Hechos 8:5-33

⁵Ri Felipe e jun chike. Rire xopon chupa jun tinamit re Samaria y xujeq katzijon puwi ri Cristo chikiwach ri winaq.

⁶Waꞌ wa winaq xa jun kiꞌanom che utayik janipa ri kukꞌut ri Felipe, yey kakitzutzaꞌ taq ri kꞌutubꞌal re ruchuqꞌabꞌ ri Dios kuꞌan chikiwach.

⁷Ma lik e kꞌi ri e kꞌo pakiqꞌabꞌ itzelilaj uxlabꞌixel, yey waꞌ wa itzelilaj uxlabꞌixel kesikꞌinik kebꞌel bꞌi chike ri winaq. Y e kꞌo ukꞌiyal jetzꞌ y sik xekunutajik.

⁸Ruma kꞌu riꞌ waꞌ, taq ri winaq re ri tinamit lik kekiꞌkotik.

⁹Kꞌo kꞌu jun achi aj chiriꞌ Simón rubꞌiꞌ. E ri petinaq loq rire aj qꞌij chupa la tinamit; lik kebꞌusok ri winaq e aj Samaria ma kuꞌan che ribꞌ pachaꞌ lik kꞌo uwach.

¹⁰Konoje kꞌu ri winaq chinimaꞌq chichꞌutiꞌq, lik kakita ri kubꞌiꞌij ri Simón y jewaꞌ kakibꞌiꞌij: «E unimal uchuqꞌabꞌ ri Dios ri kꞌo rukꞌ waꞌchi» kechaꞌ.

¹¹Lik kakikoj ri kubꞌiꞌij, ma lik xex wi ebꞌusokom rukꞌ ri qꞌijonik kuꞌano.

¹²Pero echiriꞌ xkita ri Utzilaj Tzij kutzijoj ri Felipe chwi rutaqanik ri Dios y chwi ri Qanimajawal Jesucristo, xkikojo y jekꞌuriꞌlaꞌ achijabꞌ yey ixoqibꞌ xkikꞌul ri bautismo.

¹³Ekꞌu riꞌ waꞌchi Simón xukoj rubꞌiꞌ ri Cristo y xukꞌul ne ri bautismo. Xujeq kꞌu riꞌ karachbꞌilaj ri Felipe y lik kakam ranimaꞌ che taq ri kꞌutubꞌal re ruchuqꞌabꞌ ri Dios karilo kuꞌan ri Felipe.

¹⁴Yey ri e taqoꞌn re ri Cristo e kꞌo Jerusalem, echiriꞌ xkito ri e aj Samaria xkikoj ri ubꞌiꞌim lo ri Dios puwi ri Cristo, xekitaq bꞌi ri Pedro y ri Juan chilaꞌ Samaria.

¹⁵Ekꞌuchiriꞌ rike xebꞌoponik, xkijeq kakiꞌan orar pakiwi ri aj Samaria ri kikojom chi rubꞌiꞌ ri Cristo chaꞌ rike kakikꞌul ri Santowilaj Ruxlabꞌixel ri Dios.

¹⁶Ma ri Ruxlabꞌixel ri Dios kꞌamajaꞌ kaqaj puwi junoq chike, xew kikꞌulum ri bautismo pa rubꞌiꞌ ri Qanimajawal Jesucristo.

¹⁷Yey echiriꞌ ri Pedro y ri Juan xkiya ri kiqꞌabꞌ pakiwiꞌ, xkikꞌul ri Santowilaj Ruxlabꞌixel ri Dios.

¹⁸Ekꞌu ri Simón xrilo suꞌanik ri tikawex kakikꞌul ri Ruxlabꞌixel ri Dios echiriꞌ ri taqoꞌn kakiya ri kiqꞌabꞌ pakiwiꞌ. Xubꞌiꞌtisij kꞌu puaq chike,

¹⁹jewaꞌ xubꞌiꞌij: —Yaꞌa alaq chwe riꞌin laꞌ la jun chuqꞌabꞌ, chaꞌ jelaꞌ xa tobꞌ china puwiꞌ kanya wi ri nuqꞌabꞌ, kukꞌul ri Santowilaj Ruxlabꞌixel ri Dios —xchaꞌ.

