Hechos 8:13-34

¹³Ne axt néru Simónqui güeldilaaz, ax brubnisbɨ chiy aquɨtru gulelaaztib Liby. Ne bdxalob pur iralote de milagrɨroo ni rguiaab run Liby.

¹⁴Chi gucbee de apóstol ni nuu Jerusalén dec de bniety Samaria agüeldilaazdeb xtiidx Dios, ax bxiaalddeb de apóstol ni lá Bed cun Juany ruy.

¹⁵Chi bdzɨndeb ruy, gunaabdeb lo Dios pur de bniety Samaria ni agüeldilaaz xtiidx Dios par cueznédeb Spíritu Sant.

¹⁶Te pur zeczi nic tubydeb gady cueznétideb Spíritu Sant, sino que brubnistisdeb pur nombrɨ xte Dad Jesús.

¹⁷Chiyru bzubnaa Bed cun Juany quia irate de bnietqui par guleznédeb Spíritu Sant.

¹⁸Chi guná Simóny gulezné de bnietqui Spíritu Sant pur ni bzubnaa de apóstol quiadeb, ax baanbɨ pur nideedbɨ mɨly de apóstol,

¹⁹raipbɨ laadeb: —Né naa gulnɨɨdx guelrnabeec te par chi izubnaa quia tutix bniety, ax néza laab cueznéb Spíritu Sant.

²⁰Chiy raipy Bed laab: —Liú cun tod xmɨliu nitlo pur ni runu xgab dec zelee siiu guelrnabee ni rguaad Dios.

²¹Liú niclɨ quɨt riáldti gúnu zec ni cadxannɨ, te pur niclɨ quɨt zenuutiu xnez Dios.

²²Bialaaz pur de mal ni abaaniu. Chiy gurɨdx gunaab lo Dios ta gúnny perdón liú pur de mal xgab xtenu.

²³Te nare racbiia dec quesentiand racnalaazu, ne zeczi rnabee duld loo.

²⁴Chiy cuaby Simóny: —Gulnaab lo Dios pur nare, te par nic tuby zec ni aguniit quɨt tedtia.

²⁵Chi gulull bee de apóstol xtiidx Jesucrist, ne guniideb xtiidx Dios lo de bnietqui, chiy biecquideb par Jerusalén. Ne irate de guɨdx xte Samaria rut gudeeddeb, btɨɨchzadeb de didxzaac xte Jesucrist.

²⁶Chiguld, tuby ánglɨ xte Dios raipny Liby: —Quegüe nez sur, nez ni zé desdɨ Jerusalén axtquɨ nez rut lá Gaza, nez rut ná púrpac yiubiz.

²⁷Chiyru bdiia Liby ax zéb. Deni zéb lo nez, bgáab tuby eunuco, tuby bniety nguiu ni zá lo naciony Etiopía. Bnietqui ná tuby bɨnroo xte gubiernɨ, laab náb tesorer xte Candace, reina xte Etiopía. Bniety nguiuqui güeb Jerusalén par güetob Dios.

²⁸Chiy anunezbɨ par zíab ladxbɨ, zubbɨ lo arred zaac xtenbɨ cayuuldbɨ lo librɨ xte profet Isaías.

²⁹Chiy raipy Spíritu Sant Liby: —Quegüebinuu arredre.

³⁰Chi gubigax Liby, bindiagbɨ cayuuld bnietqui lo librɨ xte profet Isaías, ax gunabdiidxbɨ: —¿Ta racbeebiu xi zelo ni cayuuldbiu?

³¹Bnietqui cuaibbɨ: —¿Xólesa gacbiia xi zeloni, ne rutell gady quixtee luaa? Chiy raipbɨ Liby yaaipbɨ lo arredqui, ax guri cuesaadeb.

³²Bnietqui cayuuldbɨ lo xquiits Dios rut rnii: Zec tuby llíily, güenédeb laany rut quindebny. Ne quɨt xi guniitiny, zecpacza chi anágaa tuby llíily nez lo de ni aigua laam.

³³Deni bsacsidebny, bcuadeb niac guelgurtisy zec ni riáldny. An, ¿túlesa inii tú de rac lliinny? Te pur abdzɨcádebny lo guɨchliuré.

³⁴Bnietqui raipbɨ Liby: —Gunilaa nare, ¿tú pur canii profetquɨ? ¿Ta pur lagac laab, o pur stuby bniety?