Hechos 2:7-20

⁷Moa shinanhoma itan kikinni ratetax, neskatibo yoyo ikana iki: —¿Galileainoa jonibomakayarin nato jaskati yoyo ikaibo?

⁸¿Jawekeska kopíki, non joinboribi yoyo ikanaitian non jato ninkatai?

⁹Nenora ikanai: Partossainoabo, Mediainoabo, Elamhainoabo, Mesopotamiainoabo, Judeainoabo, Capadociainoabo, Ponto janeya mainmeabo, Asiainoabo,

¹⁰jainoax Frigiainoabo, Panfiliainoabo, Egiptonkonia itan Cirene ochóma iká Libiainoabo. Jainoax, jaribakanke Romameax bekanabo.

¹¹Jatíribibo iki judíobo, jainoax wetsabo iki judío jikikanabores. Jainoax jaríbake Cretainoax, itan Arabiainoax bekanaboribi. ¡Jatíxonbira non ake ninkákin, ja Diossen ratéti aká non joibaonribi yoikanaitian! —ikibo.

¹²Jatikaxbi ikana iki ratékanabo itan jaton shinanbobi yama. Jaskatax jatonbinix yokakanani, neskákana iki: —¿Jaweki winókana? —ikibo ikana iki.

¹³Ikaxbi jatíribibo shiroires ikana iki: —¡Paenaxa ikanai! —ikibores.

¹⁴Jaskákanaitian, ja chonka westíora jabé raanabo betanbi, wenixon koshinshaman jato Pedron yoia iki: “Nokon kaibo Judíobo, itan mato Jerusalénhainoabo, ninkáxon, onankanwe en mato yoibanon:

¹⁵Natobora paenamabo ikanai. Maton shinannai keskáma riki noa. Iskon hora ikaxiki yamékiripari, jain barira tsoabi paena iosma iki.

¹⁶Nenora iki itai, ja *profeta Joelnin yoini keská seneni. Jara neskata iki:

¹⁷‘Dios iká iki, nete senenaitianra, nokon Shinan en jatíbi joniboki pakenoxiki; jatianra, ja maton bake benbobo, itan maton bake ainbobo nokon Shinanman yoyo inoxikanai. Maton bake ranonbaonra namá keska meranbo oinnoxikanai. Maton yosibaonra, oxaxon namá meranbo oinnoxikanai.

¹⁸Ja netebaonribira, nokon yonoti joniboki itan nokon yonoti ainbobokiribi, nokon Shinan en pakenoxiki. Jaskáakin en akára, nokon janenko joi yoinoxikanai.

¹⁹Naikan, itan maiorira ani ratéti jawékibo en jato oinmanoxiki; jimi, chii, jainoax koin kextó.

²⁰Barira nokanoxiki, oxera jimi keska inóxiki, ja non Ibon jaton akábo yoixonti ani nete senenamatianbira, jaskarabo inóxiki.