HECHOS 2:14-35

¹⁴Jaun₂ ca₂nau₂ Pe₄ jë₄ jme₁guá₄ quiain'₅₄ guë́₄ guia₃-ján₃ chi'₂ dsɨ₂guia₃-tɨ́n₂ rɨin'₅₄. Jaun₂ ca₂juá'₂ tiá₂ ca₂tsɨ́'₃ dsa₂: ―'Nia'₂ dsa₂ chan₂ Judea quian'₅₄ ca₂le₃jɨ́ng'₃ i₂tián'₅ Jerusalén në́₃, juɨ₁le₂ŋi'₅₄ 'nia'₂ jág₁ la₂. Nei₂ 'nia'₂ dse₃ a₂juá'₄ jniá₂ la₂.

¹⁵Tsá₃ le₁'en₅ dsa₂ la₂ juɨ₁lia'₂ lɨ́n'₂ 'nia'₂, ia₁ con'₂ hora ŋí₁ ŋi₃ të₂ o₃'iog₂ bá₄ guë́₄ la₂.

¹⁶Të₂le₃ a₂rë₂ti₃ con'₂ lë́₅ jág₁ a₂ca₂'ë́₂ Joel ma₂lɨ́g'₂, lia'₂ con'₂ jme₁ca₂juá'₂:

¹⁷Jë₁ca₂tó'₂ jmɨg₄, juá'₂ Diú₄, tsɨng₅₄ Jme₂dsí₂ quiáng₃ jaun₂ sióin₃ ne₄ quió'₅ ca₂le₃jɨ́n₃ dsa₂ mɨ₂güɨ́g₃. Ja₂ŋí'₂ 'nia'₂, ja₁mɨ́g'₄ në́₃ qui₃dsia₃ o₄quió₃ jniá₂. Dsó₂ chi'₂ quián'₂ 'nia'₂ në́₃ a₂lë₁qui₃jág₃ 'e₂ qui₃jág₃, dsɨ₂gui'₅₄ can'₅₄ guë'₂ qui₃quɨ₃.

¹⁸Jmɨg₄ jaun₂, qui₁'ɨ́ng₄ Jme₂dsí₂ quiáng₃ ne₄ quió'₅ dsa₂ ŋe'₂, dsa₂ mɨ́₂ në́₃ i₂jme₂ti₃ ta₁ ne₃, jaun₂ guë́₄ qui₃dsia₃ o₄quió₃ jniá₂.

¹⁹Dsɨ₁ guei'₅₄ guë'₂ qui₁'ë́₄ jniá₂ dsa₂ cosas a₂dsɨ₃gó'₃ dsɨ́₅. Ne₄ gua'₅₄ 'uë₃ guë'₂ jmo₅₄ jniá₂ lé₂ léi₄, juɨ₁lia'₂ jmɨ₂, si₂, jnei₅ lë́₅ jme₁ŋi₁ në́₃.

²⁰'Iog₂ guë'₂ co₂dsia₅ le₃lia'₂. Tsɨ'₂ guë'₂ lé₂ guéin₂ lia'₂ lë́₅ jmɨ₂. Ca₂le₃jë́₃ a₂në₅ lé₂ né'₃ guë́₄ a₂guá₂ jmɨg₄ quió'₅ Te₁gui'₅₄. Jmɨg₄ jaun₂ lé₂ caun₂ jmɨg₄ juë'₂ a₂gau₂.

²¹Jaun₂ ca₂le₃jɨ́n₃ dsa₂ i₂mɨ₅ chi₂lén'₂ Te₁gui'₅₄, lióin₂ bá₄.

²²’'Nia'₂ dsa₂ chan₂ Israel, nei₂ 'nia'₂ ca₂le₃jë́₃ a₂juá'₄ jniá₂ la₂. Jesús chan₂ Nazaret dsa₂ dsen₃ quián₅ Diú₄, i₂ca₂cuë́'₃ 'éi'₃ ca₂chein₃ jɨn'₄ 'nia'₂. Ca₂jmo₃ Diú₄ ca₂le₃jë́₃ léi₄ juë'₂, ca₂le₃jë́₃ 'e₂ dsɨ₂gó'₃ dsɨ́₅ dsa₂, qui₂ca₂jmo₃ të₂le₃ quian'₅₄ Jesús jɨn'₄ 'nia'₂. A₂ŋi'₅₄ rë₂ bá₄ 'nia'₂ jaun₂.

²³La₁ jme₁ca₂jáng'₂ dsa₂ o₄gog'₂ 'nia'₂ con'₂ jme₁ma₂lë́₅ jág₁ quió'₅ Diú₄ a₂ma₂ŋi₅ le₂jŋiá₅, 'nia'₂ në́₃ ca₂chang'₂ i₂'éi₂, ca₂te'₅₄ chi₁'ŋei₂₃, ca₂i₁jɨin'₅₄ 'nia'₂ o₄gú₃ dsa₂ 'lɨn'₅₄ i₂tsá₃ ŋéi₂ dsɨ́₅. Jaun₂ ca₂jŋag'₃ ca₂tion₃ cróg₄.

