹nca³ to⁴ncjin² cˀa³ tsa³ca¹-le⁴ nca³qui³jnta² ja⁴ya³ ntˀia³ sinagoga, sa³ˀnta³ cjoa⁴nˀion¹ qui³sˀin³-le⁴ nca³ nchja⁴ˀaon³-le⁴ Ni³na¹. A³li² to⁴cˀoa⁴cji³ jti³ coan³-na³ xi³ co²ntran⁴ tsˀe⁴. Ña³qui³ cˀoa⁴-sˀin² qui³ co²ntran⁴-le⁴ nta³ tsa² sa³ˀnta³ jña³ nca³ xin² na⁴xi⁴na³nta¹.

¹²Cˀia⁴ nca³ cˀoa⁴-sˀin² qui³tjen⁴nqui³ co²ntran⁴-le⁴, quia³ ya⁴ Damasco. Yˀa³ orden jña³ nca³ tsa³cˀe¹ne²-na³ je² cho⁴ta⁴ti¹tjon²-le⁴ na⁴ˀmi³.

¹³Ji³-lai²³ cho⁴ta⁴ti¹tjon², cˀia⁴ nca³ nchi³sen³, tsa³ˀve³ ya⁴³ ntia⁴² jnco³ lˀi¹ xi³ ncˀa³jmi³ ji³nčhoa³-ni³ xi³ nqui²sa⁴ to⁴fa³te³ ma³tsen³ cao⁴-ni³ tsa² tsˀoi¹. Ña³qui³ coan³ˀi³sen³ntai³-na³ cao⁴ je² xi³ tjen⁴coa⁴.

¹⁴Qui³tsao³tsa³cjan¹-ni³jin⁴ nca³tsˀi³-jin⁴. Qui³nčhˀoe³-le⁴ jnco³ xi³ qui³nchja⁴-na³ nca³ en¹ hebrea: Saulo, Saulo, a¹-ni³ nca³ an³ ˀmi³tjen⁴nqui³ co²ntran⁴-si¹ni³nai¹³. To⁴si⁴qui²ˀoain³ yao³-li⁴, tsa² coi⁴njon¹-lai⁴ ya¹ xi³ yao³xcon¹ cji³.

¹⁵Cˀia⁴ cˀoa⁴qui³xin³-le⁴: ˀya¹ ni¹³ ji³, Señor. Cˀoa⁴ je² Nai³-na¹ qui³tso²: An³-nia¹³ Jesús xi³ ti³ˀmi³tjen⁴nqui³ co²ntran⁴-nai¹³.

¹⁶To⁴nca³ ti⁴so¹tjain⁴, ti⁴sen⁴ntoi³. To⁴coi³ xa¹-ni³ nca³ an³ ti²si³cˀa³tsen³-le²³ yao³-na⁴, nca³ tsjoa³-le²³ xa¹ nca³ ji³ si⁴xa¹-nai¹³, cˀoa⁴ testigo-na⁴ coain⁴ xi³ tˀa³tsˀe⁴ je² cjoa⁴ xi³ ca²ˀyai³, cˀoa⁴-ti⁴ testigo-na⁴ coain⁴ xi³ tˀa³tsˀe⁴ je² cjoa⁴ xi³ sˀa⁴ si³cˀa³tsen³-le²³ yao³-na⁴.

¹⁷Cˀoa⁴-sˀin² cˀoa³sje³ntjai²-le²³ xi³ tˀa³tsˀe⁴ cho⁴ta⁴ na⁴xi⁴na³nta¹, cˀoa⁴ xi³ tˀa³tsˀe⁴ cho⁴ta⁴ xi³ li² judío-jin², je² xi³ sca³ni³jin³-le²³ ntˀai⁴-vi⁴,

¹⁸jme¹-ni³ nca³ cˀoa⁴-sˀin² cho¹ˀai²nqui³-si¹ni³ xcon⁴. Ca²ta³vi³tjo³-ni³ cjoa⁴njion²-le⁴, ca²ta³ma³ˀi³sen³-le⁴, ca²ta³vi³ncha³xin²-le⁴ je² nca³nˀion¹-le⁴ Satanás, ca²ta³nčhoa¹tˀa³-le⁴ Ni³na¹, jme¹-ni³ nca³ cˀoa⁴-sˀin² cha⁴tˀa³-si¹ni³le⁴ je¹-le⁴, cˀoa⁴ sˀe⁴cjoa⁴tjao²-si¹ni³le⁴ ja⁴jin³-le⁴ je² xi³ je³coan³tsje³ nca³ ma³cjain¹-le⁴ xi³ tˀa³tsˀe⁴.

