HECHOS 2:13-33

¹³Laa nogaa zho rzhidznie, rnee zho: ―Rzudz grë zha qui, gane squi rzë xtiidz zho.

¹⁴Dzigo bzoli Pedr gza me stsiiptib zha ne nac poxtl ga, psilo me nguiedz bnee me lo grë miech ne ndxie ga, rëb me lo zho: ―Grëse to, zigtaa zha Jerusaléna, zigtagaa zha ne blanso Jerusalén nuw, goḻgona gaṉle.

¹⁵No bla to quianee rëb to rzuudz no, per led rzuudzd no. Griiṉpaale name blan ngbidz, niicle niaca zha ne riepaa nziu, niacxe gooṉ nale laa zho gzudz.

¹⁶Led rzuudzd no, sinque niina nagoṉ noyac grë miṉe bzeet Joel padzeela (tib meṉ ne biadteed xtiidz Dios), zeeṉe znu rëb me:

¹⁷Znu rnee Dios: Zeeṉe wzhile ruṉfalt gaḻ dze co, laa naa cxeḻ zhiEspíritu naa zdoo grëse miech; grë xingan zhow, grë xindzoop zhow, laa zho cteed xtidz naa, grë zha nguieg, nzian grë ncuaaṉe glulo lo zho, grë meṉgol, nzian grë ncuaaṉe glu mcaaḻ lo me.

¹⁸Leṉ dze co, grëse zha ne nguzobdiidz lo naa, niicle mguiw, niicle wnaaw laa naa cxeḻ zhiEspíritu naa zdoo zho, dzigo grëse zho cteed xtidz naa.

¹⁹Nzian grë ncuaaṉe gzee zdoo to glu naa zhan gbaa, scaque lo guidzliu, zaṉ to ren, zaṉ to bel, zaṉ to grë goxdoo.

²⁰Zeeṉe zhile gdziṉ dze ne guiaad meṉ ne rnabey ne, laa lo ngbidz ycow, laa mëë gna nizhnie zig rna ren. Dze ne guiaad me ga, dze co gac tib dze ne mazdraa nroob, tib dze ne mazdraa ndzon.

²¹Grëse zha ne dib zdoo gnab lo Dios yquia zdoo me zho, grëse zha co scaania me zho.

²²’¡Grëse to, goḻquiaadiaga sca gaṉle! Led naṉwen to gaṉle Dios pxeeḻ Jesús, meṉ Nazaret ne biaad lo guidzliu rii, Dios bnabey beeṉ me grë milagr nroob, beeṉ me grë ncuaaṉe bzee zdoo to; ga blu gaṉle ne nli Dios nacnie me.

²³Laa zeeṉe laa Dios bdeed diidz biab me ladznia to (sac ible xtiidzle Dios naca, naṉle me zha nac ne sca ted Jesús), laa to bnaaz me, bzobdoo to me, bnabey to gut me. Led to goṉ bloo me ladznia grë zha ntseeb ne sca psacsi me pquiaa zho me lo cruz.

²⁴Per bleeban Dios me, psilaa Dios me ladznia guieḻgut; sac lëbd guieḻgut ne lëëw gnabey lo me.

²⁵’Zeeṉe bzeet David Jesús, znu rëb me: Meṉ ne rnabey naa, raṉ naa tibaque quianap me naa; tibaque zo me cue naa nëz derech, ¿pe nac nadieṉ ne lega pe gac naa?

²⁶Gacxe waa, nley no zdoo naa, niicle ludz naaw, rleya rooḻnie naa me. Ni gane tibliladz rac naa;

²⁷sac naṉ naa niicle guet naa, ib csaand me guiaaṉ naa leṉ baa, ib gdeete me diidz xiṉ xpëël naa. Naa nac tib nguṉdziin lo me, ni rleynie me naa.

²⁸Me blu lo naa zha grieelo ygaa naa guieḻmban, ni tib guieḻbley nroob ne ygaa naa zeeṉe laa naa gdziṉ lo me.

²⁹’Bets, bzian, to ne nac to meṉladz naa, goḻgona gaṉle: led miṉe bdete pxozgol ne David bnee me nu; sac goṉ, zeeṉe gut me güey zho güeyqueets zho me, ni haxta lo nadze laa xpaa me bii niaa.

³⁰Sinque miṉe bded Jesús ga bzeet me, sac goṉ tib zha ne biadteed xtiidz Dios goc me. Gocnaṉle me ne lo xtii me grieequia Meṉ ne nacle diidz ga cxeeḻ Dios, ni meṉ co sob gnabey zigne bnabey me; sac scale rëb Dios lo me, ni haxta bzeet Dios lë Dios parne glu ne yquidied me.

³¹Dzigo zig nac zeeṉe raṉle me grëtaa miṉe ted Jesús, nacne bzeet me ne ib zrieeban Jesús, rëb me guiaaṉd xcuerp Jesús zaatne rbëz grëraa meṉgut, niicle xiṉdgaaw.

³²’Jesús ga goṉ bzeet me, sac zig nac Jesús grop lo no bdioṉ no bleeban Dios me,

³³ni niina gbaa zob me cue Dios nëz derech, sac me nac meṉ rnabey. Ni zigne nacle xtiidz Dios meṉ ne nac Pxoz me, laa me pxeeḻ Espíritu Sant lo no; ni niina grëse ncuaaṉe noyaṉ tow, grëse ncuaaṉe noyongaa tow, xtsiiṉ Espíritu Santow.