Hechos 4:7-28

⁷Suasne uspane Pedrorakas Juantakas kanapa ɨninnat kit “Paizkakin kuntain” kiznara. Uspane ka mɨmanara: —Nune an chasachimikasha ¿Mizama kuhsninzi? ¿Mɨnma uruza sun kin ɨninzi?

⁸Suasne Diospa Sɨnam Izpul ussa kiwaintuasmin, Pedrone usparuza ka kiznara: —Judío awa ɨnintuzkas ɨlapa ɨnintuzkas mɨrain.

⁹An ishtumikane kuhsak kit chamɨzta. Une aumɨza “¿Mɨnma ussa kuhsakninta?” kiz kit mɨmaamtu.

¹⁰Au paasne uruza, wan Israel awaruza, kainammpuspas, us wat parɨt kit miza tuntu kuhsaktɨt piankamanapa. Jesúsne, Nazaret pɨpuluras mikane, ussa kuhsakninta. Une ussain iru patpian kit piantaara. Diosne ussa irɨttas kakulninta.

¹¹An ñancha Diospa pit ka parɨt: “Jesúsne sam saktɨkana i. Une, yal samtuzkana, ussa kwayarɨt, ussa paashitchi akwa. U ussa paashitchikas, usne awaruza watsat mɨlnanashina.”

¹²Mamaztuzne, mɨnminkas, aumɨza watsat mɨlnasachi. Diosne Jesústa ɨninta, aumɨza watsat mɨlnanapa. Apain mamazta ɨnintachi.

¹³Wanmakmuruzne iztaspaarɨt, Pedrokas Juankas ishwatchin paranara akwa. Uspa paas kammu pianchi minñara. Kain awain minñara. Suasne uspane Jesúskasa chamtu nɨjkulara.

¹⁴An ampu, kakultɨtmika, sua uspakasa pana izamtu akwa, uspane chinkas sɨnkaarachi.

¹⁵Suasne uspane uspa paasta wanmakmukis ɨninnat kit nukkulat kit usparuzpain kwinta kiara.

¹⁶Ka usparuzpain kaizara: —¿Chima kianapai Pedrokasa Juankasa? Wan Jerusalén pɨpulu uztuzne sun kwisha iztasparɨt kal kirɨt pian. Aune sun kirɨt aizpa kwail i kaizsachimakpas.

¹⁷Mane usparuza kurunat kit tɨnta kainarawamakpas, an akkwan awa sun mɨamanpa, mɨnainkas Jesúspa kwinta kiamanpa.

¹⁸Suasne Pedrorakas Juantakas akwanat kit uspa pit ɨninnat kit kaiznara: —Jesúspa kwinta kiaman; kamtanaman.

¹⁹Pedrokas Juankas sɨnkaailta: —Une minñarawa. U aumɨza “Jesúspa kamtanaman” kaizamtukas, aune Diosta mɨrawamakpas.

²⁰Aune izta aizpakas mɨra aizpakas kwinta kimɨztawamakpas.

²¹An akkwan aliz pit pararawane, uspane usparuza chɨhkaarɨt. Uspane usparuza ilmanamara, pailta awa Diosta kwisha wari kizara akwa, sun kit akwa.

²²Mamasa kuhsaktɨtmikane cuarenta año mɨjara.

²³Chɨhtawane, Pedrokas Juankas uspa izmuruza ɨil kit Judío awa ɨninturuzkas ɨlapa ɨninturuzkas kaizara aizpa kainanara.

²⁴Sun mɨarawane, wanne sulmin Diosta paikuat kit kaizara: “Au Anpat, nune sukas chiyukas pikas wan chiwalkas sara.

²⁵Nune Davidpa au kwalta kwinta kinara. Sɨnam Izpulne Davidta, Dios kiwainmikasha, ka paraninnara: ‘Diosta nɨjkultuchiruzne waya kiamtu. ¿Judío awaruzne uspa kiashimtu aizpa kain minñamtu?

²⁶Au sukin ɨnintuzkas wan pɨpulukin ɨnintuzkas wanmakkamtu, Anpattakas Dios narɨttuzakas waya kianapa.’

²⁷Watcha. Herodeskas Poncio Pilatokas Judío awachikasa Israel awakasa an pɨpulukin up sɨnam kiwainmikasha waya kin wanmakkara. Jesúsne Dios naramika i.

²⁸Uspa sun kiarachasmin, nune an ñancha uspa minñara aizpa pian, nu mintu aizpa kianapa.