HECHOS 8:17-33

¹⁷Huajca Pedro huan Juan pejque quintalilíaj inimax ininpani huan nopa taneltocani quiseliyayaj Itonal Toteco ipan iniyolo.

¹⁸Huan Simón quiitac quenicatza nopa tayolmelahuani quintaliliyayaj inimax ininpani masehualme huan quiseliyayaj Itonal Toteco, huan nojquiya quinejqui quichihuas. Huajca quincuitahuilti tomi Pedro huan Juan para ma quimacaca nopa chicahualisti.

¹⁹Quinilhui: ―Techmacaca ni chicahualisti nojquiya para nihuelis nijtalis nomax ipan ten hueli masehuali huan yaya quiselis Itonal Toteco.

²⁰Huan Pedro quiilhui: ―Ma Toteco mitztzontamilti ihuaya motomi pampa timoilhuía huelis tijcohuas nopa cati san Toteco hueli temaca quej se nemacti.

²¹Amo teno tijpiya ihuaya ni tequit pampa amo cuali moyolo iixpa Toteco.

²²Huajca xijpata moyolo huan xijcahua nopa tajtacoli. Huan xijtajtani Toteco ica nochi moyolo sinta huelis mitztapojpolhuis ica cati timoyolilhuijtoc ipan moyolo,

²³pampa niquita tahuel ticualancamictinemi huan tajtacoli moilpitoc ipan moyolo.

²⁴Pero Simón quiilhui Pedro: ―Xijtajtanica Toteco ma nechtapojpolhui para amo nechtzontamiltis quej tiquijtojtoc.

²⁵Huan nopa tayolmelahuani tepohuilijque icamanal Toteco huan teilhuijque cati quiitztoyaj. Huan teipa tacuepilijque ipan altepet Jerusalén. Huan ipan ojti quipanotiyajque miyac pilaltepetzitzi ipan estado Samaria huan nepa nojquiya tayolmelahuayayaj icamanal Toteco.

²⁶Teipa ajsico se ilhuicac ejquet ten Toteco huan quiilhui Felipe: “Xiya ica tatzinta hasta nopa ojti cati quisa Jerusalén huan pano ipan nopa huactoc tali huan yahui hasta Gaza.”

²⁷Huajca Felipe nima quistejqui. Huan nopona quipanti se eunuco tacat cati elqui se ihueyi tequitica nopa sihua tanahuatijquet Candace ipan tali Etiopía. Yaya cati quimocuitahui nochi itomi nopa hueyi tali. Nopa tacat yajtoya Jerusalén para quihueyimatis Toteco,

²⁸huan tacuepiliyaya ital ipan se cuacarro cati cahuayojme quitilanayayaj. Huan ipan ojti quipojtiyahuiyaya nopa amat cati quiijcuilo nopa tajtolpanextijquet Isaías huejcajquiya.

²⁹Huan Itonal Toteco quiilhui Felipe: ―Xiya, xijnechcahuiti nopa cuacarro.

³⁰Huan Felipe quinechcahui huan quicajqui quipohuayaya iama Isaías. Huan Felipe quitatzintoquili: ―¿Tijmachilía cati tijpohua?

³¹Huan nopa tacat quiilhui: ―Amo huelis nijmachilis sinta amo aqui nechixtomilis. Huan quiilhui Felipe ma tejco huan ma mosehui ihuaya ipan icuacarro.

³²Huan yaya quipohuayaya ipan Icamanal Toteco campa quiijtohua: “Tacame quihuicase quej quihuicaj se borrego para quimictise. Huan quej se pilborregojtzi amo tzajtzi quema masehualme quiximaj, nojquiya amo teno quiijtos quema quihuicase para quimictise.

³³Quipinahualtise huan amo quichihuilise cati xitahuac. Amo aqui huelis camanaltis ten iteipan ixhuihua, pampa amo quinpiyas. Quimictise huan yaya quisas ipan totaltipac.”