HECHOS 7:43-59

⁴³Huan onanquihuicayayahque ipalia in tlamachihchiutli itoca Moloc, aquin onanquimahuestiliyayahque ihuan isitlal oc se tlamachihchiutli itoca Renfán, yehhuan tlamachihchiuten tlen namehhuan onanquichiuque maquimahuestilican. Huan ic inon namechquixtilis namotlal huan namechtitlanis ipan tlali Babilonia.

⁴⁴’Ihcuac ocatcahque ipan in acahualtlahtli oquipiyayahque tochichicacoluan in manteado cali quen in tiopan canin oquieuque in itlanahuatil Moisés. Oquichiuque inon tiopan quen Dios oquimonextili in Moisés.

⁴⁵Tochichicacoluan oquiselihque inon tiopan quen intetlocolil huan ocualicaque ipan yancuic intlal. Yeh in Josué aquin oquintlicanaltiyaya queman oquincuilihque intlal in oc sequin tlacamen aquin Dios oquinquixtiloc. Ijcon ocatca ihcuac ohualnexohuac in hueyixtoc David.

⁴⁶Yehhuatl oquitlahuelitalo in Dios huan oquinec quichihchihuas tecaltzin Dios aquin temahuestiliyahque ichanihcahuan in Jacob.

⁴⁷Huan yeh in iconeu David itoca Salomón aquin oquichihchiu inon tecaltzin Dios.

⁴⁸Huan in Dios aquin ilohuac neluicac ahmo mochantilo ipan cali tlamachihchiutli. Quen oquihto se tlayolchicauqui:

⁴⁹Mihtohua Totecohtzin, Nehhua nitequihua ipan neluicatli canin nimotlaliya, huan in tlalticpactli yeh in tlen ipan nicsehuis nocxi. ¿Tlen cali nannechchihchihuilisque? ¿Tleca ticnehnehuiliyahque nicnequis campa nimosehuis?

⁵⁰Cox, ¿ahmo nehhuatl aquin oquinmochihchiu nochin inin tlamantli?

⁵¹Noyojqui oquiniluic in Esteban: ―Huan namehhuan nochipa tequin mohsiucamen huan ahmo nanquitlacamatihque itlahtoltzin Dios. Namehhuan nanquichihuahque ijcon quen namochichicacoluan quen nochipa nanquixnamiquihque in Itiotonaltzin Dios.

⁵²Tleca namochichicacoluan ahmo oquichiuque cuenta ica intlahtol inon tetlanonotzcahuan Dios. Oquinmictihque yehhuan aquin oquihtohque quen hualuilohuas in Tlamelajcatzintli Jesús, huan queman ohualuilohuac, onantetemactihque matemictican.

⁵³Ahmo onantetlacamatque, masque onanquiselihque in itlahtoltzin Dios tlen omechpanoltilihque in ángeles.

⁵⁴Queman in tlacamen oquicajque inon itlahtol Esteban, ocualanque hasta omotlancuechohque.

⁵⁵Huan in Esteban quiyolquitzquihtoc Itiotonaltzin Dios, huan oahcotlachix neluicac huan oquitac in tlanextli canin ilohuac in Dios, huan oteitac in Jesús motelquetzalohtoc ipan iyecmatzin in Dios.

⁵⁶Ic inon in Esteban oquihto: ―Xiquitacan, nepa neluicac niquita in Tetiachicau ica nochin tlacatl moquetzalohtoc ipan teyecmatzin in Dios.

⁵⁷Huan yehhuan omonacastzajque huan ocoutzahtzihque chicahuac huan ocualquitzquihque in Esteban.

⁵⁸Huan oquiquixtihque quiahuac ipan in altepetl huan opeuque quitemacahque. Huan in motencuanimen oquicautejque impampijca inahuac in tlahpiyani den tiopixcamen itoca Saulo.

⁵⁹Huan ihcuac oquitemacatoyahque, in Esteban otzahtzic in Dios huan oquihto: ―Notecohtzin Jesús, xicmoselili nonemilis.