Hechos 8:5-33

⁵Tej rebejṉga laa Felipe. Siini nez te guedx Samaria. Ro'c basule'ni xtidx Dios. Räjpni: ―Jesús najc Crist nani cabäjztu jiääd.

⁶Ro'c bachagsa' rebejṉ bacuadiajgreni rextidx Felipe, bahuiizareni redzunro, remilagwr nani bejn Felipe.

⁷Gaii bejṉ yu' beṉdxab neṉ lastooreni. Che gunibee Felipe guirii rebeṉdxab lastoo rebejṉga, guredxa' rebeṉdxabga, dxejcti biriireni neṉ lastoo rebejṉga. Yu'za xhidajl bejṉ nani digacdiru guiniib, yu'za reni rajc ni'reni, ṉaareni. Con xcäḻrnibee Jesucrist basiajc Felipe guiraa rebejṉga.

⁸Sa'csi gujc si'c, bibalazduxh guiraa rebejṉ neṉ guejdxga.

⁹Guyu' te niguii ni laa Simón neṉ guejdxga. Bisieedni bejnni xhidajl redzuun yäḻbidxaa, basgueeni rebeṉguejdxga. Bidxeloduxh rebeṉguejdx lojni. Räjpni lo rebejṉ rutru chu stee bejṉ ni najc maazru beṉro lojni.

¹⁰Luxh guiraa rebejṉ, rebiuux, rebeṉgool, rebeṉrajp, rebeṉproob bacuadiajgreni xtidx bidxaaga, räjpreni: ―Laani rajpni yälrnibee xten Dios.

¹¹Xchero basgueeni rebejṉ, bidxelojreni rextzunyäḻbidxaani. Guiraa rebejṉ huililajz xtiidxni.

¹²Dxejcti baluii Felipe xcuent xcäḻrnibee Dios, näjza xcuent Jesucrist. Xhidajl rebeṉguejdxga huililajz rediidx nani gunii Felipe. Dxejcti birobnisreni, niguii näjza gunaa.

¹³Nägajcza Simón huililajz rediidxga dxejc gurobniszani. Dxejc guyunäj Simón Felipe. Che bahuii Simón lo redzunro, remilagwr nani cayujn Felipe, bidxeloduxh Simón.

¹⁴Che biejn diajg reapost ni yu' guedx Jerusalén huililajz rebeṉ Samaria xtidx Dios, baxhaḻreni Pedr näjza Juan ro'c.

¹⁵Che bidzujṉ guiro'preni guejdxga, gunabreni lo Dios xcuent rebejṉ ni huililajzga te gudeed Dios Sprit Dxan xtenni lojreni,

¹⁶sa'csi gajd Sprit Dxan xten Dios jiädläjz neṉ lastooreni. Che huililajzreni, gurobnistisreni te gucbee rebejṉ chuni'c najc rexpejṉ Jesucrist.

¹⁷Dxejc batzuub Pedr näjza Juan ṉaareni yejc tejga renani ahuililajz xtidx Dios, dxejc badeed Dios Sprit Dxan xtenni biädläjzni neṉ lastooreni.

¹⁸Che bahuii Simón biädläjz Sprit Dxan xten Dios lastoo rebejṉ ni batzuub reapost ṉaani yejcreni, rlajz Simón nudeedni meel loj reapost,

¹⁹räjpni lojreni: ―Coḻguniidx yäḻrnibee loä te si'cza gudzubä ṉaä yejc rebejṉ, te jiu' Sprit Dxan xten Dios neṉ lastooreni.

²⁰Dxejcti räjp Pedr lojni: ―¡Sunitloj xmeellu con luj! Xho gunlu xhigab siilu Sprit Dxan xten Dios nani rudedxlia' Dios.

²¹Digacdi gunlu dzuun ni riennu, sa'csi xhet laadi najc lastoolu nez loj Dios; yu' dojḻ neṉ lastoolu.

²²Basie'ch lajzlu, badzucaj rexhigab guijdx xtenlu. Guredx-gunab lo Dios, top susiäjḻ lajz Dios xtojḻlu ni bejnlu neṉ lastoolu.

²³N̲aj narä nanä ruguilazduxhlu, luxh runduxhlu xhigabguijdx.

²⁴Dxejcti räjp Simón lo guiro'preni: ―Coḻnab loj Dios xcuentä te na'c sacä si'cni caniitu.

²⁵Che gulujxti bijreni diidx xcuent ni bahuilojreni bejn Jesucrist, che gulujx basule'reni xtidx Jesucrist loj rebeṉ Samaria, gubisacreni Jerusalén.

²⁶Dxejcti biääd te xangl Dios, räjpni lo Felipe: ―Huij lo nezyuj ni ṟii guedx Jerusalén, ni rij nez guedx Gaza. Nezyujga rdejd lo reyubijdz.

²⁷Sä'ti Felipe. Che bidzujṉni lo nezyujga, bidxaagni te dade' ni siääd nacióṉ Etiopía. Najcni te eunuco, najczani xcuxhtis reina Candace. Laani rgucheeni guiraa xmeel reinaga. Biääd dade'ga guedx Jerusalén te sagajṉni Dios.

²⁸Siädbisacni lajdxni. Sobga'ni neṉ te gaṟe't saruduxh, cayoḻni xtidx Isaías, nani bacuaa xtidx Dios agujc xchero.

²⁹Dxejcti räjp angl xten Dios lo Felipe: ―Gubig cuä' gaṟe'tga, guninäj dade'ga.

³⁰Che gubig Felipe cuä' gaṟe'tga, biejn diajgni cayoḻ dade'ga rextidx Isaías. Dxejcti räjp Felipe lojni: ―¿La racbeelu ni caj lo guijtz nani cayoḻlu, ä?

³¹Dxejcti räjp dade'ga lojni: ―¿Xho gacbeäni palga rut gusule'dini loä? Sas räjp dade'ga lo Felipe chä'pni neṉ gaṟe'tga.

³²Cadro cayoḻ dade'ga neṉ guijtz ni caj xtidx Dios rnii scree: Di xiil cuedxa' che rinä bejṉni cadro guetni; dxitis raa xiil che ruhuajrenini. Si'c te xiil najc niguiire, xhet rniidini mase rusacsíduxhrenini.

³³Basacsíduxhrenini. Reguxhtis ni niujn yäḻguxhtisni xhet laliidi bejnreni. Xhet si'cti nunyäjḻ gunreni. ¿Xho guiniinu yu' xpejṉni? Ni abagu'trenini. Diruni guibajṉ lo guedxliuj.