Hechos 3:14-25

¹⁴Ja ochaoma itan jakon joni pikotinin keenyamataanan, ja retemis joni pikonon ixonres maton yokata iki.

¹⁵Jaskáaxonra ja jati Ibo maton retea iki, ikaxbi Diossen jirimaa iki, jara non kikinhakin onanke.

¹⁶Ja maton oinna, itan maton onanna joni jakon baneta riki, Jesús ikonhaxes iká. Jaskáakin Jesús ikonhaxa kikinni benxoke. Jariki ja maton oinna.

¹⁷Nokon kaibobo, ramara en onanke, ja maton koshiboyaxonbi Jesús reteyantanara, onanyamaxon maton aká iki.

¹⁸Ikaxbi jaskáaxonresa Diossen senenhaa iki, ja *Cristo mawáti jawen *profetabo meranxon yoini.

¹⁹Jaskara iken, maton jakonma shinanbo akonkin jenetaanan, Dioski banéribikanwe, maton ochabo mato soaxonon, jatianra non Ibon maton shinanbo tantimati iki,

²⁰ja moabi Cristo mato raanxonti shinanna ixon, raanxontaanan, ja iki Jesús.

²¹Ramara Jesús naikanbipari iti jake, ja moatian jawen jakon *profetabo meranxon yoini keskáakin Diossen jatíbi jawékibo jakonhakai kaman.

²²Moiséssenra yoia iki: ‘Non Ibo Diossenra mato xaranmea, westíora maton rarebo ea keská *profetaribi imanoxiki. Jan yoiai joibora maton senenhaxonti jake.

²³Jatian jaweratobaonki jawen joi senenhaxonyamai, jabora moa Diossen jonima iti iki’, akin.

²⁴Rama netebaon iti jawékibora, Samuelninpari yoikin peoa iki. Jatian jaribira wetsa profetabaonribi yoikana iki.

²⁵Mato riki ja *profetabaon chiní bakebo, itan ja maton reken papashokobo betan ja senenhabekonti joi Diossen aní nokoabo. Diossenra Abraham yoia iki: ‘Min chiní rarebobo kopíra, jatíbi jonibo en jato jakon imanoxiki’, akin.