Text copied!
CopyCompare
Tnuʼu vaʼa tnuʼu Jesucristo - Hechos - Hechos 2

Hechos 2:4-43

Help us?
Click on verse(s) to share them!
4Ntdaa‑i n‑keé ñaꞌa Espíritu Ianyuux te n‑ka kixeꞌe‑i ka jaꞌan‑i nudɨɨn yuꞌu sejoon n‑juini Espíritu Ianyuux xa jaꞌan koio‑i ɨɨn ɨɨn‑i.
5Kueꞌe ñayiu neꞌe tnɨɨ mudu ñayiu Israel xndaxio nudɨɨn ñuu xtuu Jerusalén tiempo ijan. Xndaxio‑i xañuꞌu nuu Ianyuux.
6Nu n‑ka teku‑i xa ndeꞌe n‑kayu andɨu, n‑ka nataka‑i nuu xyuku ñayiu ka kukanu ini Jesucristu jan, te n‑ka teku‑i xa ka jaꞌan ñayiu ijan nudɨɨn yuꞌu ná ka jaꞌan mee‑i país‑yɨ. N‑ka yuꞌu anu‑i chi ñayo‑i n‑xani ini xa daa yaꞌa.
7Vichi n‑ka yuꞌu‑i, te ka xiaꞌan tnaꞌa‑i: —¿Ñadu ñayiu Galilea ka kuu ntdaa ñayiu ka jaꞌan yaꞌa u?
8¿Janda n‑kuu xa ka jaꞌan‑i yuꞌu ka jaꞌan‑ro país‑ro, te ka teku‑ro?
9Yaꞌa xyuku ñayiu Partia, ñayiu Media, ñayiu Elam, ñayiu io Mesopotamia, ñayiu Judea, ñayiu Capadocia, ñayiu Ponto, ñayiu Asia,
10ñayiu Frigia, ñayiu Panfilia, ñayiu Egipto, ñayiu ñuu katuu yatni Cirene país Libia, ñayiu Roma xtuu Israel ya,
11ñayiu Creta, xiꞌin ñayiu Arabia. Dava‑ro ka kuu yatnuꞌu Israel. Dava‑ro ñatu ka kuu yatnuꞌu Israel, ko ntdaa‑ro ka jandixa Ianyuux. Ntdaa‑ro ka kutnuni ini xa ka jaꞌan‑i xa ka nakuetu‑i nuu‑ia chi ka jaꞌan‑i yuꞌu‑ro —ka kuu‑i, ka xiaꞌan tnaꞌa‑i.
12Ntdaa‑i n‑ka yuꞌu anu te ñayo‑i n‑ka kutnuni ini janda n‑kuu xa dana ini n‑ka jaꞌan ñayiu ijan ɨnka yuꞌu. Dava‑i ka xiaꞌan tnaꞌa: —¿Janda n‑kuu xa daa ka jaꞌan‑i?
13Ko dava‑i n‑ka xakundee ñayiu n‑ka jaꞌan ɨnka yuꞌu. Ka xiaꞌan tnaꞌa‑i: —¡Ka xini ñayiu dian!
14Te n‑ndojuiin Spedru xiꞌin uxi ɨɨn ka se tundaꞌa ñaꞌa Jesús xa juña tnuꞌu koio‑s ñayiu xa n‑jaꞌan Jesús xiꞌin xa n‑kida‑ia meꞌñu ntdaa ñayiu. Te xee n‑jaꞌan‑s nuu‑i ntdaa‑i: —Ñani, Dito, xa ka kuu‑n ñayiu Israel xiꞌin ndixi, ñayiu n‑ka kixee xa xtuu‑n Jerusalén ya. Kunini vaꞌa koio‑n xa na kutnuni ini‑n xa na jaꞌan‑da.
15Ñayo ñayiu yaꞌa ka xini ná ka xani ini‑n. Dijan kaa ɨɨ́n datne kuu. Ñadu hora ku xini ñayiu kuu.
