HECHOS 5:8-36

⁸Wnabdiiz Bëd lo men, re Bëd: ―Guzëët gan ¿pe nli lal nee wtoo de lyu yrup de xemgyeey de? Wke men re men: ―Nli we.

⁹Lex re Bëd lo men: ―¿Penak wuu de diiz yrup de xemgyeey de ne rlaan de ykade de Espíritu Sant? Wa zëëd yra men ne walugyeer xemgyeey de; orree gweey ke men de no de.

¹⁰Orke guin wkantaa Safira nes lo Bëd, wetgue Safira. Chene wdee yra menyu guin, wii men le Safira che ke nex wet, lex weey men Safira walugyeer men Safira koo ke xemgyeey Safira.

¹¹Kesentyent wdxe yrandxee mén ne rlaleedx Jesucrist no le yrandxee mén ne waknan neguin ne wak.

¹²Ndal gyelmilaguer no ndal gyelenzoon wlaa yra poxter nes lo yra mengyëz guin. Yrandxee men ne rlaleedx Jesucrist rdop ledne rnii men xKordor Salomón.

¹³Kesentyent rlep yra mengyëz guin xeblaan yra mén ne rlaleedx Jesucrist, per ni ste mén wyezhdetgue ndee lad men.

¹⁴Per zhich guin kesentyent zayakndalre mén ne rlaleedx Jesucrist, mgyeey wnaatee,

¹⁵axtegue wboo mén mengyiz, wgyix men men runëz; nuu men wgyix men lo loon, nuuzeg men wgyix men lo daa, chen chene tee Bëd, tee maske nonchee xeblaa Bëd led men.

¹⁶No kesentyent ndalyaa mén ne nuu yra gyëz ne nak guex Jerusalén wa Jerusalén wano men mengyiz no le mén ne nuu menzab lextoo, no yrandxee men wyaken.

¹⁷Por neguin kesentyent wakmbidye fxuz ne mazre nondee no le yra mén ne nuu lad men ne nak sadusew ne ndxin lo fxuz nga.

¹⁸Wnëëz men poxter, wsee men poxter chegyiib.

¹⁹Per gyëël wa te xangel Dëdyuzh wxal ne chegyiib, wboo ne poxter lenchegyiib, re ne lo poxter:

²⁰―Gutsa lenxeydoo Dëdyuzh yzëët de xkwent gyelembánkweb lo yra mén.

²¹Ne won poxter zenga, rsilgue wa poxter lenydoo, wzelo poxter wneluu poxter xdiiz Dëdyuzh lo yra mén. Myentras ne kayak yra neguin, le fxuz ne mazre nondee no le stebëd mén ne nuu lad fxuz wtop yrandxee xtis-Israel, mazdee yna noo yrandxee men ne rnebééy lo men-Israel. Lex wxaal men tebëd soldad zaxii poxter lenchegyiib.

²²Per chene wdxiin yra soldad lenchegyiib, wzëldetre poxter; wberee men wluu men diiz,

²³re men: ―Chene wdxiin noo zhiin yaglachegyiib, chiich ke zemzëë we, le yra soldad zunap ke zhiin yaglachegyiib; per chene wxal noo we, rutre wzëldet.

²⁴Ne won fxuz ne mazre nondee diizree yra men soldad ne rnebééy lo yra soldad ne rapkwent ruxeydoo Dëdyuzh no le yra men fxuz ne rnebééy lo yra fxuz, axtegue nandet men pe wuu lextoo men, rnabdizlsaa men, re men: “¿Pa axtegue kwlo ydxiin yra neree?”

²⁵Orke guin wdxiin te mgyeey ne re lo men: ―Mén ne wsee de chegyiib, le men nuu lenxeydoo Dëdyuzh rneluu men mén.

²⁶Orguin za soldad ne rnebééy lo yra soldad, zaxii men poxter yra men xsoldad men; per bet wlaadet men poxter porke wdxe men ngugye mengyëz men.

²⁷Chene wdxinno men poxter, wdxig men poxter nes lo yra xtis-Israel. Lex re fxuz ne mazre nondee lo poxter:

²⁸―¿Pe let che nadet noo lo de ne ybereedetre de ne yneluu de xdiiz Jesus lo mén? Per orree gukwii nak ne kalaa de, ydendxee Jerusalén katxëëts de diiz gwa no rlaan de ykagyii de noo yra noo ne noo wket Jesus.

²⁹Wke Bëd yra Bëd stebëd poxter, re Bëd: ―Rap noo degne gon noo xdiiz Dëdyuzh, let xdiizdet mén.

³⁰Laa Dëdyuzh wneban Jesus ne wket de chene wkaa de Ne lo kruz.

³¹Dëdyuzh wlanon Jesus, wzoob Ne Jesus koo Ne ladbëë, wlaa Ne Jesus men ne rnebééy no men ne rselaa mén lo dol chen ysaan men-Israel xgyelmal men no chen gun Ne perdon xdol men.

³²Noo yra noo nak ne wii neree no le Espíritu Sant wii we, Espíritu Sant ne rdee Dëdyuzh lo yra mén ne rlaa ne rlaan Ne.

³³Chene won men zenga, kesentyent wlayaa men, wlaan men nket men yra poxter.

³⁴Per lad xtis guin zu te mgyeey ne la Gamaliel ne nak maxter ley no ne nak farisew. Yrandxee mengyëz raknzebnëz lo mgyeey guin; laa men wzuli wkyeen men wruu yra poxter nga tebrrat.

³⁵Lex re men lo yra xtis: ―Men-Israel, gugap kwent logne ylaa de yra mén gwa.

³⁶Gunileedx ne naandxeree wuu te zhan ne la Teudas, re zhaa laa zhaa nak zhannon, wap zhaa zeg tapgwyuu xpén zhaa. Per chene wket mén zhaa, noze wrëëts yrandxee xpén zhaa; nga ke wluzh yra ne wlaa zhaa.