Hechos 7:33-56

³³Utz tal paj u Tioxh te ech tzaꞌ: «Eesa vapel xaabꞌ taajan tziꞌ tan, viꞌ tioxhla txꞌavaꞌ atikꞌaxh.

³⁴Saabꞌi tan, nojchit maꞌxh villaꞌ aas tiira txumbꞌal iatz vuntenam atil okoꞌp tu Egipto. Vetvabꞌil qꞌul ixochon sunvatz. Ech tokeꞌ kuꞌyuꞌlin tu Amlika. Ul veesa tu qꞌu tzaꞌl atilka. Pek oraꞌxh tan, saqꞌaavbꞌenaxh tu Egipto. Sunchajaxh tiꞌ teesal kꞌasuꞌl tziꞌ.» Texh te.

³⁵Ech ichajax bꞌen u Moisees tu u Tioxh bꞌanaxi. Ichaj tiꞌ ibꞌanax qꞌesalail xoꞌl qꞌu tetz aa tenamil utz, tiꞌ teesal kꞌasuꞌl tu Egipto. Aꞌ lochon u aanjel vaꞌl chee siatz kꞌatz u jinkin chꞌiꞌx. Aꞌ qꞌesalain, kꞌuxh maꞌtich koꞌn talax te tu maꞌl qꞌu tetz aa tenamil ech tzaꞌ: «¿Abꞌil unchajonaxh aas suꞌlaꞌan qꞌesalail tu kuxoꞌl utz, suꞌlatxꞌol kunujul?» Texh te.

³⁶Ech u Moisees iqꞌon eluꞌl qꞌu kukꞌuy kumam tu Egipto. Utz mamaj txaichil tuchꞌ xheenya ikꞌuch tu Egipto tuchꞌ tu u Kaj Mar. 40 yaꞌbꞌ ikꞌuch txaichil tu u tzꞌinlich tzaji txꞌavaꞌ vaꞌl motx paalka.

³⁷Utz u Moisees vaꞌl alon tu qꞌu Israeel ech tzaꞌ: «Aatz u Tioxh, saꞌnalicheesa maꞌl alol tetz viyolbꞌal texoꞌl, echaꞌ in tzaꞌ aꞌ vaꞌl senima.» Texhtuꞌ.

³⁸Utz anchit u Moisees qꞌesalain xoꞌl qꞌu Israeel tu tzꞌinlich tzaji txꞌavaꞌ. Antu atich viꞌ u muunte Sinaii. Aꞌ kꞌulun qꞌu yol tetz tiichajil taqꞌ u aanjel. Aꞌ chit aꞌich imol qꞌu kukꞌuy kumam.

³⁹Pek aatz qꞌu kukꞌuy kumam, yeꞌt koꞌn inima. Motx koꞌn taqꞌka eloꞌp echil tziꞌ. Utz taꞌn tii motx titzꞌa u Egipto.

⁴⁰Aal motx koꞌn tal tu u Aroon ech tzaꞌ: «Bꞌan kutioxh, iqꞌon kubꞌey. Tan yeꞌ qootzaj kam nabꞌ vetiꞌanlu u Moisees bꞌa vaꞌl iqꞌoneluꞌloꞌ tu Egipto.» Texh te.

⁴¹Ech motx itzꞌaj maꞌl vatzibꞌal vaakaxh. Utz motx chit toksa txꞌoloꞌm vatz vibꞌanich tioxh tziꞌ. Kaana motx itxuqꞌtxun tiꞌ kꞌuxh itzꞌajoꞌm koꞌn tuchꞌ iqꞌabꞌ.

⁴²Echtzixeꞌt elabꞌeltekka tu u Tioxh. Taqꞌ texh tzii te aas aꞌ tek siqꞌila isikꞌle qꞌu txꞌumiꞌl tu amlika tuchꞌ tereꞌn qꞌu txijtxubꞌal. Echaꞌ vaꞌl tzꞌibꞌamalnalka tu qꞌu alol tetz u yolbꞌal Tioxh aas tal ech tzaꞌ: «Aatz ex Israeel, oj tzik in veteqꞌila esikꞌleꞌin tuchꞌ qꞌul etxꞌoloꞌm tu u tzꞌinlich tzaji txꞌavaꞌ tu 40 yaꞌbꞌ.

⁴³Pek aꞌ atil tetaanima vebꞌanich tioxh Moloc tuchꞌ vitxꞌumiꞌlil vaꞌt vetioxh vaꞌl Refaan. Utz ela koꞌxh tuchꞌ chelemal u nachbꞌal tetz setaqꞌo. Aꞌ qꞌu vatzibꞌal ebꞌana tziꞌ utz, eqꞌila esikꞌle. Echtzixeꞌt sunyakeꞌsa bꞌenex tzian, yaklel ex vatz bꞌen u Babiloonia.» Chia.

