Hechos 9:17-39

¹⁷Jaskáa ja Saulo iká xobonko Ananías kaa iki. Jikixon ja Saulo mamepastaanan yoia iki: —Nokon wetsa Saulo, ja bain kaaitian miki pikoibata non Ibonra ea raanke, jakiribi min oinnon ixon itan mia ja Diossen Shinanya imanon ixon —akin.

¹⁸Jaskáatianbi, jawen beronkoniax yapa xaka keskábo maana iki. Maanatianbi jakiribi oinnax, bautizameeta iki.

¹⁹Jaskata pekáo, jawékiaxon moa koshi biribaa iki. Jaskatax jawetii nete kamanpari, ja Damascoainoa joi akaibo betan iká iki.

²⁰Jainxonra, ja jain tsinkíti xobonkoxonbo, moa Saulon, Jesús riki Diossen Bake akin jato joi yoia iki.

²¹Jato jaskáaitian oinnax, jatikaxbi ratetax neskákana iki: —¿Nato jonimarin ja Jerusalénhainoa Jesús rabiaibo jato masá tenemapachoai? ¿Jaribimarin ja Damascoainoa joi akaibo yatanxon, *sacerdotebaon koshiiba jato boyantana? —ikibo.

²²Ikaxbi Saulon koshi shinanyaxon joi yoikin jeneyamaa iki Jesús riki Cristo iki ixon jato onanmakin. Jato jaskáabi, ja Damascoain jakana judíobaon moa jaskashamaanti onanyamakana iki.

²³Moa jawetii netebires jato jaskáaitian, judíobo tsinkíkana iki, jaskáaxon Saulo reteti shinanni.

²⁴Ikaxbi jan onanna iki, yaméyabi neten ja jema xepotiainxon já retenoxon manakana.

²⁵Jaskákankenbi, ja jaonmea onanaibaon yamébi ani tasakan nanexon, ja jema katea chike pekao apakexon jabámakana iki.

²⁶Jatian Saulo Jerusalénhain nokotax, joi akaibo betan tsinkita iki. Ikaxbi jatikaxbi jaki rakékana iki, joi akaimara ibirai ixon shinannax.

²⁷Jaskákanainbi, Bernabékan ja Diossen joi yoiti raanaboiba ioa iki, boxon Bernabékan jato yoia iki: Ja Saulon Damascoain kakin non Ibo baimea oinna itan jabé yoyo ika. Jaskáaxon ja Damascoainoabo ja Jesúskiriti iká joibo koshi shinanyaxon jato yoia iki.

²⁸Jaskatax Saulo jato betan Jerusalénhain baneta iki, jain ikaxa kikin koshi shinanyaxon, Ibon janenko jatíbiain jato joi yoii nikátiai.

²⁹Jainoax ja griego join yoyo ikai judíoboribi, jato ikonhamakaskin koshi shinanyaxon jato joi yoikatitai, ikaxbi jabora já retekasires ikana iki.

³⁰Jatian ja joi akaibaon jaskara onanxon, Saulo Cesareanko iokana iki. Jainoabiribi Tarsoain tekikin raankana iki.

³¹Jaskatax jatíbi ja Judea main ikana, jainoax Galilea betan Samaria main iká joi akaibo, moa jakonbires itan jaton shinanbo moa koshi ikana iki. Non Ibon keena keskábores moa jakana iki. Jaskatax ja Diossen Shinanman jato akinna ja joi akaibo kaikana iki.

³²Jatian Pedro jatíbi joi akaibo oinni kakátiaira, Lidanko nokota iki, jain ikana joi akaiboribi oinni.

³³Jainoara Eneas janeya joni nokoa iki, chantoyona ikax niti atipanyamaax, moa posaka baritia bachin rakata.

³⁴Jaskara ikenbira, Pedron neskaa iki: —Eneas ramara mia Jesucriston benxoai, wenixon ja min rakáti benxoawe —akin. Jaskáatianbi Eneas wenita iki.

³⁵Jatian weniketian, ja Lidanko ikáboyaxonbi, Sarónhain ikábaon jatíxonbi non Ibo ikonhakana iki.

³⁶Ja netebaonribira, Jope janeya jemanko iká iki westíora joi akai ainbo, jawen jane Tabita, Griego join aká iki Dorcas. Ja ainbora jakon jawékibores akí jakátiai, jainxon ja jawékinin maxkáyoraaboribi jato akinkatitai.

³⁷Ja netebaonribira isinax, Dorcas mawata iki. Jatian chokaxon ja kikin bochiki xobo chité ikainko bokana iki.

³⁸Ja Jope jema iká iki, jain Pedro iká Lida jema ochóma; jain iketian ninkáxon rabé joni raankana iki, ishton Jopenko jonon ixon yoiti.

³⁹Jatian Pedro jato betan kaa iki, nokóketian ja jain yora akana chiteain iokana iki. Jatianra ja benomaayabo jatikaxbi, winiananbi ja Pedro katei tsamákana iki, jaskáaxon oinmakana iki, ja jato betan inontian Dorcasnin jato axonpachoai kotonboyabi chopabo.