Text copied!
CopyCompare
Dižaʼ güen c̱he ancho Jesucristo - Hechos - Hechos 2

Hechos 2:7-42

Help us?
Click on verse(s) to share them!
7Bi gosejni'ide' bin' chac na' besyebande' gosene': ―¿Gague beṉe' distritw Galilea beṉe' quinga?
8¿Nacxec̱hen' to tocho chenecho cheso'e diža' can' chesoe' beṉe' gualaž c̱hecho diža'?
9Baḻcho naccho beṉe' nación Partia, na' baḻcho beṉe' nación Media, na' baḻcho beṉe' nación Elam, na' baḻcho beṉe' distritw Mesopotamia. Na' yebaḻcho beṉe' distritw Judea, na' yebaḻcho beṉe' distritw Capadocia, yebaḻcho beṉe' distritw Ponto, na' yebaḻcho beṉe' distritw Asia,
10yebaḻcho beṉe' distritw Frigia na' beṉe' distritw Panfilia, na' yebaḻcho za'cho nación Egipto, na' yebaḻcho za'cho yež ca' zjachi' Africa do te ciuda Cirene. Na' chio' naccho cuent len beṉe' nación Roma, baḻcho goljcho naccho beṉe' Israel na' yebaḻcho ben cuincho txen len beṉe' Israel.
11Na' baḻcho naccho beṉe' yež ca' zjachi' Creta na' beṉe' distritw Arabia. Na' gate'tez beṉe' naccho, yogo'cho chenecho chesoe' beṉe' distritw Galilea quinga xtiža'chon' da' chaccho, cheso'e diža' c̱he da' zan da' ba ben Diosen' da' zaca' yebanecho.
12Na' yogo' beṉe' ca' besedobe' chosozenague' besyebande' na' gosacžejlaže' bin' chac, na' zane' gosene': ―¿Bi zejen dan' chaquen'?
13Na' yebaḻe' goseṉeye'e gosene': ―¡Beṉe' quinga chesezožde'!
14Na' Pedroa' gwzeche' lao ben' zjandop zjanžague' txen len postlw ca' yešnej na' be'e diža' zižje gwne': ―Le'e beṉe' Judea na' note'tezechle zoale ciuda Jerusalén ni, che'nda' gwzenagle c̱hia' na' gonḻe xbab c̱he da' za' ṉi'a le'e.
15Beṉe' ḻježa' quinga bitw chesezožde' can' chaquele, ḻe ṉe' nac tempran.
16Ba chac can' bzoj da' Joel ben' be' xtiža' Diosen' cani' bzoje' dan' gwna Diosen', žan:
17Cate' ba zoa žin ža cont yeyož yežlion', neda' Dios gona' cont Spiritw c̱hian' yedesoan len beṉe' že' doxen yežlion'. Na' gona' cont xi'iṉle ca' yeso'e xtiža'na', na' beṉe' byo xcuide' ca' yesele'edagüede' bi da' gona', na' güe'lena' beṉe' byo gol ca' diža' ḻo bišgal c̱hegaquen'.
18Na' yogo' beṉe' ca' chesejnilaže' neda', beṉe' byo na' no'ole, yedesoa Spiritw c̱hian' len ḻegaque' cont yeso'e xtižan'.
19Gona' cont yesele'e beṉac̱hen' da' zaca' yesyebande' ḻe'e yaban' na' lagüe yežlion', na' gona' yeḻa' guac c̱hia'na' len chen, len yi' na' len žen da' nac ca bejw.
20Bich gwseṉi' gwbižen', na' bio'na' yeyaquen xṉa ca chen cate' za' žin ža yida' da' yoble gwnežjua' castigw c̱he yogo' beṉe' cbi chesejnilaže'nda', neda' naca' X̱anḻe. Žana' gaquen to ža žialao xen.
21Nach note'tez beṉe' yeseṉabe' gaclena' ḻegaque', neda' naca' X̱anḻe yebeja' ḻegaque' ḻo da' malen'. Can' gwna Diosen'.
22’Na' le'e beṉe' Israel gualaž c̱hia', ḻe gwzenag c̱hia'. Jesúsen' ben' nac beṉe' yež Nazaret, Diosen' blo'ede' naque' beṉe' zaque'. Diosen' bene' cont Jesúsen' bene' yeḻa' guac na' bichle da' zaca' yebanecho can' ṉezeczelen'.
23Ḻo yeḻa' ṉeze c̱he Diosen' bin' za' gac, bi'e latje gwzenḻe Jesúsen' na' bdelene' ḻo na' beṉe' mal ca' gosote'ne' bosode'ene' ḻe'e yag cruzen'.
24Perw na' Diosen' bec̱his bosbane'ne' ladjo beṉe' guat ca', ḻe bi gwzoe yeḻa' goten' ṉabian' ḻe'.
