Hechos 2:15-34

¹⁵¿Quiacua reɨ̃ Jesús ɨcuasa riqui jẽje re? Quiacua eã ño ñene. Tenda que nyuɨ ramote resẽ. Mbia quiacuasa eã ño huee tenda resẽ.

¹⁶Ã nɨɨ ngue Joel embesa mbesa cose ra. Dios cheẽ mbuchecuasa que embesa ã nɨɨ nda. Eɨ̃ ngue embesa ra:

¹⁷“Mbae ua jiri mos e ra Espíritu Turã amondo mbia ja je”, ɨ que Dios ra. “Jendiirĩ nda secheẽ mbuchecua mbia je. Acuanɨndu ra serea rea tuchɨ cuu. Ameɨ abe ra serea rea cuu no.

¹⁸Aque mose ra Espíritu Turã amondo serimba ja je. Serimba ra secheẽ mbuchecua checua mbia je.

¹⁹Mbia mae sayã nda asaã saã ibi rɨ̃ no. Eruqui rese ra mbia mae no. Tata rese ra mbia mae no. Tatashĩ ndese ra mbia mae no.

²⁰Mbia rerecua tu nonde ra tenda ñɨmoo. Eruqui rã nda nyasi mbia rerecua tu nonde”, ɨ que Dios ra.

²¹“Ndeya eã ño serese, Sererecua”, ɨ mose emo ñee Dios je, aque ra Dios sirõ eɨcuã sɨ, ɨ que Joel embesa ra.

²²Israel jenda, ¡seandu rã! Nazaret jenda rɨɨ̃ aɨco ñee ñee jẽje a. Jesús rɨɨ̃. Dios que Jesús mbuquirãcuã tuchɨ ra. Nyebe que Jesús mbia mae sayã saã saã nda. Ũquɨ̃ ndese que jemae nda.

²³“Mbia ɨcuã nda seriirĩ ɨquia”, ɨ que Dios Jesús mano nonde ra. Jẽ nguia Jesús jẽɨquia tuchɨ nguiã cote. Jẽ nguia jemee nguiã mbia ɨcuã je. Eɨquia nonde. Dios rane ngue jirandu Jesús rese ra. “Mbia ɨcuã nda Jesús ɨquia”, ɨ que Dios quia nyii ra.

²⁴Dios que Jesús mbuquera sɨ ra. Jesús mano mbeɨ aroneãte.

²⁵David que Jesús cheẽ senei cose ra. Ã ngue ñee nda: Sererecua riqui sembuɨ eã mbeɨ co. Eriqui beɨ serese co. Mbae riqui sembusiquiche aroneãte co.

²⁶Nyebe seya tuchɨte riqui co. Nyebe aɨco ñee turãte Dios rɨɨ̃ co. Semano mose abe ra Dios huɨ eã mbeɨ sesɨ.

²⁷Seaingue ra eresechayã semano mose, Sererecua. Serete abe ra erembuquera sɨ mɨngo. Ndechesecuate aɨco co.

²⁸Semɨngosa tuchɨ rei nde. Sereco mose nderese ra seya tuchɨ, ɨ que David Jesús cheẽ nenei cose ra.

²⁹Tacheẽ nyecua jẽje, Seresenda. Nanderu David que mano cose resẽ. Mbia que echati resẽ. Eatisa nandeɨcua ja quia co resẽ.

³⁰David rei Dios cheẽ mbuchecuasa. Dios que ñee ee ra. “Nderiirĩ mo nda Cristo. Ae ra mbia rerecuarã tuchɨ. Nderiquicharõ nda mbia rerecuabi tuchɨ”, ɨ que Dios David je cose ra. “Dios ñee ñooñoa tuchɨ chõ nguiã”, ɨ que David ra.

³¹David que Dios cheẽ ɨcuate quia ra. Nyebe que ñee Jesús rɨɨ̃ nda. “Seaingue ra eresechayã semano mose. Serete ra erembuquera sɨ mɨngo”, nyebe David ɨ nguiã Jesús rɨɨ̃.

³²Dios que Jesús mbuquera sɨ ra. Ũquɨ̃ ureɨcua ja quia ã. Nyebe ureɨco nguiã jembiirandu randu ũquɨ̃ ndese ã.

³³Dios que Jesús querao ibate nyɨese ra. Dios jii eriqui pee cote. Dios que Espíritu Turã mee Jesús je cote ra. Ucheẽ nguire que emee ee ra. Jesús riqui Espíritu Turã mondo ure je co. Ã Espíritu Turã nyɨsaã jeñandu ñandu quia ã. Espíritu Turã ndiqui ã mbucheẽ mbia mo ñee ã.

³⁴David osoã ibate aque mose. Jesús rɨɨ̃ ngue David embesa ra. Ã ngue embesa ra: Dios que ñee sererecua je ra. “Ecoi sejii. Nde abe ra ererecua serese. Ae ndeucuayãte quia nae, ũquɨ̃ je ra ndequirãcuã ateacuquia tuchɨ. Ndequirãcuã tuchɨ ra ũquɨ̃ sɨ”, ɨ que Dios sererecua je ra, ɨ que David embesa mbesa ra.