²⁰Ekꞌuchiriꞌ, ri Pedro jewaꞌ xubꞌiꞌij che: —Sach na uwach rapuaq junam awukꞌ riꞌat, ma e chawach riꞌat, xa rukꞌ puaq kaloqꞌ rusipanik ri Dios.

²¹Yey riꞌat na jinta kꞌana awe che wa chak kaqaꞌano ma rawanimaꞌ na jusukꞌ ta chwach ri Dios.

²²E uwariꞌche, chatzelej atzij chwach ri Dios che waꞌ wa amak y chatzꞌonoj che Rire kukuy amak. Laj kukuy amak che la na utz taj xachꞌobꞌo.

²³Ma e kanwil riꞌin, lik uꞌanom kꞌax akꞌuꞌx chiqij y lik at yutum ruma ri mak —xcha ri Pedro che.

²⁴Ri Simón xukꞌul uwach: —Lik chꞌaw ko alaq panuwiꞌ chwach ri Qanimajawal chaꞌ na kankꞌulumaj ta kꞌana wa xbꞌiꞌij alaq chwe —xchaꞌ.

²⁵Ekꞌuchiriꞌ ri Pedro y ri Juan kitzijom chi taq ri xkilo y xkita che ri Jesús y kiqꞌalajisam chi ri Utzilaj Tzij re ri Qanimajawal, xetzelej Jerusalem. Yey xaloqꞌ kꞌu xebꞌikꞌow chupa taq ukꞌiyal aldeas ke raj Samaria, xkitzijoj ri Utzilaj Tzij.

²⁶Kꞌo jun ángel re ri Qanimajawal xchꞌaꞌt rukꞌ ri Felipe, jewaꞌ xubꞌiꞌij che: «Chayijbꞌaꞌ awibꞌ y jat jewaꞌ pa sur. Chamaja bꞌi ri bꞌe kel Jerusalem, ri kaqaj pa ri tinamit Gaza» xchaꞌ. (Wa bꞌe kikꞌow pa taq luwar katzꞌintzꞌotik.)

²⁷Xyaktaj kꞌu ri Felipe y xumaj bꞌi ubꞌe yey pa ri bꞌe xuꞌriqa bꞌi jun achi “eunuco”. Waꞌ waꞌchi lik kꞌo uwach ma puqꞌabꞌ rire kꞌo wi ronoje rubꞌeyomal ri Candace. Ekꞌu waꞌchi xopon Jerusalem chaꞌ kuloqꞌnimaj uqꞌij ri Dios,

²⁸yey e riꞌ katzelej pa rutinamit. Tzꞌul kꞌu chupa jun kareta y karajilaj Ruchꞌaꞌtem ri Dios tzꞌibꞌital kan ruma ri qꞌalajisanel Isaías.

²⁹Ekꞌu ri Ruxlabꞌixel ri Dios xubꞌiꞌij che ri Felipe: «Chatqibꞌ pana che la jun kareta y chatbꞌin putzal» xchaꞌ.

³⁰Echiriꞌ ri Felipe xqibꞌ apanoq, xuto rachi e karajilaj ri tzꞌibꞌam kan ruma ri qꞌalajisanel Isaías y jekꞌuwaꞌ xutzꞌonoj che: —¿Kamaj la usukꞌ la katajin la che rajilaxik? —xcha che.

³¹Rachi xukꞌul uwach: —¿Suꞌanik kanmaj usukꞌ we na jinta junoq kaqꞌalajisan chwe? —xcha che. Y xelaj kꞌu che ri Felipe chaꞌ kaqꞌan pa ri kareta y katzꞌuyiꞌ rukꞌ.

³²Ekꞌu ri karajilaj che Ruchꞌaꞌtem ri Dios e waꞌ: Xkꞌam bꞌi e pachaꞌ juna bꞌexex re kakamisaxik; e pachaꞌ juna qꞌapoj bꞌexex na kachꞌaw ta kꞌenoq echiriꞌ kasokax ri rismal; jekꞌuriꞌlaꞌ rire na jinta kꞌana xubꞌiꞌij.

³³Xꞌaniꞌ che pachaꞌ lik na jinta uwach; y echiriꞌ xqꞌat tzij puwiꞌ, xꞌan ri lik na e ta usukꞌ che. ¿China taq kꞌu ri tikawex kakipetebꞌej lo che rire? Na e jintaj, ma xqꞌat uqꞌij che ruwachulew. E waꞌ ri katajin che rajilaxik.