16N‑xetnaꞌa xa yaꞌa vitna ná n‑jaꞌan se n‑xo nani Joel, se n‑xian tnuꞌu ñayiu xa n‑jaꞌan Ianyuux. Duꞌa n‑chidotnuni‑s:
17N‑jaꞌan Ianyuux: “Danduu nga dakeé‑r Espíritu‑r ñayiu xiꞌin daꞌya‑i, te jaꞌan koio daꞌya dɨꞌɨ‑i xiꞌin daꞌya yɨɨ‑i nax koo. Daꞌya yɨɨ‑i, se ka kuu solteru, datutuku‑r‑sɨ. Sexaꞌnu, kachi xene koio‑s nax yaꞌa.
18Tiempu ijan dakeé‑r Espíritu‑r se ka xinokuechi nuu‑r xiꞌin ñá ka xinokuechi nuu‑r. Juꞌun‑s xiꞌin‑ña Espíritu‑r, te jaꞌan koio‑s xiꞌin‑ña tnuꞌu‑r nuu ñayiu.
19Kada‑r xa koo nɨñɨ xiꞌin ñuꞌú, te junu ñuꞌa tkoo andɨu xiꞌin ñuñayiu. Ntdaa xijan kada‑r xa kundeꞌa ñayiu ñuñayiu xa na yuꞌu‑i nuu‑r.
20Kunee nuu ngandii te kukueꞌe nuu yoo ná kueꞌe nɨñɨ. Duꞌa kuu antecas xa xee kɨu ndukaꞌnu‑r, te jini ñayiu xa taxnuni‑r.
21Ntdaa ñayiu kajan taꞌu nuu‑r nanitaꞌu daa”, kuu Ianyuux, n‑jaꞌan‑ia.
22ʼKunini koio ndixi xa ka kuu‑n yatnuꞌu Israel. Xnaꞌa mee‑n xa Jesús Nazaret, n‑kida Ianyuux xa n‑kida‑ia kueꞌe milagru, te n‑ka xini‑ro. Xaxeꞌe xa n‑ka xo ndeꞌa‑ro xaꞌa n‑ka kutnuni ini‑ro xa Ianyuux n‑tundaꞌa ñaꞌa.
23N‑ka kida‑n xa n‑ka tnɨɨ se unu loko‑ia, te n‑ka xatakaa dika‑n‑ia. Xa daa nga ñu ini Ianyuux xa daa yaꞌa, te naꞌa‑ia.
24N‑kida‑ia xa n‑nandoto Jesús, te n‑ndokoo‑ia nuu xndaa ndɨyɨ chi ña n‑kuu ka xa kuu ka‑ia ndɨyɨ:
25Daa yaꞌa chi n‑chidotnuni David: “Ndɨkɨu ndɨñuu ndeꞌa ñaꞌa‑da. Ña tuu na xa chi ini‑da chi nujuiin‑n lado kuaꞌa‑da.
26Xijan kuu xa yo kudɨ ini‑da, te najani‑da nuu ñayiu xa kudɨ ini‑da. Jandixa‑da xa xandaa xakuiti nadandoto ñaꞌa‑n na kuú‑da.
27Na kuú‑da ma dandoo ñaꞌa‑n nuu xyɨnduxi ndɨyɨ. Ni ma juejoon‑n xa tɨu yɨkɨ kuñu Daꞌya Yɨɨ‑n, Ia ii.
28N‑kachitnuꞌu ñaꞌa‑n xa kada‑da na nandoto‑da. Te kutuu‑ro nɨkava nɨkuita te yo kudɨ ini‑da.”
29ʼÑatu yuꞌu‑da xa jaꞌan‑da xa n‑xiꞌí xixitna‑ro David chi xandaa xakuiti n‑xiꞌí‑s, te n‑xe konduxi‑s. Ntdaa‑ro ka xini nuu n‑xe konduxi‑s chi io daa nde vitna.
30David n‑kuu se n‑jaꞌan tnuꞌu Ianyuux nuu ñayiu, te n‑xo naꞌa‑s xa n‑chinaa Ianyuux nuu‑s xa ɨɨn daꞌya dana‑s ku kuu se taxnuni.
31Xá ama n‑jaꞌan David xa nandoto Cristu te n‑chidotnuni‑s: “Ma ndoo‑ia nuu xyɨnduxi ndɨyɨ, ni ma tɨu yɨkɨ kuñu‑ia.”
