Hechos 9:2-34

²Topʉ esaro tiquiro ojoari pũrine siniahye pahia pʉhtorore. Ohõ saha niahye: —‍Damasco cjẽ wʉhʉsepʉ judio masa mari buheye wʉhʉsepʉ Jesu yequinare ʉmʉare, numiare boca sagʉ, tiquinare ñehe dʉhte, Jerusalẽpʉ ne cãhtagʉtja. Ti wʉhʉsepʉ ijiyequinare yʉhʉ ñeheatire papera pũre ohoya, ni siniahye Saulo pahia pʉhtorore.

³Ti pũre ne tuhasa, waha, Damasco cahagã tiquiro esagʉ̃ waro ʉhmʉanopʉ asi sitedoque dijioahye tiquirore.

⁴Sa asi sitedoque dijiogʉ̃ta tiquiro yehpapʉ bora quehe saro, yahuducugʉ̃ tʉhoahye: —‍¿Saulo, dʉhsegʉ mʉhʉ yʉhʉre ñano yeajari? nino ca tahye.

⁵—‍¿Pʉhto, noa boro ijiajari mʉhʉ? niahye Saulo pehe. —‍Yʉhʉ Jesu, mʉhʉ ñano yenohrigʉ ijiaja. Mʉhʉ yʉhʉ mehna usuagʉ yʉhʉre yʉhtieragʉ, mʉhʉ basita ñano yʉhdʉre, niahye Jesu Saulore.

⁶Tiquiro sa nigʉ̃ Saulo cue nanare, ohõ saha ni sinituahye: —‍¿Pʉhto, dʉhse yʉhʉ yegʉ̃ cahmeajari mʉhʉ? niahye Saulo. Tiquiro sa nigʉ̃ ohõ saha niahye Jesu: —‍Wahcãdʉcaya mʉhʉ. Si macapʉ wahaya. Ti macapʉ mʉhʉ esagʉ̃ ti maca cjʉ̃no mʉhʉ yeatire yahurota mʉhʉre, niahye Jesu Saulore.

⁷Tiquiro sa nigʉ̃ Saulo mehna cjẽna pehe tiquiro yahuducuye dihitare tʉhoahye. Jesu pehere ihñedahye. Tiquiro sa wahagʉ̃ ihñañe, cueye, tiquina yahuducu masiedahye.

⁸Sa yero Saulo yehpapʉ cuñariquiro wahcãdʉca, tiquiro ihñagʉ̃ tiquiro caperi bajuerahye. Sa ye tiquina tiquiro omocare ñehe, Damascopʉ tʉã cãa wahahye tiquirore.

⁹Sa yero tiquiro ihtia deco waro ne ihñeda, ihyera, ne sihniedahye.

¹⁰Sa ye Jesu buheriquiro Anania wame tiriquiro Damascopʉ ijiahye. Sa yero Jesu bajuahye Ananiare. Sa bajuaro pisuahye tiquirore: —‍¿Anania, ijiajari mʉhʉ? niahye Jesu. —‍Ijiaja, ni, yʉhtiahye Anania tiquirore.

¹¹Tiquiro sa nigʉ̃ Jesu yahuahye tiquirore: —‍Poto wame tiri mahapʉ wahaya. Topʉ wahagʉ Juda ya wʉhʉpʉ Tarso cjʉ̃nore Saulo wame tiriquirore macaña. Tiquiro Cohãcjʉ̃re sinino niaga.

¹²Sa yero quehẽno saha tiquiro ihñarire ihñano niaga topʉre. Ohõ saha ijiyere ihñano niaga tiquiro: Mʉhʉ omocare tiquiro bui duhu peo, tiquiro caperi quehnoa wahagʉ̃ ihñano niaga tiquirore bajuarire, niahye Jesu Ananiare.

¹³Tiquiro sa nigʉ̃ tʉhoro Anania ohõ saha niahye: —‍Pʉhto, tiquiro mʉhʉ yequinare quehnoañequinare Jerusalẽ cjẽnare ñano yeñohti. Peyequina masa yʉhʉre sa ni yahuri.

¹⁴Sa yero ohõre tiquiro ijipihtiyequina mʉhʉre cahmeñequinare peresu yero taro niñohti. Pahia pʉhtoa tiquirore sa ye dutiñohti, niahye Anania Jesure.

¹⁵Tiquiro sa nigʉ̃ Jesu pehe yahuahye tiquirore: —‍Tiquiro Saulo pehe yʉhʉ beseriquiro ijire. Tiquiro yee buheyere peye macari cjẽnare, Israe masa ijieyequinare, tiquina pʉhtoare, Israe masa gʉ̃hʉre buherota. Sa yegʉ wahaya mʉhʉ.

¹⁶Sa yero peye tahari yeere tiquiro yeri buhiri tiquiro ñano yʉhdʉrota. Tire tiquirore masigʉ̃ yegʉtja, niahye Jesu Ananiare.

¹⁷Tiquiro sa nidi bato Anania pehe waha, esa, Saulo tiquiro ijiri wʉhʉpʉ sajãhye. Sajã sa, tiquiro omocare Saulo bui duhu peo, yahuahye tiquirore. —‍Yʉhʉ acayʉ Saulo, mari pʉhtoro Jesu pehe mahapʉ mʉhʉre bajuariquiro yʉhʉre ohori, mʉhʉ caperire ihña dutiro, Espíritu Santore mʉhʉre cʉo dutiro, tiquiro dutiriro sahata mʉhʉre ye dutiro, ni yahuahye Anania Saulore.

