Hechos 9:15-40

¹⁵Ekꞌu ri Qanimajawal xubꞌiꞌij che: —Jat chilaꞌ rukꞌ, ma Riꞌin nuchaꞌom rire chaꞌ kuꞌana jun waj chak re keꞌek che uqꞌalajisaxik ri nubꞌiꞌ chikiwach ri winaq na e ta aj judiꞌabꞌ, chikiwach ri e taqanelabꞌ y chikiwach ri e aj Israel.

¹⁶Yey kankꞌut kꞌu che, janipa ri kꞌaxkꞌolil chirajawaxik kikꞌow wi rire ruma kutzijoj ri nubꞌiꞌ —xuchix ri Ananías.

¹⁷Ri Ananías xeꞌek kꞌut y xok pa ri ja pa kꞌo wi ri Saulo. Xuya kꞌu ruqꞌabꞌ puwiꞌ y xubꞌiꞌij che: «Hermano Saulo, ri Qanimajawal Jesucristo, ri xuqꞌalajisaj ribꞌ chawach chupa ri bꞌe pa at petinaq wi, inutaqom lo awukꞌ chaꞌ kat-tzuꞌn tanchik y kakꞌul kꞌu ri Santowilaj Ruxlabꞌixel ri Dios» xcha che.

¹⁸Chupa kꞌu laꞌ la joqꞌotaj, kꞌo ri pachaꞌ soloꞌt xtzaq che ruwach ri Saulo y xtzuꞌn tanchik. Tekꞌuchiriꞌ, xyaktajik y xukꞌul ri bautismo.

¹⁹Ekꞌuchiriꞌ xwaꞌ ri Saulo, xkꞌojiꞌ tanchi uchuqꞌabꞌ y xkꞌojiꞌ jujun qꞌij kukꞌ ri kikojom rubꞌiꞌ ri Cristo chilaꞌ pa ri tinamit Damasco.

²⁰Tekꞌuchiriꞌ, ri Saulo xujeq katzijon puwi ri Cristo chupa taq ri sinagogas, jewaꞌ ri kubꞌiꞌij: «Ri Jesús e Ukꞌajol ri Dios» kachaꞌ.

²¹Konoje ri ketaw re lik kakam kanimaꞌ che y kakibꞌiꞌij: «¿Na e ta nebꞌa achi waꞌ ebꞌuternabꞌem rukꞌ kꞌax ri kikojom rubꞌiꞌ ri Cristo chilaꞌ Jerusalem; yey kꞌuninaq ne wara re kebꞌuyut bꞌi y kebꞌuꞌyaꞌa pakiqꞌabꞌ ri nimaq e aj chakunel pa Rocho Dios?» kechaꞌ.

²²Pero ri Saulo jalan katajin unimarik ruchuqꞌabꞌ puwi ri kutzijoj. Ekꞌu raj judiꞌabꞌ ejeqel chiriꞌ Damasco xsach kinaꞌoj che ma ri Saulo kuqꞌalajisaj chikiwach: Ri Jesús e ri Cristo, Ruchaꞌoꞌn lo ri Dios.

²³Ikꞌowinaq chi kꞌu ukꞌiyal qꞌij, raj judiꞌabꞌ xkiꞌan tzij junam chikiwach re kakikamisaj ri Saulo.

²⁴Pero waꞌ xretaꞌmaj ri Saulo. Ekꞌo kꞌu ri kichajim chipaqꞌij chichaqꞌabꞌ taq ri okibꞌal re ri tinamit chaꞌ kakichap ri Saulo y kakikamisaj.

²⁵Ruma kꞌu riꞌ, ri kikojom rubꞌiꞌ ri Cristo e laꞌ chaqꞌabꞌ xkiqasaj bꞌi ri Saulo chwi ri tapia chupa jun nimalaj chakach.

²⁶Echiriꞌ xopon ri Saulo Jerusalem, lik xraj kaqibꞌ kukꞌ ri kikojom rubꞌiꞌ ri Cristo. Pero konoje rike lik kakixiꞌij kibꞌ che, ma na kakikoj taj we paqatzij wi ri Saulo ukojom chi rubꞌiꞌ ri Cristo.

²⁷Ekꞌu ri Bernabé xukꞌam bꞌi y xuꞌyaꞌa chikiwach ri e taqoꞌn re ri Cristo. Xutzijoj kꞌu chike suꞌanik ri Saulo xril uwach ri Qanimajawal pa bꞌe y xchꞌaꞌt rukꞌ. Yey xutzijoj chike puwi ri tzijonik xuꞌan ri Saulo chupa rubꞌiꞌ ri Jesús chilaꞌ Damasco yey rukꞌ unimal uchuqꞌabꞌ xuꞌan waꞌ.