¹⁹Coi³ cjoa⁴, ji³ cho⁴ta⁴ti¹tjon² Agripa, li²coi³ qui³si³ta²ja³-le⁴ yao³-na⁴ je² xi³ tsa³ˀve³, xi³ ncˀa¹ ja³ˀai³-ni³na³.

²⁰To⁴sa³ nca³ ti¹tjon² qui³nchja²ya³jin³-le⁴ je² xi³ tjio¹ ya⁴ Damasco, cˀia⁴ je² xi³ tjio¹ ya⁴ Jerusalén, cˀoa⁴ nca³qui³jnta² na³nqui³ Judea, cao⁴ nca³tsˀi³ cho⁴ta⁴ xi³ li² judío-jin², nca³ ca²ta³si¹cˀa³ntjai²ya³ cjoa⁴fa³ˀai³tsjen³-le⁴, ca²ta³nčhoa¹tˀa³-le⁴ Ni³na¹. Cˀoa⁴ ca²ta³sˀin¹ je² xi³ cjoa⁴nta³ ˀmi²-le⁴², xi³ va³quin²-le⁴ je² xi³ je³qui³si³cˀa³ntjai²ya³ cjoa⁴fa³ˀai³tsjen³-le⁴.

²¹To⁴tˀa³tsˀe⁴ je² cjoa⁴ xo⁴tjin¹-vi⁴ je² cho⁴ta⁴ judío qui³tsoa³-na³ ya⁴³ yo⁴nco⁴. Coan³me³-le⁴ nca³ si⁴²cˀen³-na³.

²²To⁴nca³ Ni³na¹ tsa³ca³sen¹cao⁴-na³. To⁴jo³ cˀoa⁴ti²sˀian³ sa³ˀnta³ ntˀai⁴-vi⁴. Cˀoa⁴-sˀin² ti²tsjoa³-le⁴ en¹-na⁴, nta³ tsa³ cho⁴ta⁴ xi³ tjen⁴nqui³, nta³ tsa² cho⁴ta⁴ti¹tjon². A³li²jme³-sa³ xi³ cja⁴ˀai¹ xi³ xian³, to⁴je² nca³yi³je³ cjoa⁴ xi³ je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ cao⁴ Moisés cˀoa⁴qui³tso² nca³ cˀoa⁴coan⁴.

²³Je² cˀoa⁴qui³tso² nca³ je² Cristo cjoa⁴ˀa³ cjoa⁴ñˀain³, cˀoa⁴ nca³ je² ti¹tjon² cjoa⁴ˀa¹ya³jin³-ni³le⁴ cˀen³. Cˀoa⁴-sˀin² coa⁴co²-le⁴ cjoa⁴ˀi³sen³ cho⁴ta⁴ na⁴xi⁴na³nta¹ cao⁴ cho⁴ta⁴ xi³ li² judío-jin².

²⁴Cˀia⁴ nca³ Pablo cˀoa⁴-sˀin² qui³nchja⁴ntjai² yao³-le⁴, je² Festo nˀion¹ qui³nchja⁴: Sca¹-la⁴li² Pablo, to⁴coi³-la⁴ cjoa⁴chji⁴ne⁴-li⁴ si¹sca¹ya³-ni³li².

²⁵To⁴nca³ Pablo qui³tso²: A³li² sca¹-jin²na³, ji³-lai²³ Festo, xi³ cˀoa⁴-sˀin² to⁴ncˀa³ ti³jnai³. Ña³qui³ en¹qui²xi⁴ xi³ nchja²³, cˀoa⁴ nta³ tjin¹coan³.

²⁶Je² cho⁴ta⁴ti¹tjon² ve³ nca³yi³je³ cjoa⁴-vi⁴. Cˀoa⁴-ti⁴ ma³nˀion¹coan³ nca³ fa²coa⁴ nca³ je². Li²coi³ si³cja³ˀai³tsjen³ nca³ tji¹ˀma³-le⁴ nca³yi³je³ je²-vi⁴, nca³ tsi² tsa² to⁴jña³-jin² ˀncho²ño³ cˀoa⁴coan³.

²⁷A³ ma³cjain¹-li² cho⁴ta⁴ti¹tjon² Agripa, tˀa³tsˀe⁴ je² xi³ qui³tso² je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. ˀve³-nia¹³ nca³ ma³cjain¹-li².