¹⁸Tiquiro sa nigʉ̃ta tiquiro caperire wahi nʉtʉri saha bajuyere tiquiro caperire pahna dijiagʉ̃ ihñahye Saulo. Tiquiro sa ihña tuhasari bato wahcãdʉca sagʉ̃ apequiro pehe wame yeahye tiquirore.

¹⁹Sa yero tiquiro ihyari bato pagʉ tutuariquiro wahahye. Sa ye meheñe decorigã Damasco cjẽna Jesu yequina mehna ijiahye Saulo.

²⁰Sa yero ti pjereta tiquiro judio masa buheye wʉhʉsepʉ Jesu yere buheahye masare. Jesu Cohãcjʉ̃ macʉno tiquiro ijiyere yahuahye Saulo.

²¹Tiquiro sa yahugʉ̃ ihñañe ijipihtiyequina tiquirore tʉhoyequina acʉaa wahahye. —‍Ahriquiro Cohãcjʉ̃ yequinare Jesure cahmeñequinare ñano yee tiriquiro ijire. Sa yero tiquiro tiquinare ñehe, dʉhte, pahia pʉhtoare oho duari jimedi. Sa ye duaro ohõpʉre ahtari jimedi tiquiro, niahye masa tiquirore tʉhoyequina.

²²Tiquina sa ni tʉhotuepegʉ̃ta Saulo cuero marieno tutuaro mehna buhe dʉcahye. Judio masare Damasco cjẽnare quehnoano yahuahye. “Ahriquiro Jesu potota Cristo marine yʉhdʉoriquiro ijire”, tiquiro ni yahugʉ̃ tiquina pehe tiquirore “Ni mehono nine ahriquiro”, ni masiedahye tiquirore.

²³Sa ye peye decori bato judio masa tiquirore wejẽ duaye, tiquina basi yahuducuahye.

²⁴Sa yero Saulo tiquina wejẽ duagʉ̃ masiahye tiquiro basi. Sa ye ti maca cjẽ sopecaharire decopʉre, ñamipʉ gʉ̃hʉre cohtee tiahye tiquirore wejẽ duaye.

²⁵Tiquina sa wejẽ duagʉ̃ ihñañe ñamipʉ Saulo buheyequina tiquirore pʉhʉro pajiri pʉhʉdupʉ ne sãa, ti maca cjã sahrĩno behero pehepʉ duhu dijioahye tiquirore.

²⁶Sa ye Saulo Jerusalẽpʉ esaro, topʉ Jesu yequina mehna tiquiro iji duamahye. Tiquiro sa iji duepegʉ̃ta tiquina tiquirore “Jesu buheriquiro ijierare ahriquiro”, niñe, tiquirore cue niahye.

²⁷Tiquina sa cuepegʉ̃ta Bernabé pehe tiquirore ne cãhye Jesu cũriquina cahapʉ. Sa yero Saulo mahapʉ Jesure tiquiro ihñarire, Jesu mehna tiquiro yahuducurire, Damascopʉ cuero marieno Jesu yere tiquiro buhe dʉcarire yahuahye Bernabé pehe.

²⁸Tiquiro sa ni yahuri bato Saulo tiquina mehna sajãno, Jerusalẽpʉ tiquina mehna ijie tiahye.

²⁹Sa yero tiquiro cuero marieno Jesu yere buhee tiahye. Sa yero tiquiro judio masare Jesu yere yahu yʉhdʉdʉcaro niahye. Tiquina judio masa griego masa yere yahuducuyequina ijiahye. Sa ye Saulo tiquiro sa yahu yʉhdʉdʉcari buhiri tiquina tiquirore wejẽ duamahye.

³⁰Tiquina sa wejẽ duagʉ̃ ihñañe, Saulo mehna cjẽna Jesu yequina pehe tiquirore Cesareapʉ ne duhti cãa wahahye. Topʉ tiquirore siho ijiducume Tarsopʉ ohoahye tiquirore.

³¹Sa ye ijipihtiropʉ, Judea yehpapʉ, Galilea yehpapʉ, Samaria yehpapʉ Cohãcjʉ̃ yequina quehnoano ijie tiahye. Ti pjere ne masa ñano yera tiahye tiquinare. Sa ye quehnoano buheahye tiquina. Sa ye tiquina Cohãcjʉ̃re cua pesaro ihñahye. Espíritu Santo tiquinare tiquiro yedohogʉ̃ tiquina pehe masa peyequina wahahye.

³²Sa ye Pedro ijipihtiye macaripʉ waharo, Jesu yequina Lida maca cjẽna cahapʉ gʉ̃hʉre esahye tiquiro.

³³Topʉ esaro Enea wame tiriquirore boca sahye. Enea tini masieniquiro ijiro, ocho cʉhmari waro cuñari cahsero mehna cuñae tiahye tiquiro.

³⁴Sa yero Pedro pehe tiquirore ohõ saha niahye: —‍Enea, Jesucristo mʉhʉre quehnoa wahagʉ̃ yere. Wahcãdʉcaya. Mʉhʉ eõ tu cuñari cahserore quehnoña, niahye Pedro tiquirore. Tiquiro sa nigʉ̃ta tiquiro wahcãdʉca wahaa wahahye.