Hechos 2:20-32

²⁰Tunale ayecmo quetiemacas itlaniexteles, hua mietztle chichiliebes quiename yestle antes que tecalaquesque pa inun tunale de Tlöcatzintle.

²¹Inun tunale bieye iyes, hua tlatieniehuale. Hua mochihuas que momöquextisque innochtie tli tietlajtlanelisque nemöquextelestle tietucöyupantzinco Tlöcatzintle”.

²²’Señores de tonación Israel, xejcaquecö de lo que tli nequejtus. Jesús oiloaya de puieblo de Nazaret. Deus otieixpejpenque. Ye nenqueyecmate inu porque Jesús oquepexque meyac checöhualestle nemotzölö para oquechijque tietzöbeme hua sieñas hua bieye tlachihualestle.

²³Ini nöiloac Jesús Deus otietiemöctejque ca nemejua, porque ejqueu Deus oquetzontejque antes hua oquematque que quechihualusquiöya ejqueu. Hua inmöcopa giente petzoteque nentiecoruspelojque Jesús hua ejqueu onentiemectejque.

²⁴Pero Deus otieyulebitiluc Jesús hua otiequextiluc de ipa mequelestle. Pos abele necöhualus ipa mequelestle.

²⁵David otlajtlajto de Cristo hua oquejto: Seme biloateneme Tlöcatzintle ca naja. Amo niechtlajcales tequepachule porque yejuatzi iloac ca nomöyecömpa para niechpaliebilo.

²⁶Por inu noyulo opajpöc, hua ca nocamac onequejto de ini nönca nopajpöqueles. Nuyejque naja necpea meyac confiönsa hua nemöchealestle que nocuierpo yulebes.

²⁷Porque tejuatzi amo tomocöbelis noölma ma seme mocöhua ipa mectlöncale, nimpor amo tomocöbelis nocuierpo ma palöne, porque naja nemoConietzi hua neyectec.

²⁸Oteniechmojtetele ojtle tli nectocas para necpeas nemelestle nochepa. Teniechmomaquelis pöquelestle porque seme temetzmotztelejtas.

²⁹’Señores, nemiechelfis claramente que totajtzi David omec hua omotlöltucac. Hasta öxö oncönca imejcöcoyoc.

³⁰Pos David oyeya tlayulepante hua quepoaya tietlajtultzi Deus. Oquemat que lo que tli Deus oquejtojque que quechihuasque para David, Deus quecumplirusque de melöhuac. Pos Deus oquejtojque ca juramento que yejuatzi quixpejpenasque sente de ipelhua para tlamandörus quieme rey itequepa David.

³¹Inu ocasojcömat David ca ye niepa. Oquejto noso de quiene Cristo yulebihuas, pos oquejto que Deus amo quecöhuasque tieölma ipa mectlöncale meyac tiempo. Nimpor amo palönes tiecuierpo.

³²Pos inu Cristo iloac bel yejuatzi Jesús. Deus otieyulebitiluc hua tejua tecate tetestigos de inu.