²⁸Ekꞌu ri Saulo xkanaj kukꞌ chiriꞌ Jerusalem y xerachbꞌilaj pa taq kebꞌek wi.

²⁹Lik na kuxiꞌij ta ribꞌ katzijon chupa rubꞌiꞌ ri Qanimajawal. Kachꞌaꞌt kꞌu puwi ri Jesús kukꞌ raj judiꞌabꞌ ri kechꞌaꞌt pa ri chꞌaꞌtem griego; ruma kꞌu laꞌ, rike kakitzukuj suꞌanik kakikamisaj.

³⁰Echiriꞌ ri hermanos xketaꞌmaj waꞌ, xkikꞌam bꞌi ri Saulo kꞌa Cesarea y chiriꞌ kꞌut xkitaq bꞌi chupa ri tinamit Tarso.

³¹E taq kꞌu ri kikojom rubꞌiꞌ ri Cristo pa ronoje ri luwar re Judea, re Galilea y re Samaria, xekubꞌiꞌ chi utz ma na jinta chi ri keternabꞌex rukꞌ kꞌax. Rike kꞌo xiꞌin ibꞌ kukꞌ chwach ri Qanimajawal. Katajin kꞌu kikꞌiyarik yey yaꞌom kichuqꞌabꞌ y nimarisam kikꞌuꞌx ruma ri Santowilaj Ruxlabꞌixel ri Dios.

³²Xaloqꞌ kꞌu ri Pedro katajin rikꞌowik pa taq riglesias, xopon kukꞌ ri kikojom rubꞌiꞌ ri Cristo pa ri tinamit Lida.

³³Chilaꞌ kꞌu riꞌ xuꞌriqa jun achi Eneas rubꞌiꞌ, yey e wajxaqibꞌ lo junabꞌ riꞌ kꞌo chwa uwarabꞌal ma xuꞌan sik.

³⁴Ekꞌu ri Pedro jewaꞌ xubꞌiꞌij che: «Eneas, ri Qanimajawal Jesucristo katukunaj. Chatyaktajoq y chayijbꞌaꞌ rawarabꞌal» xcha che. Chupa kꞌu laꞌ la joqꞌotaj ri Eneas xtakꞌiꞌik.

³⁵Konoje kꞌu ri ejeqel chupa ri tinamit Lida y pa taq ri luwar re Sarón xkilo ri Eneas kunutajinaq chik; y ruma kꞌu waꞌ, xkiya kibꞌ puqꞌabꞌ ri Qanimajawal.

³⁶Chupa ri tinamit Jope kꞌo jun ixoq ukojom rubꞌiꞌ ri Cristo, Tabita rubꞌiꞌ. (Pa ri chꞌaꞌtem griego “Dorcas” kecha che.) Waꞌ wiꞌxoq lik uyaꞌom ribꞌ che uꞌanik ri utz y lik kebꞌutoꞌ ri nibꞌaꞌibꞌ.

³⁷Chupa taq laꞌ la qꞌij ri Dorcas xuchap yabꞌil y xkamik. Ekꞌuchiriꞌ xchꞌaj rucuerpo, xqꞌatisax chikaj pa ri kaleꞌ ja.

³⁸Ekꞌu ri hermanos e kꞌo Lida xkito kꞌo ri Pedro pa ri tinamit Jope, yey waꞌ xa naqaj kꞌo wuloq. Xekitaq kꞌu bꞌi kaꞌibꞌ achijabꞌ chaꞌ kebꞌeꞌelaj che ri Pedro, jewaꞌ kakibꞌiꞌij: «ꞌAna ko la riꞌ, peta la wara qukꞌ yey mamayin la.»

³⁹Xyaktaj kꞌu bꞌi ri Pedro y xeꞌek kukꞌ. Echiriꞌ xoponik, xkꞌam bꞌi chikaj pa ri kaleꞌ ja. E taq ri e malkaꞌnibꞌ xkisut rij ri Pedro. Konoje waꞌ kebꞌoqꞌik y kakikꞌut taq ri kꞌul y ri kiqꞌuꞌ xuꞌan ri Dorcas echiriꞌ kꞌa kꞌo kukꞌ.

⁴⁰Ekꞌuchiriꞌ, ri Pedro xtaqan che konoje kebꞌel bꞌi. Xuxukubꞌaꞌ kꞌu ribꞌ y xuꞌan orar. Tekꞌuchiriꞌ, xutzuꞌ ri kaminaq, y jewaꞌ xubꞌiꞌij che: «¡Tabita, chatyaktajoq!» xchaꞌ. Ekꞌu riꞌ ri Dorcas xujaq ruwach; y echiriꞌ xrilo kꞌo ri Pedro chiriꞌ, asu xtzꞌuyiꞌik.