Hechos 5:7-26

⁷Na' gwde do šoṉ hor gote' cate' bžin no'ol c̱he'na' na' gwyo'e ḻo' yo'on sin cbi ṉezde' bin' ba goc c̱he beṉe' c̱hen'.

⁸Na' Pedroa' gože'ne': ―¿To ca'te' ble'ele c̱he yežlion'? Na' Safiran' gože'ne': ―To ca'te'ten'.

⁹Nach Pedroa' gože' no'olen': ―¿Bixc̱hen' goco' toze len beṉe' c̱hion' chaquele gonḻe Diosen' prueba še lede' can' že' bi cheyaḻa' x̱oayagcho? Cho'a puert nga zjazecha beṉe' ba bosocuaše' beṉe' c̱hio'na' na' ṉa'a yeso'e le'.

¹⁰Na' ḻa' gwbix̱te Safiran' lao Pedroa' na' gote'. Na' cate' goso'o beṉe' xcuide' ca' ḻo' yo'ona' besele'ede' ba gote' nach goso'ene' jasecuaše'ne' cuit da' beṉe' c̱he'na'.

¹¹Na' yogo' beṉe' chesejnilaže' Criston' besežebe' can' goquen' na' ḻecze besežeb yezica'chle beṉe' gosende' diža' can' goquen'.

¹²Na' postlw ca' gosone' da' zan yeḻa' guac na' bichle da' besele'e beṉe' da' zaca' yesyebande'. Na' beṉe' ca' chesejnilaže' X̱ancho Jesucriston' chesedop chesežague' txen chašil c̱he yodao' blaona' gan' nzi' Chašil c̱he da' Salomón.

¹³Na' yezica'chle beṉe' ca' že' Jerusalénṉa' gosapchgüe' ḻegaque' bala'aṉ, ḻa'czḻa' besežebe' yesaque' txen len ḻegaque'.

¹⁴Perw na' zane' gosejnilaže' X̱anchon' na' gosaque' txen, zan beṉe' byo na' no'ole.

¹⁵Na' cate' no beṉe' gosacšende' goseyix̱jue' ḻegaque' tnez do ḻo cam do ḻo yagla', gosebeze' te Pedroa' cont yesecheḻe' bx̱in c̱he' na' yesyeyacde' še bi yižgüen' chese'ede'.

¹⁶Na' beṉe' ca' že' yež da' zjachi' gaḻa'ze ciuda Jerusalénṉa' ja'aque' zjanc̱he'e beṉe' chesacšene na' beṉe' zjayo'o zjanyaz da' x̱igüe'. Na' yogo'ḻoḻe' besyeyacde'.

¹⁷Nach ben' nacch bx̱oz blao na' yezica'chle beṉe' saduceo beṉe' cbi chesejḻe' yesyeban beṉe' guat, besegue'ede' postlw ca'.

¹⁸Na' gosezene'ne' na' goseyix̱jue' ḻegaque' ḻižya.

¹⁹Na' to angl beṉe' za' gan' zoa X̱ancho Diosen' bžine' ḻižyan' šeže'le na' gwsaljue' puert ca' na' bebeje' ḻegaque'. Na' gože' ḻegaque':

²⁰―Ḻe šja'ac yodao' blaona' na' ḻe güe' diža' len ben' chesežagna' naquen' yesone' cont gata' yeḻa' mban c̱hegaque' toḻi tocaṉe.

²¹Nach dan' gosende' can' gož anglen' ḻegaque', ja'aque' yodao' blaona' cate' gwyeni' na' bososed bosolo'ede' ben' zjanžag na'. Na' ben' nac bx̱oz blao len beṉe' gole blao ca' chesenabia' nación Israelen' besedobe' cont bosoxi'e, nach gosone' mandadw šjasexi'e postlw ca' gan' zjade' ḻižyan'.

²²Na' cate' ben' chesap yodaon' besežine' ḻižyan' gague no postlw ca' zjanḻa' na' jaya'aque' lao beṉe' gwnabia' ca' jasyedix̱jue'ede'.

²³Gose'e beṉe' ca': ―Nyeyjwc̱hac̱h ḻižyan' na' ḻecze na' nita' soldadw ca' cho'a puerta' chesapen' perw cate' gwsaljwto' puerten' gague no postlw ca' že' ḻo' ḻižyan'.

²⁴Na' ben' nacch bx̱oz blao na' beṉe' gwnabia' c̱he ben' chesap yodaon' na' bx̱oz gole blao ca' cate' gosende' rsonṉa' besyebande', gosene': ―¿Nac gac da' nga ṉa'a?

²⁵Na' šlac chesacžejlaže', bžin to beṉe' gože' ḻegaque': ―Beṉe' ca' gwdix̱jwle ḻižyan' zjaze' chašil c̱he yodao' blaona' chososed chosolo'ede' beṉe'.

²⁶Nach beṉe' gwnabia' c̱he ben' chesap yodaon' len beṉe' gop ca' jasa'aque' jasexi'e postlw ca' diža' šagüe'. Bi gosone' znia len ḻegaque' da' besežebe' beṉe' chosozenag xtiža' postlw ca' še yosožie' ḻegaque' yej.