Hechos 2:24-46

²⁴Pero Totajtsi Dios okiyoliti. Ye okitekixtili imak n mikílistli, porke n mikílistli mach owéletki okítlanki.

²⁵N rey David otlajto de Cristo Jesús ijkuak okijto: Nochipa onikitaya n Toteko noyakapa; amitla weletis nechmojtis, porke ye kajki nomayekma.

²⁶Yika niyolpaki, iwa nitlakuika ika pakílistli, iwa maya niwilantos, kuali nikmatok oksepa nimoyolitis.

²⁷Porke mach tikkawas noalma kan miktla, nion tikkawas maijtlakawi ikuerpo Mokone yolchipawak.

²⁸Otechimititi n ojmeh non nechwikah kan nochipa niyolitos, iwa tikchiwas satlawel maniyolpaki ijkuak niyetos monawak.

²⁹'Nokniwah, kuali tikmatokeh totata rey David omikki iwa okitookakeh, porke asta axa tikmatokeh kan omotook.

³⁰Pero David okatka profeta, iwa kuali okimatia n Dios okisentlali seme de iixwiwah non walaskia okachi satepa yetoskia n Cristo. Ye mochiwaskia rey kemi okatka n David.

³¹Ijkó, kemi yaskia inewia kontlajtlatok, David okijto Cristo moyolitiskia iwa Dios amo kikawaskia ikuerpo maijtlakawi miktla.

³²Dios okiyoliti n Jesús iwa tinochteh otikitakeh.

³³Ijkó kiné, ik iyekma Totajtsi Dios okiweyijkatlali n Jesús, iwa Jesús okiseli n Espíritu Santo non Itajtsi yokijtojka kitemakas. Iwa axa yotechaltítlanili n Espíritu Santo non axa nonkitah iwa nonkikakih.

³⁴David amo otlejkok ilwikak. Pero inewia okijto: Notajtsi Dios okili Noteko: “Ximoyayanti noyekma,

³⁵asta manikintlali non mitskokolia itlampa mokxiwah.”

³⁶'Tlakah de Israel, kuali xikmatikah, nin Jesús Akin nomejwah ononkikrusifikarojkeh, Dios okiweyijkatlali para mayeto Nomoteko iwa Nomotemakixti.

³⁷Ijkuak ijkó okikakeh, nochteh omoyolkokojkeh iwa okitlajtlanijkeh n Pedro iwa n oksikimeh tlatitlanilti: —Tokniwah, ¿tlan moneki matikchiwakah?

³⁸Ijkuakó Pedro okinnankili: —Xikilikah Dios manomechtlapojpolwi iwa xiktlakitakah, iwa ximotekawilikah manomechkuaatekikah itech Itoka n Cristo Jesús, ijkó Dios nomechtlapojpolwis de nomotlajtlakolwah iwa nonkiseliskeh n Espíritu Santo.

³⁹Nin tlájtoli non yowejka omosentlali omochi para nomejwah iwa nomopilwah, noiwa para nochteh akimeh Totajtsi Dios kinekis kinmakixtis itech nochi n tlaltíkpaktli.

⁴⁰Pedro ok okintlapowiaya n tokniwah íwa ika miak chikawálistli okimiliaya: —¡Ximomakixtikah de n tlaijyowílistli non kiseliskeh akimeh tlajtlakolchijtinemih!

⁴¹Ijkó kiné, akimeh okikakeh tlan Pedro okinmachti, omokuaatekijkeh; iwa non tonati omoseitilijkeh iwan tokniwah non kineltokah Cristo Jesús kemi eyi mil tlakah.

⁴²Iwa nochteh omochijchikawayah iwa okichiwayah tlan n tlatematiltijkeh okinmachtiayah, omoyekwikayah, omotiotsajtsiliayah iwa omoololoayah para kisepankuaskeh n paj.

⁴³Nochteh omotlajtlachialtiayah, porke itlatitlanilwah n Cristo okinchiwayah miakeh milagros iwa okinextiayah tlan amayik omotaya.

⁴⁴Nochteh non okineltokakeh omoyekwikayah, iwa okimosepanxexeliliayah tlan okipiayah.

⁴⁵Okinemakayah nochi tlan okipiayah, iwa okinxejxeliliayah n tomi akimeh okimpoloaya.

⁴⁶Ixmostla omoololoayah kan Weyi Tiopa, iwa incha okisepankuayah n paj, iwa sansikah omotlamajsewiayah ika pakílistli.