Hechos 7:3-49

³Na' Diosen' gože'ne': “Bchoj lažo' na' gwlejyic̱hj beṉe' biše' ḻježo' na' gwyej jasoa latje gan' gwlo'eda' le'.”

⁴Beyož gož Diosen' Abrahanṉa' ca', nach Abrahanṉa' bchoje' gan' že' beṉe' Caldea ca' na' jasoe' Harán. Na' bžin ža got da' x̱e'na' na' gwdechle Diosen' gwc̱he'e da' Abrahanṉa' gan' zoacho nga.

⁵Diosen' bi bnežjue' da' Abrahanṉa' yežlio gaquen c̱he', ṉe late' da'ozen', san gwne' gaquen c̱he xi'iṉ diaža c̱he' cate' ba gote', ḻa'czḻa' nono xi'iṉe' ṉa' soa cate' gož Diosen' ḻe' ca'.

⁶Nach Diosen' gwne' šjasenite' laž beṉe' zito' tap gayoa iz ga yesaque' esclavos na' yesežaglaochgüe'.

⁷Nach Diosen' ḻecze gože'ne': “Neda' gwnežjua' castigw c̱he nación gan' yesone' xi'iṉ diaža c̱hio' ca' esclavos na' gona' cont yesyechoje' naciónṉa' na' yeside' yesonxene' neda' nga.”

⁸Nach Diosen' gože' Abrahanṉa' gone' güen len xi'iṉ diaža c̱he'na'. Na' bene' mandadw soa Abrahanṉa' to señw dan' že' circuncisión, ḻe' na' len beṉe' byo ca' zjanaque' diaža c̱he', cont gacbia' ḻe chesejḻe'e c̱he dan' gwna Diosen'. Da'na'na' cate' goḻje xi'iṉe' Isaaquen' bzoe'be' señw to xmanzebe', na' ḻecze can' ben da' Isaaquen' cate' gol je xi'iṉe' Jacob. Na' ca'cze ben da' Jacoben' len da' xi'iṉe' ca' šižiṉw, beṉe' ca' gosac šižiṉw diaža c̱he beṉe' Israel.

⁹’Na' xi'iṉ da' Jacoben' ben' le José, beṉe' biše' ca' gosacxi'ede' ḻe' na' gosote'ne' gosezi' beṉe' nación Egipto ḻe'. Perw Diosen' gwzoe' len Josén'.

¹⁰Na' goclene'ne' len yogo'ḻoḻ da' bžaglagüe'. Na' Diosen' bene' cont da' faraón ben' chnabia' Egipton' bebede' Josén' na' gocbe'ede' naque' beṉe' sina'. Na' da'nan' faraónṉa' gwleje' ḻe' cont goque' gobernador c̱he nación Egipton' na' bene' ḻo ne'e ližen' na' yežlio c̱he'na'.

¹¹’Na' goc gwbin doxen Egipton' na' ḻecze can' goc gan' nzi' distritw Canaán na' da' x̱ozxta'ocho ca' bi beseželde' da' yesagüe' na' besežaglaochgüe'.

¹²Perw na' bžin ža da' Jacoben' bende' diža' de trigw Egipton' na' gwseḻe' da' x̱ozxta'ocho ca' jasexi'en da' nechw.

¹³Na' bechop ṉi'a ja'aque' cate' ben Josén' ga besyeyombia' beṉe' biše' ca' ḻe', nach gwṉeze faraónṉa' can' nac diaža c̱he Josén'.

¹⁴Na' Josén' bene' mandadw šjasexi'e x̱agaque' Jacoben' na' yogo'ḻoḻ biše' ḻježe' ca', zjanaque' ca do gayonšino' beṉe'.

¹⁵Can' goc gwyej Jacoben' jasoe' Egipton' na' Egiptona' gote', na' ḻecz na' gosat xi'iṉe' ca' beṉe' ca' gosac x̱ozxta'ocho.

¹⁶Na' gwdechle besyeyo'e žit benat c̱hegaquen' na' jasecuaše'ne' to ḻo' bloj ba da' gosone' yež gan' nzi' Siquem. Da' Abrahanṉa' gwxi'e ban' cani'te c̱he xi'iṉ da' Hamor gwdixjuen' mechw.

