Hechos 5:3-20

³Jalla nekztanaqui Pedruqui cjichic̈ha: —Ananías, ¿kjaz̈tiquiztan am kuzquiz Satanás luzzita? ¿Espíritu Santuz̈quiz tiz̈ta k'otsjapaqui? Nii yok tuyta paazqui t'ecsamc̈ha.

⁴Ima tuycan nii yokaqui amtapantakaya, ¿ana jaa? Tuyz̈cu, nii yoka tuyta paazqui amtazakaztaz̈, ¿ana jaa? ¿Kjaz̈tiquiztan tiz̈ta ana wali pinsichamtajo? Amqui Yoozquiz k'otchamc̈ha; ana z̈oñz̈quiz k'otchamc̈ha.

⁵Pedruz̈ nuz̈ chiitiquiztan, Ananiasqui ticzi tjojtsic̈ha. Jalla niz̈tiquiztan nii quintu nonchi z̈oñinacaqui ancha eksñi cjissic̈ha.

⁶Jalla nuz̈ ticstan, tsjii kjaz̈t tjotjowanacaqui macjatchic̈ha, Ananías ticzi curpu murtajzjapa. Nekztan nii tjotjowanacaqui tjati chjitchic̈ha.

⁷Tsjii c̈hjep orquiztan, Ananías tjunqui tjonchinc̈ha. Naaz̈a lucu ticzi quintu ana zizatc̈ha.

⁸Nekztanaqui Pedruqui naaquiz pewczic̈ha, tuz̈ cjican: —Wejtquiz maznalla. ¿Anc̈huca yoka tuyta paaz nuz̈ullakazkaya? Nekztanaqui naaqui kjaazic̈ha, tuz̈ cjican: —Jesalla, nuz̈ullapanc̈ha.

⁹Nekztanaqui Pedruqui naaquiz cjichic̈ha: —Anc̈hucqui Yooz Espíritu Santo incallz pecatc̈ha. ¿Kjaz̈tiquiztan anc̈hucqui pucultan nuz̈ kaasjo? Nii zancucz̈ tjonc̈ha nii am lucu tjatz̈quiñinacaqui. Niz̈aza anziqui amzakaz chjichaquic̈ha.

¹⁰Nii orapacha Pedruz̈ kjojchquiz tjojtz̈cu ticzinc̈ha. Nii tjotjowanacaqui kjuya luzcu naa ticzin cherchic̈ha. Niz̈aza jwezcu tjati chjitchic̈ha naaz̈a lucz̈ latuquin.

¹¹Jalla niz̈tiquiztan tjapa nii iclizziz z̈oñinacami, niz̈aza nii quintu nonchi z̈oñinacami ancha eksñi cjissic̈ha.

¹²Nii tjuñinacquiz apostolonacaqui walja siñalanacami milajrunacami paañitac̈ha z̈oñinacaz̈ cheran. Niz̈aza tjapa criichinacaqui Portal de Salomón cjita kjuyquiz ajczñitac̈ha.

¹³Ana jakzilta ana criichi z̈oñinacami criichinacz̈tan mazi pajas, ancha eksnatc̈ha. Jalla nuz̈ cjenami z̈oñinacaqui walja rispitchic̈ha criichinacz̈quiz.

¹⁴Niz̈aza tsjan tsjan z̈oñinacaqui Yooz Jilirz̈quin kuzziz cjissic̈ha, luctaka cjiñi maataka cjiñi. Walja z̈oñinacaqui Yoozquin criichic̈ha.

¹⁵Niz̈aza laa z̈oñinacami callquin jweztatac̈ha. Callquin tjajz zquiti chjinz̈cu, t'apz̈tatac̈ha. Niz̈aza camillquiz zakaz nonz̈tatac̈ha. Jalla nuz̈ nonz̈ta z̈ejlcan Pedruz̈ tjonz tjewzic̈ha, tsjii kjaz̈ta c̈hjetinta cjeyajo. Pedruz̈ siwsallamekaj laa z̈oñinacz̈ juntuñ wat jaa, cjiñitac̈ha.

¹⁶Niz̈aza nii wajt vicin watjanacquiztan walja z̈oñinacaqui tjontjonatc̈ha Jerusalenquin. Laanacami zajraz̈ tantanacami zjijc zjijcatc̈ha. Niz̈aza tjapa laa z̈oñinacaqui c̈hjetintatac̈ha.

¹⁷Jalla niz̈tiquiztanaqui timplu chawc jiliriqui saduceo parti z̈oñinacz̈tan ancha iñizichic̈ha.

¹⁸Jalla nuz̈ iñiziz̈cu, apostolonaca preso tanchic̈ha, carsilquiz chawjczjapa.

¹⁹Jalla nuz̈ carsilquiz chawjctaz̈ cjen ween tsjii Yooz Jilirz̈ anjilaqui tjonchic̈ha. Niz̈aza carsil zan chawjcz cjetsic̈ha. Cjetz̈cu, apostolonaca jwessic̈ha tuz̈ cjican:

²⁰—Timpluquin oka. Jalla nicju tsijtsna. Jesucristuz̈ kamaña puntuquiztan tjapa z̈oñinacz̈quiz paljayaquic̈ha.