32N‑nadandoto Ianyuux‑ia, te n‑ka xini ntdaa daña xa n‑nandoto‑ia.
33N‑kida Ianyuux xa juan ndaa‑ia andɨu xa kunukoo‑ia diñi kuaꞌa‑ia xa taxnuni‑ia. Dɨuni n‑kida Ianyuux xa n‑kidatniu ka Espíritu‑ia anu Jesús te n‑kida Jesús xa keé ñaꞌa Espíritu‑ia ntdaa daña na n‑jaꞌan‑ia. N‑ka xo ndeꞌa‑n te n‑ka teku‑n vitna.
34Ñadu David juan ndaa andɨu chi mee‑s kuu se duꞌa n‑chidotnuni: N‑jaꞌan Taa‑ro Ianyuux nuu Ia kuu Xtoꞌo‑da: “Nkoo diñi kuaꞌa‑r nɨni na xee kɨu,
35kada‑r xa taxnuni‑n nuu ntdaa ñayiu ka xini uꞌu ñaꞌa.”
36ʼNdixi, ñayiu ka kuu daꞌya dana Israel, kunaꞌa koio‑n xa n‑kida Ianyuux xa n‑nduu Jesús Xtoꞌo‑ro. Dɨuni n‑kida‑ia xa n‑kuu‑ia Cristu te n‑xe konetniu‑ia xa taxnuni‑ia. Maxku jɨn tnɨɨ anu‑n chi xandaa kuu. Mee‑ia n‑ka xatakaa dika‑n —kuu Spedru, xiaꞌan‑s.
37Nu n‑ka teku ñayiu n‑ka taka ijan xaꞌa, te vichi n‑ka kune ini‑i. N‑ka xijan tnuꞌu‑i Spedru xiꞌin dava se n‑tundaꞌa ñaꞌa Jesús xa dakuaꞌa‑s ñayiu: —Dito, ¿Nax kada koio‑da?
38Xiaꞌan Spedru nuu‑i: —Natu ini koio xa n‑ka kida‑n kuechi na kuaꞌa na taxkanu ini Ianyuux kuechi‑n, te juendute koio‑n ɨɨn ɨɨn‑n xaxeꞌe xa ka kukanu ini‑n Jesucristu. Kada Taa‑ro Ianyuux xa keé ñaꞌa Espíritu‑ia.
39Juꞌun koio‑n Espíritu‑ia chi n‑jaꞌan‑ia xa juꞌun ñaꞌa Espíritu‑ia ndoꞌo xiꞌin daꞌya‑n xiꞌin ñayiu xndaxio xika. Juꞌun Espíritu‑ia ntdaa ñayiu kida‑ia xa kunini‑i tnuꞌu‑ia, te jandixa‑i —kuu‑s.
40Tnuꞌu yaꞌa n‑jaꞌan Spedru nuu‑i. Ijan dada n‑jaꞌan ka‑s xa n‑jan doꞌo‑s‑yɨ. N‑jaꞌan‑s nuu‑i xa maxku kada koio ka‑i kuechi. —Maxku kada ka‑n xaloko xaduꞌa ka kida dava ñayiu io vitna —kuu ntuku Spedru, xiaꞌan‑s.
41Duꞌa n‑kuu xa n‑ka jandixa ñayiu tnuꞌu n‑jaꞌan Spedru, te n‑ka xendute‑i. Naxa uni mil ñayiu n‑ka kɨu tnaꞌa nuu ñayiu ka kukanu ini Jesús kɨu ijan.
42Kɨu xiꞌin kɨu n‑ka xo nataka ñayiu xa kunini vaꞌa‑i xa n‑xo jaꞌan se n‑tundaꞌa ñaꞌa Jesús nuu‑i. N‑ka xo xijan taꞌu kaꞌnu‑i nuu Ianyuux, te n‑ka xo xaxi kaꞌnu‑i.
43N‑ka xo yuꞌu ñayiu chi n‑ka xo kida se n‑tundaꞌa Jesús milagru.

Read Hechos 2Hechos 2
Compare Hechos 2:4-43Hechos 2:4-43