¹⁷’Na' cate' ba zoa žin tiemp gwnežjo Diosen' ḻegaque' yežlio can' gože' Abrahanṉa', ba zej chan beṉe' Israel ca' že' laž beṉe' Egipto ca'.

¹⁸Na' ca' chac beža' rey c̱he Egipton' na' rey coben' bi gwṉezde' can' goclen Josén' nación c̱hen'.

¹⁹Na' rey nga gwdiljwlaže' bi da' mal bene' len da' x̱ozxta'ocho beṉe' Israel ca' na' bene' mandadw šjasecho'oṉ xi'iṉgaque'na' cont yesatbe'.

²⁰Na' ca tiempen' golje da' Moisésen' na' bebe Diosen' ḻebe', na' x̱axṉa'be' bososc̱ha'ogüe'be' šoṉe bio'.

²¹Perw na' bžin ža jasecho'oṉšaze'be' na' xi'iṉ faraónṉa' to no'ole beželde'be' na' beyo'ebe' liže' bosc̱ha'ogüe'be' ca xi'iṉe'.

²²Ca' goquen' bsed da' Moisésen' tcho'a yeḻa' sina' c̱he beṉe' Egipto ca' na' bene' da' zaca' na' be'e diža' da' zaca'.

²³’Na' c̱hoa ize da' Moisésen' cate' gwnan šjaṉe'e beṉe' Israel gualaž c̱he' ca'.

²⁴Na' jale'ede' to beṉe' Egipto chc̱hi chsaque' to beṉe' Israelen'. Nach da' Moisésen' betue' beṉe' Egipton', boži'e da' malen' bende' beṉe' gualaž c̱he'na'.

²⁵Bene' xbab gocde' yesacbe'e beṉe' gualaž c̱he' chaclen Diosen' ḻe' cont yosle' ḻegaque' ḻo na' beṉe' Egipto ca', perw bi gosacbe'ede'.

²⁶Na' beteyo gosediḻ c̱hopze beṉe' Israel. Na' bžin da' Moisésen' gocde' gone' cont yesenite' binḻo, na' gože' ḻegaque': “¿Bixc̱hen' chdiḻlen ḻježle le'e nacle beṉe' gualažze?”

²⁷Nach ben' nap doḻa'na' bžigue' da' Moisésen' ca'ale gože'ne': “¿No gwna le' gaco' beṉe' gwnabia' cont gono' yeḻa' justis c̱heto'na'?

²⁸¿Ḻez chaclažo' goto' neda' can' beto' beṉe' Egipton' ṉeje?”

²⁹Na' cate' bene da' Moisésen' can' gož bena' ḻe' nach bxoṉje' jasoe' nación gan' nzi' Madián ḻa'czḻa' naque' beṉe' zito' len beṉe' ca'. Na' bšagne'e na' gwnita' c̱hope xi'iṉe'.

³⁰’Na' goc c̱hoa iz zoe' na', cate' to angl beṉe' gwseḻa' Dios blo'elagüe' ḻe' latje dašen' gaḻa'ze Ya'a Sinaí, yo'o anglen' to ḻo' yi' beḻ chdoḻjen to ḻo' yag xis yeše'.

³¹Na' cate' ble'e da' Moisésen' can' chaquen' bebande' nach gwbigue' yelate' cont ble'ešagüe'de' na' bende' choḻ güiž X̱ancho Diosen' ḻe', che'ene':

³²“Neda' naca' Dios ben' chonxen Abraham, ben' chonxen Isaac, na' ben' chonxen Jacob.” Nach da' Moisésen' gwxize' catec bžebe', gague cheyaxjde' ṉe'e.

³³Na' gož X̱anchon' ḻe': “Gwḻec̱hj xelo'na' cont gapo' neda' bala'aṉ, ḻe latje gan' zechao'na' naquen c̱hia'.

³⁴Neda' ba ble'eda' yeḻa' yaše' yeḻa' zi' da' chde nación c̱hia' Israelen' beṉe' že' Egipton' na' ba benda' ca chesonyaše'. Da'na'na' gaclena' ḻegaque'. Beda ṉa'a cont seḻa' le' Egipton'.”

