Hechos 2:14-25

¹⁴Ecꞌuchiriꞌ, ri Pedro xtaqꞌuiꞌic junam cucꞌ ri junlaluj chic takoꞌn y lic co xchꞌawic, jewaꞌ xubiꞌij: «Achijab alak aj judiꞌab y onoje ri alak jekel wara Jerusalem, tape alak chi utz ri cankꞌalajisaj che alak.

¹⁵Ma e chiwach ralak, waꞌ waꞌchijab quekꞌabaric, noꞌj ¡na e ta uꞌanom riꞌ! Ma cꞌa e ne belejeb ora laꞌ che wa anim.

¹⁶Janipa wa cata alak y quil alak woꞌora, waꞌ e ri ubiꞌim chi can ri kꞌalajisanel Joel ojertan, echiriꞌ jewaꞌ xubiꞌij:

¹⁷“Che tak ruqꞌuisbal kꞌij” cubiꞌij ri Dios, “cantak bi ri Wuxlabixel paquiwi conoje ri ticawex che ruwachulew. E tak cꞌu ri miꞌal alcꞌoꞌal alak caquikꞌalajisaj ri Nutzij. Ralabo caquilo janipa ri cancꞌut chiquiwach; yey e ri nimak winak, pa wachicꞌ caquil wi janipa ri cankꞌalajisaj chiquiwach.

¹⁸Chupa tak cꞌu riꞌ laꞌ la kꞌij, paquiwi ri e waj chac ixokib y achijab cantak bi ri Wuxlabixel chaꞌ jelaꞌ caquikꞌalajisaj ri Nutzij chiquiwach ri ticawex.

¹⁹Chwa ri caj cancꞌut tak cꞌutubal re nuchukꞌab yey waꞌ na jinta ilitajinak wi y che ruwachulew canꞌan cꞌutubal rucꞌ quicꞌ, rucꞌ akꞌ y rucꞌ mayul re sib.

²⁰Ecꞌu ri kꞌij cuꞌan kꞌekuꞌm uwach yey ri icꞌ cuꞌan cak uwach pachaꞌ quicꞌ; waꞌ e cuꞌana echiriꞌ ya copon rukꞌijol ri Kanimajawal. Waꞌ wa jun kꞌij lic nim y na jinta cꞌo cajunimax wi ruchomalil.

²¹Y conoje cꞌu ri caquicoj quib chwach ri Kanimajawal re quebucolobej, riꞌ quecolobetajic” xchaꞌ.

²²»Achijab alak aj Israel, tape alak janipa wa cambiꞌij che alak woꞌora: Ri Jesús ri aj Nazaret, Rire e ri Jun takom lo chixoꞌl alak ruma ri Dios. Lic etaꞌam cꞌu alak ri xuꞌan ri Dios ruma ri Jesús chixoꞌl alak, waꞌ e uqꞌuiyal milagros y tak cꞌutubal re ri unimal uchukꞌab ri Dios.

²³Yey ri Dios lic uchꞌobom chi ulok y retaꞌam suꞌchac xuya ri Jesús pakꞌab alak. Ecꞌu ralak xchap bi alak y xtak alak ucamisaxic chwa cruz cuma winak na jinta Rutzij Upixab ri Dios cucꞌ.

²⁴Pero ri Dios xucꞌastajisaj lok y xresaj chupa rucꞌaxcꞌolil ri camic, ma ri camic na jinta uchukꞌab puwi Rire y ruma riꞌ, Rire na xcꞌojiꞌ ta pukꞌab ri camic.

²⁵»Rojertan xubiꞌij can ri rey David puwi ri Cristo: Riꞌin canwil ri Wajawal xaki e laꞌ cꞌo chinuwach. Ruma cꞌu cꞌo Rire pa nuwiquikꞌab, na jinta cꞌana cayuchꞌuyuꞌn weꞌin.