Hechos 8:1-35

¹Jatian ja Esteban retekanaitian, Sauloribi jain iká iki jato shinanman akini. Ja netenribira, ja Jerusalénhainoa joi akaibo jato ramiakin peokana iki. Jaskáakanara, jatikaxbi ja Judea main, itan Samaria mainko jabati janbiskana iki. Ikaxbi ja raanabores boyamakana iki.

²Jatíribi Diossakin shinannai jonibaonra, Estebanin yora miinkana iki. Jabora akonbireskin jaon masá shinanni, winikana iki.

³Jatian Saulonbiribi, joi akaibo keyokasa iki. Xobotiibi jikixonbo, benboyabi ainbobo yataanan niniboxon jato cárcel meran niamaa iki.

⁴Ikaxbi ja Jerusalénhainoax jabati bokanabaonra, jain bokanainkobo, Diossen joi jato yoibokana iki.

⁵Jatian Felipenbiribi Samaria main iká westíora jeman jabati kaxon, Cristokiriti iká joi jato yoia iki.

⁶Jatianra jonibo tsinkíkatitai, jatíxonbi kikinhakin ninkákatikanai Felipen joi yoiaitian, jatonbishaman ja ratéti jawékibo jan akaitian oinxon.

⁷Icha joni yoshin naikiabo jato benxoaa iki. Jatian jato meranoax jokoni yoshinbo sion ika iki. Jainxon icha chantobo itan nitikomaboribi jato benxoaa iki.

⁸Jaskáaketian oinnax, ja jemamea jonibo ikonbiresi rarokana iki.

⁹Ikaxbi jain iká iki westíora joni Simón janeya. Ja joni iká iki, moabi yobé ixon, kikin joni keská itaanan ja Samaria jonibo jato parana.

¹⁰Jatíbi ja kikinbo, itan kikinmashokobaonbira kikinhakin ninkáxonkanai iká iki; jaskati ikana iki: “Nato joni riki ja ‘Diossen atipana ani koshi akin akanai’ ”, ikibo.

¹¹Jatian ja jonira, joi ninkáxonkatikanai, jawen yobekan basibires jato paranbea iketian.

¹²Ikaxbi ja Felipen, Diossen ikinaton jati joi, itan Jesucristokiriti iká jakon joibo jato yoia ikonhaxa, benboyabi, ainbobo, bautizamekana iki.

¹³Jatianra Simónmanribi ikonhaa iki. Jaskatax Diossen janenko nashia iki. Jainxon Felipe chibankin peoa iki, ratéti jawékibo, itan ja oinxon onanti jawékibo jan akaitian oinxon.

¹⁴Jatian ja Jerusalénhain iká raanabaon, moa Samaria jonibaon Diossen joi ikonhakana ninkáxon, Pedro betan Juan jain raankana iki.

¹⁵Jatian nokóxon, Samariainoa joi akaiboki orankana iki, Diossen Shinanya ikanon ixon,

¹⁶westíoraxonbi Diossen Shinan bikanamapari iketian. Jabo ikana iki, non Ibo Jesussen janenko jato nashimakanares.

¹⁷Jaskáaxon Pedro betan Juanman, jato mamepasa iki. Jaskáara ja Diossen Shinan bikana iki.

¹⁸Jatian ja raanabaon jato mamepasketian joniboki Diossen Shinan joá oinxon, maromakanon ixon jato Simonman yoia iki:

¹⁹—Earibi ja atipana koshi menikanwe, enribi jato mamepasa, jaskáakinribi Diossen Shinan bikanon —akin.

²⁰Jatian Pedron neskaa iki: —¡Ja kopímabi Diossen meniai jawéki, koríkinin maroti shinanna kopí, ja min koríki betanbi manotiain katanwe!,

²¹jawekeskaxonbira min biti yamake. Diossenra onanke, mia jakonma shinanya.

²²Ja min jakonma shinan jenexon, Dios yokáwe. Atibetin min jaskáakin jakonma shinannabo mia moa shinanxonyamakin.

²³En mia oinna riki, mia sináti shinanyares, ja jakonma shinanmanra moa miaaresa iki —akin.

²⁴Jatian Simonman yoia iki: —Ja min yoia keská ea jawebi winóyamanon, ja Ibo ea yokáxonwe —akin.

²⁵Jatian moa jatonbi oinna jawékibo yoixon, itan jato Diossen joi yoia pekáo, Pedro betan Juan jakiribi Jerusalénhain boribakana iki. Bokinbi Samaria main iká jemabotiibi joi yoibokana iki.

²⁶Jainxon ja Ibon ángelnin, Felipe yoia iki: “Wenítaanan, Jerusalénhainoax, ja surhori iká bain kaax, Gazanko katanwe”. Ja baira, jain joni jayamaa mananbi shitabini kaa iki, akin.

²⁷Jaskaa kakin, Etiopíainoa eunuco baimea nokoa iki. Jara iká iki joni koshi, koríki koirani Etiopíainoa apo ainbo betan teetai. Jara Jerusalénhain Dios rabii katanax, moa joribai iká iki.

²⁸Moa jakiribi jawen jeman kakin, jawen carron yakáxon, Isaíassen kirika yoyo aabaina iki.

²⁹Jatian Diossen Shinanman Felipe yoia iki: “Ja carroki ochómakaintanwe”, akin.

³⁰Jaskáa ishto kaax ochómakainxon Felipen ninkata iká iki, Isaíassen wishani kirika yoyo aki. Jaskáakai ninkáxon yokata iki: —¿Minki ninkatai ja min yoyo akai? —akin.

³¹Jatian ja Etiopeainoa jonin neskaa iki: —¿Jawekeskaxonki tson yoiamabi en onantiki? —akin. Jaskáaxonra Felipe yoia iki, nanetax já patax yakáti.

³²Ja yoyo akai kirika meran wishaa iká iki neskara: “Carnero retenoxon bokanai keskáakinra, bokana iki. Ja carnero bake rapéstekanabi jawe iamai keskatira, jawebi yoyo iamaa iki.

³³Ramiaxonra noibatiayonkana iki, ikaxbira jan jato jakonmaayamaa iki. Atikeskabiakinra ayamakana iki; jara bakeomabobi iká iki. Jaskákinra retekana iki, moa nato main yamanon ixon”, iki iká.

³⁴Jatian ja Etiopeainoa jonin, Felipe yokata iki: —Eapari yoiwe ¿Tsoa iká yoikin, ja *profetanin yoinirin? ¿Jabi iká yoii, iamax wetsa joni iká yoii ikarin? —akin.

³⁵Jaskáa ja yoyo awana wishá meranoabi Felipen yoikin peoa iki, ja Jesús yoii iká jakon joi onantiakin yoixon onanmaa iki.