³⁵’Diosen' gože'ne' ca' ḻa'czḻa' beṉe' Israel ca' cbi gosezi'e c̱he', gose'e Moisésen': “¿No gwna le' gaco' beṉe' gwnabia' cont gono' yeḻa' justis c̱heto'?” Diosen' gwseḻe' da' Moisésen' cont gwnabi'e da' x̱ozxta'ocho ca' na' cont bebeje' ḻegaque' ḻo na' beṉe' Egipto ca', na' angl c̱he Diosen' ben' ble'e da' Moisésen' ḻo' yi' beḻ gwzoe' goclene'ne'.

³⁶Na' da' Moisésen' bebeje' ḻegaque' Egipton' gan' bene' zan yeḻa' guac na' bichle da' zaca' yebane beṉe', na' ḻecz ca' bene' cate' besežine' Nisdao' Xṉan' na' šlac gosenite' latje dašen' c̱hoa iz.

³⁷Na' da' Moisésnan' gože' da' x̱ozxta'ocho ca': “X̱ancho Diosen' seḻe' yeto beṉe' gualaž c̱hechon' cont güe'lene' le'e xtiže'na' can' gwseḻe' neda'. C̱he benan' gwzenagle.”

³⁸Da' Moisésen' gwzoe' len da' x̱ozxta'ocho ca' latje dašen', na' ḻo Ya'a Sinaín' to angl beṉe' gwseḻa' Diosen' gože' ḻe' diža' da' zjansa' yeḻa' mban, na' bzoje' dižan' par chio'.

³⁹’Perw na' da' x̱ozxta'ocho ca' zan las bi bosozenague' c̱he da' Moisésen', bosozoe'ne' to šḻa'ale. Gosaclaže' šjaya'aque' Egipton'.

⁴⁰Na' šlac zej da' Moisésen' ḻo Ya'a Sinaí, gose'e beṉe' biše' Aarónṉa': “Ben da' le'echo da' šejnilaže'cho na' da' cuialao laocho tnez. Ḻe ca nac Moisésen' ben' bebej chio' Egipton', nono ṉeze bin' ba goc c̱he'.”

⁴¹Nach gosone' to me' go'ṉ dao' de oro na' gosote' no beyix̱e' gosonxene' me' daon', na' gosone' ḻṉi c̱he bena' gosone' len ṉi'a na'gaque'.

⁴²Da'nan' Diosen' gwlejyic̱hje' nación Israelen' na' be'e latje gosejnilaže' gwbiž, bio', na' beḻjw. Na' da' nga nyojen len dan' bosozoj da' beṉe' ca' goso'e xtiža' Diosen' cani', žan: Le'e beṉe' Israel, gague nedan' benxenḻe caten' betwle beyix̱e' latje dašen' lao c̱hoa iz.

⁴³Benḻe no da' benxenḻe, na' bia'le yodao' da' chacte chedobe gan' benxenḻe dan' nzi' Moloc, na' bia'le beljon' benxenḻe dan' nzi' Renfán. Na' dan' ba gwlejyic̱hjle neda', da'nan' cueja' le'e gan' zoalen' na' seḻa' le'e nación zito' do gan' nzi' Babilonia.

⁴⁴’Na' šlac chesaše' latje dašen', da' x̱ozxta'ocho ca' gosone' to yodao' da' chacte chedobe gan' že' yej ta'a gan' nyoj ley c̱hegaque'na'. Na' gosonen' con can' gož Diosen' da' Moisésen' na' con can' blo'ede' ḻe'.

⁴⁵Nach cate' da' Josué gwc̱he'e ḻegaque' gan' ben Diosen' cont goseque'e yežlio c̱he beṉe' zito' ca', ḻecze goso'e yodao' da' chacte chedobe. Na' ṉe' bosoc̱hine' yodaon' bžinten tiemp c̱he da' rey David.

⁴⁶Na' Diosen' bebede' da' rey Davin', na' da' Davin' goclaže' gone' to yodao' c̱he Diosen', Dios ben' ḻecze benxen da' Jacoben' cani'te.

⁴⁷Perw na' da' xi'iṉe' Salomón benen'.

⁴⁸Na' Diosen' ben' chnabia' doxen, bi ṉacho zoe' ḻo' yo'o da' chon beṉac̱hen', san chac can' gwna Diosen' dan' bzoj to beṉe' be' xtiže'na' cani', žan:

⁴⁹Neda' zoa' yaba chnabia', na' guac gona' con bi chazlaža' ḻo yežlion'. Na' ¿chaquele gonḻe to liža'na'? Neda' bi chyažjda' yo'o ga yezi'laža'.