Hechos 2:7-29

⁷Gulanáꞌ badxëꞌ yúguꞌtëꞌ, len gulubannëꞌ, taꞌnë́ꞌ: ―Gul‑yutscaꞌ. ¿Naruꞌ clëg bönniꞌ Galilea yúguꞌtë bönniꞌ ni tuꞌë didzaꞌ?

⁸¿Nacxcz nac ryö́niruꞌ tuꞌë xtídzaꞌruꞌ ca nac didzaꞌ ruiꞌruꞌ tu turuꞌ?

⁹Rëꞌu ni nacruꞌ bönniꞌ zian yödz, bönniꞌ narujquëꞌ luyú Partia, len luyú Media, len luyú Elam, len luyú Mesopotamia, len luyú Judea, len luyú Capadocia, len luyú Ponto, len luyú Asia,

¹⁰len luyú Frigia, len luyú Panfilia, len luyú Egipto, len luyú África, le nacr ziꞌtuꞌ ga zoa luyú Cirene. Lëzcaꞌ nacuꞌë ni bönniꞌ yödz Roma. Laꞌquëꞌ nacquëꞌ bönniꞌ judío len yelaꞌquëꞌ nazíꞌ lu naꞌquëꞌ le taꞌyejlëꞌë Dios bönniꞌ judío.

¹¹Lëzcaꞌ nacuꞌë ni bönniꞌ narujquëꞌ Creta, len luyú Arabia. Ryö́niruꞌ tuꞌë didzaꞌ ruiꞌruꞌ qui queëruꞌ, taꞌguíxjöꞌë yuguꞌ le zxön benëꞌ Dios, le run ga rubániruꞌ.

¹²Cni guc, gulubannëꞌ yúguꞌtëꞌ, len szxöni gulaböꞌë baguíꞌi. Glë lzaꞌquëꞌ tuëꞌ yetúëꞌ, taꞌnë́ꞌ: ―¿Bizxa caz lë ni?

¹³Gulutitjëꞌ laꞌquëꞌ, taꞌnë́ꞌ: ―Taꞌzúdxinëꞌ.

¹⁴Niꞌr Pedro gzuílenëꞌ yechineajëꞌ gbaz naꞌ nasölëꞌë Cristo, atiꞌ gzu lahuëꞌ ruꞌë zidzj didzaꞌ, rëꞌ lequëꞌ: ―Lbiꞌiliꞌ, bönniꞌ Judea, len yúguꞌtëliꞌ zoaliꞌ Jerusalén. Lë ni ral‑laꞌ gnö́ziliꞌ. Gul‑zë́ nagliꞌ le gyëpaꞌ lbiꞌiliꞌ.

¹⁵Netuꞌ ni cutu rzúdxituꞌ ca naꞌ ráquiliꞌ lbiꞌiliꞌ, le ni zoaruꞌ ziꞌa gal‑laꞌ xsil, atiꞌ nutu nu rzudxi hora cni.

¹⁶Lë ni nac le gnëꞌ Joel, bönniꞌ bëꞌë didzaꞌ uláz queëꞌ Dios, gnëꞌ:

¹⁷Cni rnëꞌ Dios: Lë ni le gac dza tsajséytëgac. Gsölaꞌa Böꞌ Laꞌy quiaꞌ Tsajsóalenëꞌ yúguꞌtë bunách. Luiꞌbiꞌ didzaꞌ uláz quiaꞌ zxiꞌnliꞌ, bönniꞌ len ngul. Laꞌléꞌibiꞌ biꞌi raꞌbán le uluꞌa lahui, Atiꞌ laꞌneynëꞌ yël bönniꞌ gul.

¹⁸Catiꞌ gdxin dza niꞌ quisiaꞌ Böꞌ Laꞌy quiaꞌ Tsajsóalenëꞌ huen dxin quiaꞌ, bönniꞌ len ngul, Atiꞌ luꞌë didzaꞌ uláz quiaꞌ.