25Quinga bzoj da' rey David xtiža' Jesúsen' cani'te, žan: Ṉezda' X̱ana' Diosen' zoe' len neda' do ža do yel, na' zoe' chaclene' neda' cont bi chžeba'.
26Da'na'na' zoa' mbalaz na' choa' diža' ḻeca chebeda'. Na' ḻecze chebeda' ṉezda' yec̱his yosbane' neda' ladjo beṉe' guat ca' cate' ba gota'.
27Dios c̱hia', ṉezda' bi yocua'aṉo' neda' gan' že' beṉe' guat ca', ṉeca go'o latje gožo' cuerp c̱hia'na', neda' naca' xi'iṉo' na' nac lažda'oguan' xilaže'.
28Ba blo'edo' neda' can' soa cueza' mbalaz. na' mbalaz soa' dan' soaleno' neda'. Beyož gwna Pedroa' ca' nach gože' ḻegaque':
29―Beṉe' Israel, ṉezecho da' x̱ozxta'ocho rey David gote' na' bosocuaše' ḻe'. Na' nombia'cho ba gan' bosocuaše' ḻe'.
30Na' da' rey Davin' be'e diža' can' bzejni'i Diosen' ḻe' na' gwṉezde' gwlo'o Diosen' da' baḻi gague da' te bi gac can' gwne'. Gwṉezde' gon Diosen' cont Criston' galje' ḻo diaža c̱he' na' ṉabi'e nación Israelen' can' gwnabia' ḻe'na'.
31Diosen' bene' cont da' rey Davin' gwṉezde' can' gaquen' na' da'nan' be'e diža' c̱he Criston' ben' ba gwseḻa' Diosen' cont ṉabi'e. Gwne' Criston' yebane' na' bi yega'aṉe' gan' že' beṉe' guat ca' na' ṉeca gožo' cuerp c̱he'na'.
32Na' Diosen' bec̱his bosbane' Jesúsen' ladjo beṉe' guat ca', na' yogo' neto' choe'to' diža' ṉezeto' beyas bebane'.
33Na' Diosen' len yeḻa' guac c̱he'na' bene' cont beyep Jesúsen' gan' zoe'na' na' chnabi'e txen len ḻe'. Na' Diosen' bnežjue'ne' Spiritw c̱he'na' can' gwne'. Na' Jesúsen' ba bene' yeḻa' guac nga da' ba benele na' da' ba ble'ele.
34Gague da' rey Davin' beyep yaban', san da' David bzoje' c̱he Jesúsen' gwne': X̱ancho Diosen' gože' X̱anan': “Gwche'edo' cuita' nga ṉabia'cho txen,
35na' gona' cont yogo' no chesegue'e le' yosozex̱jw yic̱hje' yosozenague' c̱hio'.”
36’Da'nan' yogo' chio' beṉe' Israel cheyaḻa' ṉezecho Jesúsen' ben' betwle bda'lne' ḻe'e yag cruz, Diosen' gwleje'ne' cont naque' X̱anchon' na' naque' Cristo, zeje diža' naque' ben' gwseḻa' Diosen' ṉabi'e nación c̱hechon'.
37Na' cate' beṉe' ca' zjanžaguen' gosende' xtiža' Pedroa', da' juisyw da' gosacde' ḻo' lažda'ogaquen', nach gose'e Pedroa' na' len yezica'chle postlw ca': ―Beṉe' gualaž, ¿bin' cheyaḻa' gonto'?
38Nach Pedroa' gože' ḻegaque': ―To tole cheyaḻa' yetiṉjele xtoḻa'le ca' na' soale nis dan' ba chejnilaže'le Jesucriston', na' Diosen' yezi'xene' c̱hele na' goṉe' le'e Spiritw c̱he'na' soan ḻo' yic̱hjlažda'olen'.
39X̱ancho Diosen' goṉe' note'tezle Spiritw c̱he'na' can' ba gwne', le'e na' xi'iṉle ca' na' note'tez beṉe' zito', ḻe chnežjuen' yogo' beṉe' chbeje' cont yesaque' ḻo ne'e.
40Nach Pedroa' be'lene' ḻegaque' diža' zan, na' gwṉeyoede' ḻegaque' gwne': ―Ḻe yechoj ladjo beṉe' mal quinga beṉe' cbi zjanombia' Dios.
41Ca' goquen' beṉe' ca' gosejḻe'e diža' dan' be' Pedroa' gosezoe' nis. Na' ḻo žana' šoṉ mil beṉe' gosejnilaže' Jesúsen' na' gosaque' txen len yezica'chle beṉe' chesejnilaže' ḻe'.
42Yogüe' gosenita'teze' bosozenague' dan' bososed bosolo'e postlw ca' ḻegaque'. Na' gosaque' toze len yezica'chle beṉe' gosejnilaže' Jesúsen' na' gose'ej gosagüe' txen na' gosenite' bosoḻ güiže' Diosen' txen.

Read Hechos 2Hechos 2
Compare Hechos 2:7-42Hechos 2:7-42