Hechos 8:1-26

¹Saulo mzak wen mbit xaa Steb. Leeka mbizh zee mzelo re xaa mrenal re xaa Jesús, xaa yezh Jerusalén, zee rese xaa Jesús mxonn nya naz re yezh cheen Judea nu zrol xaa nya naz yizhyo Samaria, nebse re xaa mkayaa yalnabeyy lo Jesús mlake.

²Lak xaa ngwii lo Dios, ngwa sebyo Steb nu mbinn doo xaa lo xaa.

³Nu lee Saulo mrenal re xaa Jesús, nu axta nya xaa garli re xaa, nu nzhe xaa xaabyi nu ngwnaa nu nchep xaa xaa lozhyib.

⁴Nu lee rese xaa Jesús, xaa mroo Jerusalén, nzaa xaa kwent xtizh Dios kwaan nyaadno yalnaban, rese pa nzha xaa.

⁵Lip le tub xaa nzho lo re xaa ba, nu ngwa xaa yezh kwaan le Samaria. Naz baa mzaa xaa kwent cheen Jesús.

⁶Nu rese xaa yezh nkenzha re kwaan nzhé Lip, nu ngwii xaa lo re kwaan gro kwaan nle xaa.

⁷Kwaane nak kwaan mle xaa: msekwen xaa zyen doo xaa kwaan nzho mbi mal lextoo, nu gorna lee mbi mal nroo lextoo re xaa mbazhe xaa, nu noka msekwen xaa zyen xaa nyent mod gun nu xaa mdeen,

⁸kwaanzee nyakdoola re xaa yezh.

⁹Per zee nzho tub xaabyi, xaa le Simón, xaa ngok wezh yilo nu mkade xaa re xaa yezh Samaria, nu mle xaa mod tub xaa non doo.

¹⁰Nu rese myet, xaawin nu xaa gox, ngwii lo xaa nu nzhon xaa xtizh xaa, nu mbezh re xaa: —Xaa ne nkano yalnabeyy mod cheen Dios.

¹¹Nu nzhon re xaa kwaan mbezh xaa, nel xche doo mkade xaa re xaa yezh lo re kwaan gro kwaan mle xaa.

¹²Per gorna lee Lip nzaa kwent cheen wdizh chul cheen Jesucrist lo xaa, nu cheen pa nabeyy Dios rop Jesucrist, xaabyi nu ngwnaa mzelo ngwii lo Dios nu mrubnis xaa.

¹³Nu axta noka Simón, xaa ngok wezh mzelo ngwii lo Jesús nu mrubnis xaa, nu snee mreke xaa tich Lip, nu ndedyall xaa ngwii xaa lo re yalgro kwaan nlu lo xaa.

¹⁴Leezha mzhin diizh lo re xaa mkayaa yalnabeyy lo Jesús lee re xaa Samaria mkayaa wdizh chul cheen Dios, zee mxaal re xaa Pér rop Juan ngwa yezh Samaria.

¹⁵Gorna mzhin rop xaa ne yezh Samaria, ngunaab xaa lo Dios zee kayaa re xaa Jesús, xaa Samaria, Mbi Naban cheen Dios.

¹⁶Sbaa mle rop xaa ne nel zer kayaa re xaa Samaria Mbi Naban; nebse mrubnis xaa kwaan yalnabeyy cheen Jesús, Xaa Nabeyy.

¹⁷Zee Pér nu Juan mzhib yaa yek re xaa, nu snee mkayaa re xaa Mbi Naban.

¹⁸Gorna ngune Simón lee rop xaa mkayaa yalnabeyy lo Jesús nzhib xaa yaa yek re myet, zee lee re myet mkayaa Mbi Naban, zee nzhekla Simón ngzaa demi lo rop xaa ne,

¹⁹kwaanzee nzhé xaa lo xaa: —Zaa gu lo na yalnabeyy kwaan nkano gu ka na, zee noka na gorna zhib na yaa na yek re myet, noka kayaa xaa Mbi Naban cheen Dios.

²⁰Zee mkeb Pér lo xaa nzhé: —¡Lu, nu xdemi lu lux, nel mle lu xgab zii lu yalnabeyy kwaan nzelazh Dios kwaan demi!

²¹Nyent mod kee lu xchiin Dios, nel lee lextoo lu nanakt nali lo Dios.

²²Blaa xgab nawent kwaan nkano lu, nu bnaab lo Dios zee chelee nzho moda, chee xaa kwaan nawent kwaan nzho leen lextoo lu,

²³nel nzeen na nzho yalnayii lextoo lu nu nkadoo lu lo re kwaan nawent kwaan nabeyy lextoo lu.

²⁴Nu Simón mkeb nzhé: —Naab gu lo Xaa Nabeyy, zee nyent cho kwaan gak na lo re kwaan né gu.

²⁵Gwluzh ngulo mzaa xaa kwent cheen xtizh Xaa Nabeyy, lee rop xaa mkayaa yalnabeyy lo Jesús, nya naz Jerusalén nu mzaa xaa kwent cheen wdizh chul leen re yezh win cheen Samaria dubse naz.

²⁶Gwluzh ngulo mded kwaane tub mandad cheen Xaa Nabeyy nzhé lo Lip: —Gwa nu bzen naz kwaan nkato naz Jerusalén kwaan nzha naz yezh le Gaza —naz ne nded naz wen.