HECHOS 2:15-31

¹⁵Chi ndá sāán, nsūú jā jíni ndá sá tá cúu nūū jáni inī ndá ní. Chi nsūú hora jā jīni nchivī cúu, chi cáta cahīīn jānehēn cúu.

¹⁶Chi sa tiñu yáhá cúu jā squíncuu tá cúu nūū ní ncāhān Joel, tēe nī nacani tūhun Yāā Dios jondē janahán. Chi súcuán nī ncāhān dē:

¹⁷Cáchī Yāā Dios: Ndá quīvī sándīhí de tetíñú nī Espíritu ni cuēē nūū ndācá nchivī. De sēhe yií nú jíín sēhe síhí nú, nacani ndá ji tūhun nī. De ndá tēe suchí, chi sāhá nī jā scóto nūū ji, de ndá tēe ñáhnú, chi scóto jāni nūū dē.

¹⁸De jāndáā chi ndá quīvī ñúcuán de cuāha vāha nī Espíritu ni nūū ndá mozo ni, cúu tēe cúu ñahan, de nacani ndá ji tūhun nī.

¹⁹De sāhá nī tiñu ñáhnú ichi andiví jā sāhvi inī nchivī cunī ji, de suni sāhá nī seña inī ñayīví de cunī nchivī jā cúñáhnú nī, chi coo nīñī jíín ñuhūn jíín ñūhmā modo vīcō.

²⁰De ncandiī chi cutuún de mā cútūu cā, de yōō cucuáhá modo nīñī. De ñúcuán de quenda quīvī jā nenda maá Jētohō ndá nú Jesús. De cunī ndācá nchivī jā quīvī cāhnú cuu quīvī ñúcuán.

²¹De ndācá nchivī jā cāhān ndāhví ji jíín yā, chi scácu yā ji, ncachī Yāā Dios. Ncachī Joel jondē janahán.

²²De nī ncāhān cā Pedro: Mitan de ndá ní nchivī nación maá ó Israel, cunini ní jā cāhān sá tūhun Jesús, tēe ñuū Nazaret. Chi maá Yāā Dios nī jēhe yā poder yā nūū Jesús jā ní nsāhá yā ndá tiñu ñáhnú māhñú ndá ní jíín tiñu jā stéhēn jā íyó poder yā, jíín tiñu jā sáhvi inī nchivī sáhá, tá cúu nūū ní jinī ndá ní jā súcuán nī ncuu. Súcuán nī stéhēn Yāā Dios nūū ō jā maá yā nī ntetíñú Jesús.

²³Sochi nī ntiin ndá ní yā, de nī nasiáha ndá ní yā ndahá ndá tēe nēhén. De nī jahnī ndá dē yā yīcā cruz nī nsāhá ndá ní. De ja nī jinī Yāā Dios jā súcuán sāhá ndá ní, chi ja nī nsāhá ndāā yā jā súcuán coo.

²⁴Sochi nī nastécū Yāā Dios Jesús, de nduú ní ncúu cā yā ndīyi, chi tūndóhó xéēn jā jíhī nchivī, nduú cā ní ncúu sāhá jíín yā.

²⁵Chi jondē janahán de nī ntee rey David tūhun nāsa cāhān Jesús jíín Yāā Dios: Jētohō sá, jínī sá jā níí cání íyó ní jíín sá. Chi íyó ní lado cuáhá sá jā chíndeé ní sāán, tácua mā cúyūhú sá.

²⁶Jā ñúcuán cúu jā cúsiī inī sá, de cáhān sīī sá. De suni ñúhún inī sá jā nastécū maá ní yiqui cúñu sá.

²⁷Chi mā squéndōo ní ánō sá nūū íyó ánō ndá ndīyi, de ni mā cuáha ní tūhun jā tēhyū sá, chi sáhá sá tiñu jā cúnī maá ní de íyó mānī ní jíín sāán.

²⁸Nī stéhēn ní nūū sá nāsa natecū sá de sāhá ní jā cusiī ndasí inī sá sīquī jā cundeē sá jíín ní níí cání. Cachī Jesús, ncachī David jondē janahán.

²⁹Ndá ní amigo, ná cáchī cājí sá nūū ndá ní tūhun tatā ō David, tēe nī ncuñáhnú jondē janahán, chi nduú ní ncáhān dē ndá tūhun yáhá sīquī maá dē. Chi nī jīhī dē, de nī jīquiyuhū dē. De jínī ō nūū yíyuhū dē jondē mitan.

³⁰Chi nī ncuu dē tēe nī nacani tūhun Yāā Dios jondē janahán. De nī jinī dē jā ní ncāhān téyíí yā jíín dē jā chījin tatā maá dē quiji Cristo, de cundeē yā tatúnī yā nūū mesa dē tá-ni nī ntatúnī maá dē jā ní ncuu dē rey.

³¹Jondē tá ncháha ca quiji Cristo, de ja nī jinī dē jā cuū yā de natecū yā. De nī ncachī dē jā má quéndōo ánō yā nūū íyó ánō ndá ndīyi, de juni yiqui cúñu yā mā téhyū.