²⁴La₁ Diú₄ ca₂jme₃jein'₅₄ táng₃, ca₂lió₂ ne₄ 'mú₃. Ia₁ tsá₃ lé₂ jua'₅₄ a₂të₃roin₅₄ a₂rë₃join₅ co₂tan₅₄ jɨn₄ 'lag₄.

²⁵Ia₁ ca₂juá'₂ 'lag₄ Rag₅₄ David a₂'ɨin₂₃ Jesús, ca₂juá'₂: Ia₁ jɨn₄ bá₄ jniá₂ tián₂ Te₁gui'₅₄ cau₅ quió₃. 'Éi₂ bá₄ guá₅ të₂le₃ gu₃ ne₁, ia₁jaun₂ 'i₁jan₂ tsá₃ 'ein₂ lé₂ jmóg'₂ jleng₃, 'ɨ₅ dsɨ₃.

²⁶Jaun₂ lë₃, 'ŋio₅ lɨn₃ ca₂jmo₃ jniá₂ 'io'₂, jaun₂ ca₂juá'₃ quian'₅₄ le₁tsɨ'₃ jág₁ a₂jéin₅ lián'₂. Jaun₂ lë₃ tsá₃ 'ɨ₅ dsɨ₃ jë₁ma₂ca₂jon₃ nɨ₁ŋɨ₃.

²⁷Ia₁ tsá₃ cuë́'₁ jmɨg₄ a₂jŋia₃ jme₂dsí₂ quiáng₃ ja₁tion'₅₄ 'lag₄, on₃ guë'₂ cuë́'₁ jmɨg₄ a₂siá'₃ nɨ₁ŋɨ₃ jniá₂, dsa₂ jŋió₅ quiáng'₂ i₂'nióg'₃.

²⁸Ca₂'ë'₅₄ ca₂jme₁tag'₂ juɨ₅ ja₁tɨ́n'₄ jme₂dsí₂ quiáng₃. Jaun₂ jmó'₂ jéin₄ lián'₂ jë₁ma₂'eng₅₄ ja₁cong'₂.

²⁹'Rɨn'₅₄ jniog₄, léi₄ dsón'₂ bá₄ ca₂jon₃ tsɨ₁jon₂ jmei₂ jniog₄ David, jaun₂ ca₂'oin₃. Në₅ bá₄ chí'₅ guë'₂ tau₂ 'ŋio₅ quió'₅ quian'₅₄ jniog₄ rë₂në́₃.

³⁰La₁ David 'éi₂ jme₁lɨ́n₄ jan₂ i₂jme₁'ë́₂ jág₁ quián₅ Diú₄, jaun₂ jme₁ŋi₅ rë₂ a₂ca₂cuë₃ Diú₄ jág₁ 'ɨin₂₃ 'ŋiog₅, a₂le₃chan₂ jë₄ quió'₅ ja₁ŋi'₅₄ chi'₂ dsio₅₄, jan₂ i₂lɨ́n₅ I₂rë₂'ɨ́n₁ quián₅ Diú₄. Jaun₂ i₂'éi₂ guá₃ goin₃ ne₄ ne₄ta₁ ja₁jme₁guá₄ 'ŋiog₅ David.

³¹Co₂'nió'₄ a₂ma₂jág₂ bá₄ David le₂jŋiá₅, ca₂juá'₂ a₂jen'₅₄ I₂rë₂'ɨ́n₁ quián₅ Diú₄. Jaun₂ ca₂juá'₂ ján₃ a₂tsá₃ jŋia₃ jme₂dsí₂ quió'₅ jɨn₄ 'lag₄, on₃ guë'₂ dsɨ₃'én₂ nɨ₁ŋɨ₁₂ jua'₅₄ a₂siá'₃.

³²Ia₁ Diú₄ bá₄ ca₂jmo₃ ca₂jen'₅₄ táng₃ 'ŋiog₅ Jesús 'éi₂. Ca₂le₃jág₃ bá₄ jnia'₅₄ ca₂të́₂ ne₄, jaun₂ lë₃ cuë₂ jág₁ dsau₅.

³³Jaun₂ ca₂chó'₂ Diú₄ quian'₅₄ gu₂ ne₁, ca₂jme₃juag'₂. Jaun₂ Diú₄ Jmei₂ ca₂cuɨn₃ Jme₂dsí₂ quiáin₅ ca₂cuɨin₃ Jesús, lia'₂ con'₂ lë́₅ jág₁ quió'₅ ma₂cuë₃. Jaun₂ ca₂le₃jë́₃ a₂në₅ a₂ma₂jag'₅₄ a₂ma₂nei'₂ 'nia'₂, já₅ ne₄ 'éi₂ bá₄.

³⁴Ia₁ on₃jua'₅₄ David ca₂uɨ́g₂ guei'₅₄ i₂juɨ́g₃, ia₁ 'ŋiog₅ David ca₂juá'₃: Ca₂juá'₂ Diú₄ ca₂tsɨ́'₃ Te₁gui'₅₄ quiáng₃: “Né₂ con₂ jniá₂ të₂le₃ gu₃ ne₁,

³⁵ca₂lia'₂ ca₂të́₂ jmɨg₄ a₂tón'₁ jniá₂ dsa₂ i₂'iog₅₄ o₄tag'₄”.