Hechos 2:4-27

⁴Sun akwa Sɨnam Izpulne wan awaruza piznara. Suasne uspane mamaz kamtachi pit kwinta kiamɨzta. Izpulne usparuza paraninnara.

⁵Sun payura mamaz suras Judío awaruzne Jerusalén pɨpulura pianara, Diosta wakpuj wain kit Diosta paikwan. Uspane wan suras aara.

⁶Sun aztu mɨarawane, akkwan awane wanmakkat kit iztaspaarɨt. Ɨnintaruz kwinta kiamtuasmin, pakaish pakaish paiña pitmin mɨara.

⁷Uspane ishkuat kit iztaspaat kit usparuzpain ka mɨmaara: —¿An paramtuzne Galilea suras awa ki?

⁸¿Mizamakai? Mane auruzpain usparuza mɨpuspas. Uspane au pit pashpas kawira aizpa paramtu.

⁹Apane awa purai: Partia suraskas Media suraskas Elam suraskas Mesopotamia suraskas Judea suraskas Capadocia suraskas Ponto suraskas Asia suraskas

¹⁰Frigia suraskas Panfilia suraskas Egipto suraskas Libia suraskas kashara Cirene pɨpulura Roma pɨpuluras awakas apain pura.

¹¹Mɨnpazha usparuztas Judío awa azi. Mamaztuzne Judío awa namarɨt. An awakas Creta suraskas Arabia suraskas purai. Uspa paraka, aune wan Diospa watsal kal kirɨt aizpa au pitmin mɨpuspas, kizara.

¹²Wanne iztaspaat kit chi kizmanamara. Usparuzpain mɨmaamɨzta: —¿Chima kizshina sunne?

¹³Mamaztuzne usparuza sun akwa ishanat kit ka kaizara: —Uspane chappi kuat kit piarai, kizara.

¹⁴Suasne Pedrone mamaz once ɨnintaruzkasa nil satkun kit tɨnta parat kit ka paiña Judío kwaltuza paranamɨzta: “Na kaiztu aizpa mɨzhain. Judío awaruzkas, wan Jerusalén pɨpulura uztuzkas, nawa wat mɨrain, piankamanapa.

¹⁵Uspane pirachimai, umin minñamtukanain. Mama tɨlawain i. Nueve urain i.

¹⁶Joelne, Dios pit kainammmikane, an ñancha sun kit aizpa ka kaizta:

¹⁷‘Diosne sun minpa payura kaiztu. Nane ap Izpul wan awara nail kit mɨlananash. U painkulkas pashukas nawa kwinta kianazi. U musitturuzkas u ɨlaparuzkas kainkizpaanazi.

¹⁸Sun minpa payura nane ap Izpul, ap kiwainmuruza ashamparuzakas ampuruzakas ɨninnat kit mɨlananash. Uspane nawa kwinta kianazi.

¹⁹Nane kwashpa chiyumal chiwazha watsal kal kinash. Nane uruza an izninnanash, piankamanapa. Wan pailtɨmtuasmin, nane pilkin aimpikas ĩnkas ishkas izninnanash.

²⁰Pãnne tɨl parɨnazi. Palapchane kwanam tɨlkwil aimpikanain namtɨnazi. An kwiztane an watsal payu taizkane, au Anpatne paiña kal kimɨznazi.

²¹Mɨnpazha Anpatta paikumtune, usne usparuza watsat mɨlnanazi, ĩnta ɨamanpa.’ ”

²²Pedrone sun paiña Judío kwaltuza kaizta: “Israel awa, na kaiztu aizpa mɨrain: Diosne Jesústa, Nazarettas munmikasha nat kit uruza ɨninnara, akkwan tuntu iztasparɨt kal u iztakin kinpa.

²³Diosmin Jesústa uruza chɨhkatchasmin, usne chiwazha kishimtu aizpa an ñancha pian. Suasne une kwail awaruz ussa ɨninnat kit kurishta iru patpian piantaninta.

²⁴Sunkana Diosne ussa irɨttas kakulninta. Jesúsne irɨtpa izpul ɨmtura nukkulsachi, kajchira sɨptɨtmikakana.

²⁵Davidkas Jesúspa kwinta kit kit ka kaizta: ‘Nane ap Anpatta na iztukin iztau. Usne ap makin uz, awa nawa ishkumanpa.

²⁶Katmizna ap kaijchu watsal ish. Mane watsal pit pararau ap pitkasa. Katmizna mane nakas Diosta tɨriz kit wat kwaizkulnash.

²⁷Nune, ap Diosne, ap izpulta irɨttukin kwaimanazi. Nune nawa, up kiwainmumikasha, pashit kit ap ñara pɨtninmanazi.