Hechos 4:5-29

⁵Che bara yääl, bachaag sa' guiraa rebeṉgool, renani rnibee guedx Jerusalén, näjza rebejṉ ni ruluii leii,

⁶näjza Anás ni rnibee guiraa rebixhojz, näjza xpagojzni ni laa Caifás, näjza Juan, näjza Alejandro, näjza guiraa reniguii ni najc sa' rebixhozro ni rnibee.

⁷Gunibeereni biääd Pedr näjza Juan gusuj galäiireni te gunabdiidxreni lojreni: ―¿Chu xcäḻrnibee rajptu? ¿Chu laj basä'ttu te basiajctu niguiire?

⁸Dxejcti sa'csi cayu Pedr diidx ni canii Sprit Dxan xten Dios neṉ lastooni, räjpni lojreni: ―Caniä lo guejbtu, reguxhtis näjza rebeṉgool xten rexpejṉ Israel,

⁹palga canabdiidxtu xhicuent gucnäjnu niguii nani gucxhuu ni'ni, palga canabdiidxtu xho basiajcnu niguiiga,

¹⁰gusule'nu xcuent dee te gacbeetu te gacbeeza guiraa rexpejṉ Israel. Xtidx Jesucrist najc yäḻrnibeduxh. Diidxga abasiajc ni' niguiire, xhet rajcdini suga'ni nez lojtu. La'tu abacuaatu Jesucrist lo crujz, niluxh Dios guläsni lo rebeṉgut.

¹¹Di'tu ninälajz xtidx Jesucrist. Laani najc si'c te guij nani rbäcajtu che runcheetu te yu'. Per Dios abejn najc Jesucrist si'c guij nani maazru nacsa'c, nani guyu' squiin xte yu'.

¹²Xtebtis Jesucrist rusḻaa bejṉ lo dojḻ, ruti stee bejṉ lo guedxliuj nani baxhaḻ Dios te gusḻaani bejṉ lo dojḻ ―si'c räjp Pedr.

¹³Che biejn diajgreni xtidx Pedr, bidxelojreni sa'csi di Pedr näjza Juan guidxejb, dizareni guitujy. Dxejcti räjp rebixhojz ni sajcru lo sa'reni: ―Direni ganduxh guijtz, bejṉtisreni. Dxejcti gucbeereni gusanäj redee Jesucrist, lojni bisieedreni.

¹⁴Bahuiiza rebixhojz lo niguii ni abiajc ni'ni, suganäjni guiro'preni. Ro'cti xhetru gujcdi gunii rebixhojz sa'csi laaca bejnreni.

¹⁵Dxejcti gunibee rebixhojz birii guidxojnreni telaad te bij rebixhojz diidx ensilaareni.

¹⁶Räjpreni lo sa'reni: ―¿Xhi jiennäänu reniguiire? Guiraa rebeṉ Jerusalén anajn xcuent dzunroduxhre ni cayujnreni. Digacdi gucuatzlaaznuni.

¹⁷Per te di guire'ch xtidx Jesucrist ste'ca guejdx, do'o gulijdxnu guidxojnreni te na'c guiniirureni xtidx Jesucrist ste'ca guejdx.

¹⁸Huixisac rebixhojzreni. Dxejcti räjpreni lojreni: ―Na'c guluirutu xtidx Jesucrist, na'cru guiniitu xtiidxni.

¹⁹Dxejc gunii Pedr näjza Juan, räjpreni lojreni: ―¿Coḻguinii loonu chu xtiidx sajcru guicuadiaagnu? ¿Xtiidx la'tu, o xtiidx Dios?

²⁰Digacdi gusäunu ro'nu. Nanabpac gusule'nu diidx xcuent recos nani abahuiinu näjza rediidx ni abiejn diajgnu.

²¹Balidxsac rebixhojzreni te na'cru guiniireni xtidx Jesucrist. Dxejc basḻaa rebixhojz guiro'preni, sa'csi xhetru niajcdi niujnreni lo Pedr näjza Juan, sa'csi canii rebejṉ bejnreni te dzunsa'c. Xhidajl rebejṉ gulä'pza xpala'n Dios sa'csi bahuiireni xhini'c gujc ro'c.

²²Sa'csi niguii ni basiajcreni xcuent yälmilagwr agudejdni tiuu ijz.

²³Che basḻaa rebixhojz guiro'preni, gubi'reni lo sa'reni ni najc rexpejṉ Jesucrist. Bijreni diidx guiraa ni gunii reguxhtis xten rebixhojz näjza rebeṉgool lojreni.

²⁴Che biejn diajg rexpejṉ Jesucrist xtiidxreni, tejtis xhigab bejnreni guredx-gunabreni lo Dios, räjpreni: ―Xtadnu Dios, nani benchee xhaguibaa näjza guedxliuj näjza nisdoo näjza guira'ti ni yu' lojreni, neṉreni,

²⁵nani bejn basoob toDavid xtidx Sprit Dxan te bacuaani xtiidxlu, räjpni: ¿Xhicuent guyuduxh rebeṉ guedxliuj yärsia'? ¿Xhicuent bejn rexpejṉ Israel xhigab ni xhet sajcdi?

²⁶Bidxagsa' reṟeii lo guedxliuj näjza reguxhtis xten reguejdx te gudxojnreni xtzun Dios näjza xten Dad Crist nani baxhaḻ Dios, si'c gunii toDavid.

²⁷’Aguzojb diidxre, sa'csi lo guejdxre bidxagsa' Herodes näjza Poncio Pila't näjza rexpejṉ Israel näjza rebeṉzijt nani di gac xpejṉ Israel. Bidxechnäjreni Xi'nlu nani najc Crist ni baxhaḻlu.

²⁸N̲aj abejnreni dzunguijdx si'cni galooli guniilu gac.

²⁹N̲aj Guejblu Xtiosnu, bahuii xho cagusacsíreni nuure, gucnäj nuure te gutiplaaznu, te na'c guidxeebnu guiniinu xtiidxlu, sa'csi najcnu rexpejṉlu.