Hechos 2:6-26

⁶Na' cate' gosende' chac sšaguen' gan' že' postlw ca', zan beṉe' Israel ca' besežague', na' ḻeca besyebande', ḻe to to postlw ca' bosozejni'ide' ḻegaque' len diža' da' chesejni'i to toe'.

⁷Bi gosejni'ide' bin' chac na' besyebande' gosene': ―¿Gague beṉe' distritw Galilea beṉe' quinga?

⁸¿Nacxec̱hen' to tocho chenecho cheso'e diža' can' chesoe' beṉe' gualaž c̱hecho diža'?

⁹Baḻcho naccho beṉe' nación Partia, na' baḻcho beṉe' nación Media, na' baḻcho beṉe' nación Elam, na' baḻcho beṉe' distritw Mesopotamia. Na' yebaḻcho beṉe' distritw Judea, na' yebaḻcho beṉe' distritw Capadocia, yebaḻcho beṉe' distritw Ponto, na' yebaḻcho beṉe' distritw Asia,

¹⁰yebaḻcho beṉe' distritw Frigia na' beṉe' distritw Panfilia, na' yebaḻcho za'cho nación Egipto, na' yebaḻcho za'cho yež ca' zjachi' Africa do te ciuda Cirene. Na' chio' naccho cuent len beṉe' nación Roma, baḻcho goljcho naccho beṉe' Israel na' yebaḻcho ben cuincho txen len beṉe' Israel.

¹¹Na' baḻcho naccho beṉe' yež ca' zjachi' Creta na' beṉe' distritw Arabia. Na' gate'tez beṉe' naccho, yogo'cho chenecho chesoe' beṉe' distritw Galilea quinga xtiža'chon' da' chaccho, cheso'e diža' c̱he da' zan da' ba ben Diosen' da' zaca' yebanecho.

¹²Na' yogo' beṉe' ca' besedobe' chosozenague' besyebande' na' gosacžejlaže' bin' chac, na' zane' gosene': ―¿Bi zejen dan' chaquen'?

¹³Na' yebaḻe' goseṉeye'e gosene': ―¡Beṉe' quinga chesezožde'!

¹⁴Na' Pedroa' gwzeche' lao ben' zjandop zjanžague' txen len postlw ca' yešnej na' be'e diža' zižje gwne': ―Le'e beṉe' Judea na' note'tezechle zoale ciuda Jerusalén ni, che'nda' gwzenagle c̱hia' na' gonḻe xbab c̱he da' za' ṉi'a le'e.

¹⁵Beṉe' ḻježa' quinga bitw chesezožde' can' chaquele, ḻe ṉe' nac tempran.

¹⁶Ba chac can' bzoj da' Joel ben' be' xtiža' Diosen' cani' bzoje' dan' gwna Diosen', žan:

¹⁷Cate' ba zoa žin ža cont yeyož yežlion', neda' Dios gona' cont Spiritw c̱hian' yedesoan len beṉe' že' doxen yežlion'. Na' gona' cont xi'iṉle ca' yeso'e xtiža'na', na' beṉe' byo xcuide' ca' yesele'edagüede' bi da' gona', na' güe'lena' beṉe' byo gol ca' diža' ḻo bišgal c̱hegaquen'.

¹⁸Na' yogo' beṉe' ca' chesejnilaže' neda', beṉe' byo na' no'ole, yedesoa Spiritw c̱hian' len ḻegaque' cont yeso'e xtižan'.

¹⁹Gona' cont yesele'e beṉac̱hen' da' zaca' yesyebande' ḻe'e yaban' na' lagüe yežlion', na' gona' yeḻa' guac c̱hia'na' len chen, len yi' na' len žen da' nac ca bejw.

²⁰Bich gwseṉi' gwbižen', na' bio'na' yeyaquen xṉa ca chen cate' za' žin ža yida' da' yoble gwnežjua' castigw c̱he yogo' beṉe' cbi chesejnilaže'nda', neda' naca' X̱anḻe. Žana' gaquen to ža žialao xen.

²¹Nach note'tez beṉe' yeseṉabe' gaclena' ḻegaque', neda' naca' X̱anḻe yebeja' ḻegaque' ḻo da' malen'. Can' gwna Diosen'.

²²’Na' le'e beṉe' Israel gualaž c̱hia', ḻe gwzenag c̱hia'. Jesúsen' ben' nac beṉe' yež Nazaret, Diosen' blo'ede' naque' beṉe' zaque'. Diosen' bene' cont Jesúsen' bene' yeḻa' guac na' bichle da' zaca' yebanecho can' ṉezeczelen'.

²³Ḻo yeḻa' ṉeze c̱he Diosen' bin' za' gac, bi'e latje gwzenḻe Jesúsen' na' bdelene' ḻo na' beṉe' mal ca' gosote'ne' bosode'ene' ḻe'e yag cruzen'.

²⁴Perw na' Diosen' bec̱his bosbane'ne' ladjo beṉe' guat ca', ḻe bi gwzoe yeḻa' goten' ṉabian' ḻe'.

²⁵Quinga bzoj da' rey David xtiža' Jesúsen' cani'te, žan: Ṉezda' X̱ana' Diosen' zoe' len neda' do ža do yel, na' zoe' chaclene' neda' cont bi chžeba'.

²⁶Da'na'na' zoa' mbalaz na' choa' diža' ḻeca chebeda'. Na' ḻecze chebeda' ṉezda' yec̱his yosbane' neda' ladjo beṉe' guat ca' cate' ba gota'.