¹⁹Uluꞌa luzxbá xtsaꞌ le lun ga lubani bunách, Atiꞌ yödzlyú uluꞌa le lac bëꞌ, Rön len guiꞌ, len dzön ca böaj.

²⁰Gchul gbidz Atiꞌ gac xna beoꞌ ca nac rön. Cni gac catiꞌ ziꞌa gdxin dza niꞌ chbuluꞌë Dios. Gac dza niꞌ ca gatga rléꞌiruꞌ.

²¹Lulá yúguꞌtë nup niꞌ lulídz Lëꞌ Xanruꞌ, Lu yöl‑laꞌ rejlëꞌ quequëꞌ Lëꞌ.

²²’Gul‑zë́ nagliꞌ lë ni gyëpaꞌ lbiꞌiliꞌ, bönniꞌ Israel. Dioscz benëꞌ ba laꞌn ga zoaliꞌ Jesús, bönniꞌ Nazaret. Dios bëꞌë Lëꞌ latj benëꞌ le tun ga rubániruꞌ, yuguꞌ yöl‑laꞌ huac, len le tac bëꞌ. Yúguꞌtë lë naꞌ benëꞌ Dios lu nëꞌë Jesús, ca naꞌ chnö́ziczliꞌ.

²³Lëzcaꞌ cni, Dios bëꞌë latj nu budö́d Jesús lu naꞌliꞌ. Cni guc, ca naꞌ chgna ladxëꞌë Dios gunëꞌ, len ca nac le chbucözëꞌ dza niꞌtë. Lbiꞌiczliꞌ gzxönliꞌ‑nëꞌ Jesús, len budödliꞌ‑nëꞌ lu naꞌquëꞌ bönniꞌ xöhuiꞌ tuaꞌdöꞌ, bönniꞌ guludöddëꞌ Lëꞌ catiꞌ niꞌ guludaꞌquëꞌ Lëꞌ lëꞌi yag cruz.

²⁴Niꞌr Dioscz buspanëꞌ Jesús naꞌ, buslë́ꞌ Lëꞌ lu yöl‑laꞌ gut, le cutu guc ugaꞌnëꞌ tsaz lu yöl‑laꞌ gut naꞌ.

²⁵Ca nac lë ni, bëꞌë didzaꞌ uláz queëꞌ Dios David ca nac queëꞌ Jesús, gnëꞌ: Bléꞌiteczdaꞌ‑nëꞌ Xanruꞌ, zoëꞌ lahuaꞌ. Lëꞌ zoëꞌ cuit lëꞌa yubél, rzönëꞌ nedaꞌ, Cui gac nu bi gun quiaꞌ.

²⁶Qui lë ni naꞌ budziji ladxaꞌa, Atiꞌ lu yöl‑laꞌ rudziji quiaꞌ bil‑laꞌ. Qui lë ni naꞌ gunaꞌ löz Lëꞌ Catiꞌ gdxin dza gatiaꞌ.

²⁷Xantuꞌ Dios, nözdaꞌ cutu ucaꞌnuꞌ nedaꞌ latj chul quegac nup natgac. Cutu guꞌu latj nit gdu ca nayáꞌ nabanaꞌ, Nacaꞌ bönniꞌ nadxiꞌicznuꞌ Liꞌ.

²⁸Buzéjniꞌnuꞌ nedaꞌ ca ral‑laꞌ gunaꞌ Quië gdél‑liꞌdaꞌ yöl‑laꞌ naꞌbán gdu. Gunuꞌ ga udzijdaꞌ le zóalenczuꞌ nedaꞌ.

²⁹’Naꞌa, böchaꞌa. Nac bëꞌ gutiëꞌ xuz xtauꞌruꞌ David, len bgachëꞌë yeru ba, atiꞌ dë ga zoaruꞌ ba queëꞌ naꞌ ga rdxintë naꞌa dza.