Hechos 9:3-13

³Miihˉ gaˊ hnøøˈ llooy˜ Damasco ja̱ˉ, niꜙ saꜙ gaꜙläꜙliihꜚ gyihꜗ maˊ gaꜙjyooꜗ ko̱o̱ˉ jeˉ tøˉjlë̱ë̱ˉ ñihꜗ nëˊ kiyhˈ jeeˊ ngooyˈ ja̱ˉ.

⁴Hiꜙ gaꜙta̱yhꜘ hwaꜗ. Jeeˊ ja̱ˉ gaꜙnuuyꜘ gaꜙhlëëhꜘ ja̱a̱ˉ dsaˉ hi̱ˉ gaꜙjähꜘ: —Saulo, Saulo, ¿heˉlaˈ hñaaˉ hohꜘ kya̱a̱hˊ jnäꜘ?

⁵Heˉja̱ˉ gaꜙngɨɨꜘ Saulo juuˈ kihꜗ hi̱ˉ gaꜙhlëëhꜘ heꜘ: —¿Hi̱i̱ˉ hneˉ dsaˉñʉʉhˉ? —gaꜙsɨɨyhꜙ. Heˉja̱ˉ gaꜙjähꜘ hi̱ˉ heꜘ: —Jnäꜘ heꜘ Jesús hi̱ˉ gaꜙlloohꜘ hñaaˉ hohꜘ kya̱a̱hˊ. Heˉ jmeehˊ hñaahˈ baˊ hneˉ naˉ, heˉ hahˉ kinꜙ jwëˈ heˉ ta̱a̱hnꜙ hneˉ.

⁶Peerꜙ goyhꜙ hiꜙ jlä̱ä̱yꜙ, gaꜙjäyhꜘ: —Dsaˉjø̱ø̱hˈ kya̱a̱nꜙ, ¿heeˉ naˉ hnoohˉ jmeenˋ? Heˉja̱ˉ gaꜙjähꜘ Jesús sɨɨyhꜙ: —Nooˉ, goˉheꜘ taꜙ jeeˊ jwɨɨˉ naˉ. Jeeˊ naˉ jmeeꜗ dsaˉ juuˈ heeˉ naˉ gaꜙtë̱ë̱hꜘ jmeehˈ.

⁷Dsaˉ hi̱ˉ gaꜙnääꜗ kya̱a̱hˊ Saulo heꜘ gaꜙta̱a̱yhˋ jëë˜ dsa̱yhꜙ. Gaꜙnuuꜘ bihꜗ gaꜙhlëëhꜘ pero saꜙ gaꜙjë̱ë̱yꜗ niꜙ ja̱a̱ˉ.

⁸Maˊ gaꜙnooˉ Saulo jeeˊ maˊ kya̱a̱yꜗ ja̱ˉ, hnøøyꜗ maˊ jëëyˈ, pero moꜙsoꜙ gaꜙläꜙjnäꜘ mɨˈnëyˊ. Heˉja̱ˉ dsaˉ baˊ naˉhä̱ä̱ˉ gooˉ Saulo naˊjä̱ä̱yˉ taꜙ Damasco.

⁹Jeeˊ ja̱ˉ gaꜙjä̱yꜘ tʉʉˊ läꜙji̱i̱hˈ gaꜙtëꜘ hnëˉ jmɨɨˊ, saꜙ chaˉ heˉ gaꜙkuhˉ gaꜙhɨ̱yhꜗ niꜙ miihˉ.

¹⁰Damasco ja̱ˉ maˊ gyaˈ ja̱a̱ˉ discípulo kya̱a̱ꜗ Jesús, hi̱ˉ che̱e̱ˉ Ananía. Dio gaꜙmiꜙjnääˉ kihꜗ Ananía mahꜗ gaꜙsɨɨyhꜙ: —Ananía. Heˉja̱ˉ gaꜙngɨɨyꜘ kiyhꜗ: —Hi̱i̱ꜚ jnäꜘ laˉ Dsaˉjø̱ø̱hˈ kya̱a̱nꜙ.

¹¹Heˉja̱ˉ gaꜙjähꜘ Dio sɨɨyhꜙ: —Goˉhë̱ë̱ˈ, gwaˉ taꜙ jwëꜘ heˉ che̱e̱ˉ Ko̱ˉdsooꜘ. Gwaˉ chaˊnehꜙ kihꜗ Juda. Ja̱ˉ jwɨɨyhꜘ: “Maˉjan˜ hlëëhnˊ kya̱a̱hˊ Saulo, dsaˉñʉʉhˉ hi̱ˉ cha̱a̱ˉ Tarso.” Hi̱ˉ heꜘ gyaꜗ ngɨɨꜙ kihꜗ jeeˊ ja̱ˉ.

¹²Maˉmiˉjnäänˈ hneˉ kihꜗ Saulo heˉ gohˈ goˊkyehˉ goohˉ nëˊ kiyhˈ mahꜗ läꜙjnäꜘ mɨˈnëyˊ —gaꜙjähꜘ Dio.

¹³Heˉja̱ˉ gaꜙjähꜘ Ananía: —Dsaˉjø̱ø̱hˈ kya̱a̱nꜙ, johꜘ ji̱i̱h˜ saꜙ maˉnuunꜗ chaˉ juuˈ hñaaˉ dsëꜗ dsaˉñʉʉhˉ heꜘ. Johꜘ heˉ hlɨɨhˈ saꜙ maˉjmeeyꜘ jwɨɨˉ Jerusalén, maˉjmeeyhꜙ dsaˉ hi̱ˉ naˉjngëëˈ kya̱a̱hꜗ.