HECHOS 2:13-37

¹³Peru nuu tu bi'ni burla, ma na naxudxi ca xpinni Cristu que.

¹⁴Oraque biasa Pedru bizuhuaa, laa ne sti once apóstol que, ne uní' ne gana, na: ―Hombre de Judea ca', ne cani nabeza Jerusalén, laucaa diaga ni chi tidxe laatu ri'.

¹⁵Cadi naxudxi di ca binni ri' casi na tu ca, purti deru las nueve ndi',

¹⁶sínuque cayaca ni bicaa profeta Joel chiqué ra na:

¹⁷Na Dios: “Zadxiña dxi ucheeche Espíritu stinne luguiá stale binni. Zusinié ca xiñi gaana tu ne ca xiñi dxaapa tu, ne zuuya cani nahuiini xiixa casi ñaca lu bacaanda', ne zanié nia ca binni gola lu bacaanda'.

¹⁸Ca dxi que zucheeche Espíritu stinne luguiá cani runi xhiiña', hombre ne gunaa, ne zaní' ca ni gabe laaca'.

¹⁹Zune stale enda nandxó' ibá', ne zahuinni seña guidxilayú de rini ne bele, ne ziasa gu'xhu'.

²⁰Zacahui lu gubidxa ne zaca beeu naxiñá rini dxi mayaca idxiña dxi udixhe Dios. Zaca stale cosa de enda ridxagayaa dxi que, ne zusihuinni Dios enda nandxó' sti'.

²¹Ne irá ni inaba gacané Dios laa la? zalá.”

²²Yanna laucaa diaga ni chi tidxe laatu ri', binni Israel ca'. Chi güe nia laatu stiidxa Jesús de Nazaret. Rihuinni Dios biseenda laabe purti laaca tu nanna tu ucané Dios laabe bi'ni be stale milagru ne cosa de enda ridxagayaa ne bisihuinni be seña nezalú tu.

²³Maca nanna Dios xi chi aca be, ne laatu bi'ni tu ni gudixhe Dios gaca que. Unaaze tu laabe, bidii tu laabe ucaa ca binni malu laabe lu cruz. Ne zacá laatu biiti tu laabe.

²⁴Peru bisibani Dios laabe, ulee laabe lu ná enda guti, purti qué ñanda ñaana né enda guti laabe.

²⁵Ndi nga ni uní' David chiqué, ne casi ñaca Jesús caní' ni: Nanna dxi'che qué rusaana Dios naa. Nuu be para gacané be naa ti cadi chuaa xizaa.

²⁶Nga runi bidxá ladxiduá' de enda nayeche' ne biree diidxa sicarú de ruaa'. Neca gate peru nanna dxi'che zandisa be naa.

²⁷Purti qué zusaana be naa lade gue'tu', ne qué zudii be lugar guiu'dxu cuerpu sti Xiiñi be ni runi ni na be.

²⁸Biluí' be naa neza enda nabani, ne nabé rieche purti nuu né be naa.

²⁹Biche ca', irá nu nanna nu guti bixhoze gola nu David, ne bigaachi', ne nuu ru xpa' be rarí de yanna.

³⁰Peru guca be profeta, ne biluí' Dios laabe ni chi gaca ru' ne bidii stiidxa laabe de lade xfamilia be zaree tobi ni cui de rey casi urí be.

³¹Ne casi ñaca biiya be ra bibani Cristu ne uní' be qué ziaana di lade gue'tu' ne qué ziu'dxu cuerpu sti'.

³²Racá cuzeete be Jesús ni undisa Dios de lade gue'tu', ne laadu bidu'ya du guca ni.

³³Undisa Dios laabe ne bicuí laabe cue' ne bidii laabe Espíritu Santu casi gudxi laabe zuni. Ne yanna ma biseenda be Espíritu Santu que rarí'. Nga nga ni cayuuya tu ne cayuna diaga tu ca.

³⁴Purti qué nigui'ba David ibá', peru laa pe uní': Na Dios rabi Señor stinne': “Gurí cuee'

³⁵dede ora ma gudixhe dxie cani nanala'dxi lii xa ñee lu'.”

³⁶Yanna laganna dxichi, binni Israel ca', Jesús ni bicaa tu lu cruz que nga ma bi'ni Dios xaíque sti irá', ne ma biluí' laanu laabe nga Cristu ni ulí que.

³⁷Ora bina diaga cabe xi na Pedru, ucaná ladxidó' cabe ne rabi cabe Pedru ne xcaadxi apóstol que: ―Yanna xi guni du ya', bichi ca'.