⁴⁴Uncheeꞌ aatz nichipaal qꞌu kukꞌuy kumam tu u tzꞌinlich tzaji txꞌavaꞌ, atich u bꞌuꞌj totztioxh tzixeꞌ, u techlal u nukꞌuꞌm vaꞌl iꞌan u Tioxh tuchꞌ. Ayaꞌ vaꞌl u Tioxh alon tu u Moisees kaniꞌch iveet siꞌaneꞌ. Utz ech chit iveet iꞌana.

⁴⁵Utz ikꞌul qꞌu kukꞌuy kumam u bꞌuꞌj totztioxh tziꞌ. Ech aꞌ motx iqꞌon opon tu qꞌu txꞌavaꞌ oponku u Josuee. Iqꞌomich taqꞌo aas bꞌajax el qꞌu puera aanima tu u Tioxh vatz qꞌu kukꞌuy kumam. Utz ankoꞌxh atich u bꞌuꞌj totztioxh tikuenta u Daviid.

⁴⁶Uncheeꞌ bꞌaꞌn bꞌenku u Daviid vatz u Tioxh. Pek kꞌuxh tachva sataqꞌ jeꞌ maꞌl otzotz, tatibꞌal u Tioxh, viTioxh u Jacoob, yeꞌt iꞌana.

⁴⁷Pek u Salomoon aqꞌon jeꞌ u totztioxh tziꞌ.

⁴⁸Kꞌuxh aatz u Tꞌankin Tioxh, aꞌ koj chit atilku tu otzotz ibꞌanoꞌm aanima. Tan echaꞌ vaꞌl alelka tu u alol tetz u yolbꞌal Tioxh aas nital ech tzaꞌ:

⁴⁹«Aꞌ unkꞌujlebꞌal u Amlika. Utz aꞌ kuꞌebꞌal vajan u vatz txꞌavaꞌ. Ech ¿kam tek bꞌanel tu vaꞌt vatibꞌal setaqꞌ jeꞌ? Utz ¿abꞌiste tek u atibꞌal vaꞌl sailankꞌin netaleꞌ?

⁵⁰Tan ¿yitꞌ tzik in koj unbꞌanon kajay qꞌu kam tziꞌ tzik? Chu u Tioxh.» Texh u alol tetz u yolbꞌal Tioxh.— Texh u Esteban.

⁵¹Utz tal paj u Esteban tu qꞌu qꞌatbꞌal tzii ech tzaꞌ: —Aatz ex, jolol ex txokop txumbꞌal tuchꞌ qꞌul etaanima. Ayaꞌl kala yeꞌ netabꞌi qꞌu kam tetz u Tioxh tiloneꞌ. Yeꞌ nenima viyol tuchꞌ etaanima. Echaꞌ ex puera aanima kꞌatza. Echaꞌ yitꞌ tzokꞌel el bꞌiil echiꞌl tu vetxumbꞌal netoksa tziꞌ. Sakoꞌnchitpaal etetz vatz u Tioxhla Espiiritu netxumeꞌ. ¡Aꞌ vetmotxexetiqꞌo viqelon qꞌul ekꞌuy emam!

⁵²Tan aatz qꞌul ekꞌuy emam, motx tojcha kajay qꞌu alol tetz u yolbꞌal Tioxh. Motx koꞌn iyatzꞌ qꞌuꞌl yolon tiꞌ u tulebꞌal u Jesuus, ayaꞌ vijikomal. Vaꞌl vetkoꞌnexocha utz, ex unyatzꞌon.

⁵³Tan kꞌuxh titziꞌ chit aanjel nekꞌulvu qꞌu mantaar Tioxh, nikoꞌxh maꞌkojekola utz, maꞌkojenima.— Texh u Esteban.

⁵⁴Uncheeꞌ taꞌxh motx tabꞌi qꞌu kam qꞌu qꞌatbꞌal tzii tzaꞌ, motx pultu taanima tu kꞌaꞌnal tiꞌ. Tiira motx ikꞌux tibꞌ tee taqꞌo.

⁵⁵Pek ech koj u Esteban tan, tiira atich u Tioxhla Espiiritu kꞌatza. Ech taꞌxh sajin jeꞌ tu Amlika, til u mam itechalil u Tioxh. Utz til u Jesuus majte atich tisebꞌal u Tioxh.

⁵⁶Ech taꞌxh tila, tal ech tzaꞌ: —¡Sajitaj etileꞌ, nivil u Amlika jajlele! Utz ¡nivil u Jesuus, u Kꞌaola vaꞌl bꞌennaj koꞌn aanima, atil tisebꞌal u Tioxh!— Texh u Esteban.