HECHOS 2:2-23

²Te sanaa‑ni te ni quejéé nɨ́hɨn vēji nde andɨvɨ́ nájnūhun tachī níhin quée, te tāca ñáyuu jeē cáyūcú ini vehe un ní cajini sōho i jeē nɨ́hɨn ún.

³Te ni cajito i nájnūhun yáñuhūn jeē ní cajitē núu te ni cacucōo xinī ná ɨɨn ná ɨɨn i.

⁴Te ndɨhɨ i, ni cunuú Espíritu Santo jiín i, te ni quejéé i cácahān i sɨ́ɨn sɨ́ɨn yuhu, ndese ni steén maá Espíritu nuū ná ɨɨn ná ɨɨn i cahān i.

⁵Te ñuu Jerusalén, suni cáhīin ñayuu hebreo, yɨñúhún núū Yaā Dios, jeē ní quijicoo i nde tācá nación nɨɨ́ cáhnu ñayɨ̄vɨ́.

⁶Te jeē ni nɨ́hɨn súcuan te ni cacutútú cuéhē ñayuu ún. Te ni cunéé íī ni i jíjnáhan i, chi ná ɨɨn ná ɨɨn i ni cajini sōho i jeē tée ni canihīn Espíritu Santo cácahān de jnūhun yuhu ñúū jicá nuū véji i.

⁷Te ni canaa ni i cájito i te ni cacahān i: ¿A násūu tée Galilea cácuu tāca tée yáha jéē cácahān de tācá yuhu ñúū nuū véjicoo yó?

⁸¿Na vé ni cuu yāha núu súcuan? Chi ná ɨɨn ná ɨɨn yó cájini sōho yó cácahān de jnūhun yuhu ñúū nuū ní cacacu yó.

⁹Chi vējicoo yó ndé tācá ñuu jicá. Sava yó véji nde Partia jiín Media jiín Elam. Te sava ga yō vēji yó ndé Mesopotamia jiín Judea jiín Capadocia jiín Ponto jiín Asia.

¹⁰Suni nde Frigia jiín Panfilia jiín Egipto jiín tɨjnɨ ñuu jeē íne nde yatā gā ñuu Cirene ñuhun Africa vējicoo yó. Te sava ga yō nde ñuu Roma vējicoo yó, te cáyūcu jínu‑ni yó yáha. Te máá yó jeē véjicoo ñuu Roma, sava yó cácuu máá ñáyuu hebreo te sava ga yō cácuu ñayuu sɨ́ɨn ñuu, ni cacandíje yó ndíquín yō ley ñayuu hebreo.

¹¹Suni nde Creta jiín Arabia vējicoo sava yó. Te cájini sōho yó jéē jiín jnúhun yuhu ñúū ná ɨɨn ná ɨɨn máá yó cácahān de tācá jniñu jéhnu ní sáha Yaā Dios, achí i.

¹²Te ndɨhɨ i chi ni canaa iī ni i cájini nahín i. Te ni candajnūhún i jíín jnáhan i: ¿Na vé cúu jeē ní cuu núu súcuan jeē cácahān de yuhu ñúū yō? achí i.

¹³Te sava i ni cacahān catá i: Tuú chi jeē cánajīni de, áchí i.

¹⁴Yūcuán na te ni candocuɨñɨ̄ Pedro jiín ndɨhúxí ɨɨn ga apóstol, te ni cahān jee Pedro jiín ñáyuu ún: Níhín jnáhan ñuu yō hebreo, jiín ndɨhɨ níhín jéē cáyūcu ní Jerusalén, jnūhun yáha na chúhun ni ni jíjnáhan ní, chi cuni nahín ní cahān na jíín ní.

¹⁵Chi máá ná jijnáhan ná, nasūu jéē cájīni ná nájnūhun cájeni ni ní, chi sáá cahɨɨ̄n jenéhen cúu, te nasūu hora cánajīni ñayuu cúu.

¹⁶Chi sa suhva squícu jniñu yáha nájnūhun ni cahān Joel, tēe ni nacani jnūhun Yaā Dios nde jenahán, chi súcuan ni cahān de:

¹⁷Achí Yáā Dios: Quɨvɨ̄ sándɨ̄hɨ́ na te tají rí Espíritu rī cunuú yá jiín táca ñáyuu, te sēhe yɨɨ́ ró jiín séhe sɨ́hɨ́ ró, nacani i jnūhun ri, te tāca tée lulí chi coto ndijin de jeē steén rī nuū de, te tāca tée jéhnu chi sáha ri jeē scóto jēni de.

¹⁸Te quɨvɨ̄ ún chi tají rí Espíritu rī cunuú yá jiín táca mozo rī, cúu tēe cúu ñahan, te nacani i jnūhun ri.

¹⁹Te ichi ándɨvɨ́ sáha ri jniñu jéhnu jeē náā ni ñayuu coto i, te sáha ri jniñu jéhnu ini ñayɨ̄vɨ jéē steén jeē cujéhnu ri, chi coo nɨñɨ̄ jiín ñúhūn jiín ñúhmā nájnūhun vicō. Yūcuan cúu jeē sáha ri jeē cóo jnūndóho xeēn.

²⁰Te nduu jnúú níāndii te ma cúndijin gā, te yoō coto cuéhé nájnūhun nɨñɨ̄. Yūcuán na te quee quɨvɨ̄ jeē ndíji máá Jítoho rō Jesús. Quɨvɨ̄ ún coo cuehē jniñu jéhnu, te cuni ndɨhɨ ñayuu jeē quɨvɨ́ maá Jítoho rō cúu.

²¹Te tāca ñáyuu jeē cahān ndahú i jíín yá te jnama ya i, áchí Yáā Dios. Achí Joel ni nacani de jnūhun ya.

²²’Jeē yúcuan níhín tée ñuu yō Israel, cuni nahín gá ni jnúhun yáha jíjnáhan ní. Ni steén Yaā Dios jeē ní tají yá maá Jesús, Yaā ní jehnu ñuu Nazaret, chi máá Yáā Dios ni jēhe ya jeē ni sáha Jesús jniñu jéhnu mēhñu máá ní, jiín jniñu jeē steén jeē cujéhnu ya, te jniñu un ní canaa ni ni ní cajito ní. Te je cájini vāha ní jéē súcuan ni cuu.

²³Te máá ní ni cajnɨɨ ní yá, te ni cajendēca ní yá nuū tée xeēn ni cajehni de ya jicā cruz ni casáha ní. Te nde jiín tiempo je ni jini Yaā Dios jeē súcuan sáha ní jíjnáhan ní, chi súcuan je ni sándaā yā.